ភ្នំពេញៈ អង្គការចលនាដើម្បីសុខភាពបានចាត់ទុកថា ការខកខានក្នុងការផ្លាស់ប្តូរសារព្រមានសុខភាពនៅលើកញ្ចប់បារី ទៅតាមការកំណត់របស់ក្រសួងសុខាភិបាលនឹងធ្វើឱ្យការប្តេជ្ញាចិត្តឈប់ជក់បារីរបស់ប្រជាពលរដ្ឋថយចុះ ខណៈដែលអ្នកជក់បារីងាយប្រឈមនឹងគ្រោះថ្នាក់ធ្ងន់ធ្ងរ នៅពេលដែលមានការឆ្លងជំងឺកូវីដ ១៩។
យោងតាមប្រកាសរបស់ក្រសួងសុខាភិបាលបានកំណត់ថា សារព្រមានសុខភាពត្រូវផ្លាស់ប្ដូររៀងរាល់ ២ ឆ្នាំម្ដង ហើយអនុលោមតាមប្រកាសនេះក្រសួងសុខាភិបាលបានជូនដំណឹង និងផ្ដល់រូបភាពថ្មីកាលពីខែធ្នូឆ្នាំ ២០២០ ដល់ក្រុមហ៊ុនថ្នាំជក់ ដើម្បីធ្វើការផ្លាស់ប្តូរសារព្រមានសុខភាព។
អង្គការចលនាដើម្បីសុខភាពកម្ពុជា លើកឡើងនៅក្នុងសេចក្តីប្រកាសនាថ្ងៃទី ២០ កក្កដាថា តាមសេចក្តីប្រកាសនេះ គឺបានន័យថា ចាប់ពីថ្ងៃទី ១ ខែ សីហា ឆ្នាំ ២០២១ តទៅកញ្ចប់បារីទាំងអស់ ដែលចរាចរលើទីផ្សារត្រូវតែមានសារព្រមានថ្មីជារូបភាព និងជាអក្សរ ដែលបានកំណត់ដោយក្រសួងសុខាភិបាល។
អង្គការនេះបាននិយាយថា៖ «ប្រសិទ្ធភាពនៃសារព្រមានសុខភាព និងថយចុះដោយសារតែភាពស៊ាំនឹងរូបភាពដដែលៗក្នុងរយៈពេលវែង ហេតុនេះ ហើយបានជាក្រសួងសុខាភិបាលបានកំណត់ឱ្យមានការផ្លាស់ប្ដូរសារព្រមានជារូបភាពថ្មីរៀងរាល់ ២ ឆ្នាំម្ដង»។ អង្គការនេះបញ្ជាក់ថា ការខកខានការផ្លាស់ប្តូរសារព្រមានសុខភាពនឹងធ្វើឱ្យការប្តេជ្ញាចិត្តឈប់ជក់បារីរបស់ប្រជាពលរដ្ឋថយចុះ។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល មិនបានឆ្លើយតបទៅនឹងសារស្នើសុំអត្ថាធិប្បាយ ជុំវិញបញ្ហានេះទេ គិតមកដល់ត្រឹមម៉ោងចេញផ្សាយកាសែតកាលពីយប់មិញ។
បើតាមសេចក្តីប្រកាសរបស់អង្គការចលនាដើម្បីសុខភាព តាមការសិក្សាស្រាវជ្រាវវិទ្យាសាស្ត្រជាច្រើនបង្ហាញថាការដាក់សារព្រមានសុខភាពជារូបភាពលើកញ្ចប់ផលិតផលថ្នាំជក់ ជាវិធានការអប់រំដែលមានប្រសិទ្ធភាពខ្ពស់។
ជាក់ស្ដែង ការសិក្សានៅប្រទេសថៃឆ្នាំ ២០១៨ អំពីប្រសិទ្ធភាពនៃសារព្រមានសុខភាពជារូបភាពមានទំហំ ៨៥% នៃកញ្ចប់បារីបានបង្ហាញថា រូបភាពព្រមានសុខភាពធំមានប្រសិទ្ធភាពខ្ពស់ក្នុងការបង្កើនភាពភ័យខ្លាច និងបង្ការការផ្ដើមជក់បារីក្នុងចំណោមអ្នកមិនជក់បារី រីឯក្នុងចំណោមអ្នកជក់បារី រូបភាពព្រមានសុខភាពធំមានប្រសិទ្ធភាពធ្វើឱ្យមានការភ័យខ្លាច និងធ្វើឱ្យអ្នកជក់មានបំណងផ្ដាច់បារី។
ស្រដៀងនេះដែរ ការសិក្សាមួយរបស់ក្រសួងសុខាភិបាលអូស្ត្រាលីអំពីប្រសិទ្ធភាពនៃកញ្ចប់បារីលាតបានបង្ហាញថា កញ្ចប់បារីដែលដាក់សារព្រមានសុខភាពរូបភាព មិនមានការរចនាលំអរនានាលើកញ្ចប់បារី មានប្រសិទ្ធភាពធ្វើឱ្យអ្នកប្រើប្រាស់ថ្នាំជក់យល់ដឹងពីផលប៉ះពាល់នៃការជក់បារី ធ្វើឱ្យអ្នកជក់បារីចាប់ផ្ដើមព្រួយបារម្ភអំពីសុខភាពរបស់ខ្លួន និងធ្វើឱ្យអ្នកជក់បារីមានបំណងផ្ដាច់បារី ។
លោក មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជាប្រាប់ភ្នំពេញប៉ុស្តិ៍នៅថ្ងៃទី ២០ កក្កដាថា ការរឹតបន្តឹងការបោះពុម្ពសារព្រមានសុខភាពជារូបភាពលើកញ្ចប់បារី ឱ្យបានទៀងទាត់ជំរុញអ្នកជក់បារីឱ្យផ្ដាច់បារី និងបង្ការស្រី្ត យុវជន និងកុមារ កុំឱ្យចាប់ផ្ដើមជក់បារី។
លោកបន្តថា ការផ្ដាច់បារីរបស់ប្រជាពលរដ្ឋ រួមចំណែកជាមួយរដ្ឋាភិបាលក្នុងការទប់ស្កាត់ការរីករាលដាលនៃជំងឺកូវីដ ១៩ ពីព្រោះការជក់បារីបង្កើនឱកាសនៃការឆ្លងជំងឺនេះ ហើយប្រសិនបើអ្នកជក់ឆ្លងជំងឺនេះ គាត់នឹងប្រឈមគ្រោះថ្នាក់ធ្ងន់ធ្ងរជាងអ្នកមិនជក់។
លោកបញ្ជាក់ថា៖ «ការអនុវត្តសារព្រមាននេះ គឺមានសារៈសំខាន់ណាស់ ជាពិសេសក្នុងពេលបច្ចុប្បន្ននេះ ដែលយើងកំពុងប្រយុទ្ធប្រឆាំងជំងឺកូវីដ ១៩ ព្រោះការជក់បារីត្រូវបានទទួលស្គាល់ថា វាជាកត្តាប្រឈមជំរុញឱ្យមានជំងឺឆ្លងកូវីដ ១៩។ ចំពោះអ្នកជក់បារី ដែលឆ្លងជំងឺកូវីដ ១៩ ហើយគឺមានសភាពទ្រុឌទ្រោមផ្នែកសុខភាពធ្ងន់ធ្ងរជាងអ្នកមិនជក់បារីហើយបន្សល់ទុកផលវិបាកក្រោយការព្យាបាលច្រើនផងដែរ»។
លោក មុំ គង់ ជឿជាក់ថា ក្រុមហ៊ុនថ្នាំជក់ទាំងនេះនឹងអនុវត្តទៅតាមសេចក្តីណែនាំរបស់ក្រសួងឱ្យបានខ្ជាប់ខ្ជួន ព្រោះនៅពេលដែលពួកគេខកខានមិនអនុវត្តតាមការណែនាំនោះនឹងទទួលរងការពិន័យរហូតដល់ ៤ លានរៀល ហើយការពិន័យនេះនឹងទទួលរងទ្វេគុណបើពួកគេនៅតែបន្តល្មើស។
ថ្នាំជក់ជាផលិតផលដែលមានគ្រោះថ្នាក់ដល់សុខភាព ដោយហេតុថា ពាក់កណ្ដាលនៃអ្នកប្រើប្រាស់ថ្នាំជក់ ធ្លាក់ខ្លួនឈឺ ពិការ និងស្លាប់មុនអាយុកំណត់ ក្នុងនោះប្រជាពលរដ្ឋកម្ពុជាប្រមាណ ១៥ ០០០ នាក់បានស្លាប់ជារៀងរាល់ឆ្នាំ ដោយសារជំងឺដែលបង្កពីការប្រើប្រាស់ថ្នាំជក់។
ចំណែកថវិកាប្រមាណ ១,៤ ទ្រីលានដុល្លារ ត្រូវបានខាតបង់ដោយសារការប្រើប្រាស់ថ្នាំជក់។ នេះបើយោងតាម WHO FCTC Investment Case for Cambodia, ២០១៩៕
វីដេអូ៖