សៀមរាបៈ អាជ្ញាធរក្នុងខេត្តសៀមរាបបានសម្រេចផ្តល់ដីគោលនយោបាយទំហំ ២០ គុណ ៣០ ម៉ែត្ រដល់ពលរដ្ឋ ២១ គ្រួសារ នៅក្នុងតំបន់អភិវឌ្ឍន៍រុនតាឯក ស្ថិតនៅស្រុកបន្ទាយស្រីនៃតំបន់អង្គរ ជាមួយនឹងការព្រមានចាត់វិធានការផ្លូវច្បាប់ បើពលរដ្ឋទាំងនេះនៅតែបន្តតវ៉ា។
សេចក្តីជូនដំណឹងរបស់រដ្ឋបាលខេត្តសៀមរាប ចុះថ្ងៃទី ១៩ ខែកក្កដា ឱ្យដឹងថា គណៈកម្មការចម្រុះសម្របសម្រួលការប្រើប្រាស់ដីធ្លី ការទប់ស្កាត់សំណង់ខុសច្បាប់នឹងរៀបចំសណ្តាប់ធ្នាប់នៅតំបន់រមណីយដ្ឋានអង្គរដឹកនាំដោយរដ្ឋបាលខេត្តសៀមរាប និងអាជ្ញាធរជាតិអប្សរាបានសម្រេចបញ្ឈប់ការដោះស្រាយបណ្តឹងរបស់ប្រជាពលរដ្ឋចំនួន ២១ គ្រួសារ ស្ថិតនៅភូមិតានី ឃុំរុនតាឯក ស្រុកបន្ទាយស្រី ខេត្តសៀមរាប។
សេចក្តីជូនដំណឹងបន្តថា ជាមួយគ្នានេះដែរ អាជ្ញាធរបានសម្រេចផ្តល់ដីដល់ពួកគាត់ទាំង ២១ គ្រួសារ សម្រាប់ការរស់នៅ។ សេចក្តីជូនដំណឹងបន្តថា៖ «ដោយផ្តល់ដីដោះស្រាយគោលនយោបាយ ទំហំ ២០ ម៉ែត្រ x ៣០ ម៉ែត្រក្នុងមួយគ្រួសារ ស្ថិតនៅតំបន់អភិវឌ្ឍន៍ភូមិធម្មជាតិរុនតាឯក ដល់ប្រជាពលរដ្ឋចំនួន ២១ គ្រួសារ ដែលបានប្តឹងស្នើសុំដីដែលគ្រប់គ្រងដោយអាជ្ញាធរជាតិអប្សរាកន្លងមក ស្ថិតនៅតំបន់អភិវឌ្ឍន៍ភូមិធម្មជាតិរុនតាឯក»។
តាមរយៈសេចក្តីជូនដំណឹង រដ្ឋបាលខេត្តសៀមរាប និងអាជ្ញាធរជាតិអប្សរា បានសម្រេចទុករយៈពេល ១៥ ថ្ងៃ ដល់ពលរដ្ឋទាំង ២១ គ្រួសារឱ្យមកទទួលយក និងចាប់ឆ្នោតយកដីឡូតិ៍ ដែលរដ្ឋបាលខេត្តសៀមរាបនឹងអាជ្ញាធរជាតិអប្សរាបានរៀបចំរួចនៅតំបន់អភិវឌ្ឍន៍ភូមិធម្មជាតិរុនតាឯក។ «ផុតរយៈពេល ១៥ ថ្ងៃក្នុងករណីប្រជាពលរដ្ឋទាំង ២១ គ្រួសារ ដែលមិនព្រមទទួលយកការដោះស្រាយគោលនយោបាយនេះរដ្ឋបាលខេត្តសៀមរាប និងអាជ្ញាធរជាតិអប្សរានឹងបញ្ចប់ការដោះស្រាយជាស្ថាពរ ព្រមទាំងចាត់វិធានការតាមផ្លូវច្បាប់ជាធរមាន ចំពោះបងប្អូនប្រជាពលរដ្ឋណាដែលនៅបន្តតវ៉ាទាមទារតទៅទៀត»។
អ្នកនាំពាក្យអាជ្ញាធរជាតិអប្សរាលោក ឡុង កុសល ថ្លែងថា៖ «កន្លងមកពួកគាត់បានរំលោភបំពាន គឺយើងបានណែនាំគាត់ច្រើនដងមកហើយ ហើយក៏ធ្លាប់បានបដិសេធនូវសំណើរបស់ពួកគាត់ដែរ អ៊ីចឹងយើងមិនអាចអង្គុយដោះស្រាយបញ្ហានូវអ្វីដែលមិនស្របច្បាប់ទេ អ៊ីចឹងបានចេញជាសេចក្តីសម្រេចនេះ»។
នាយករដ្ឋបាលសាលាខេត្តសៀមរាបលោក សុខ ថុល ថ្លែងថាជាក់ស្តែងពលរដ្ឋដែលរងគ្រោះ និងអាស្រ័យផលនៅទីនោះខាងអាជ្ញាធរបានដោះស្រាយបញ្ចប់រួចអស់ហើយ នៅឡើយតែ ២១ គ្រួសារនេះ។ ពួកគាត់ពុំមានឯកសារកាន់កាប់ស្របច្បាប់ឡើយ។
លោកថា៖ «នៅពេលយើងអនុវត្តគោលនយោបាយនាពេលនោះ ប្រជាជនដែលរស់នៅអាស្រ័យផលនៅទីតាំងភូមិធម្មជាតិរុនតាឯក គាត់បានដាក់សំណើដោះស្រាយគោលនយោបាយហើយគណៈកម្មការអន្តរក្រសួងគេដោះស្រាយអស់ហើយ»។
លោកបញ្ជាក់ថា៖ «ក្រោយមកប៉ុន្មាន ២១ គ្រួសារ ដែលចេញមកតវ៉ា គឺអត់មានដីនៅទីនោះ ឬអាស្រ័យផលអីទេ ហើយយើងព្យាយាមដោះស្រាយមកអស់ហើយ ព្រោះគាត់អត់មានឯកសារអីច្បាស់លាស់ទេ។ ទាក់ទងការកាន់កាប់ដី ដែលគាត់អំណេះអំណាងថា អាស្រ័យផលនៅទីនោះ ហើយសួរខាងមូលដ្ឋានគឺអត់មានឯកសារកាន់កាប់ដែរ អ៊ីចឹងហើយគាត់តែងតវ៉ា»។
លោកបន្តថា ដើម្បីបញ្ចប់នូវរាល់បញ្ហា អាជ្ញាធរខេត្ត និងអាជ្ញាធរជាតិអប្សរា គឺផ្តល់ឱ្យដីគាត់ ២០ គុណ ៣០ ម៉ែត្រក្នុង ១ គ្រួសារ។ «តាមពិតយើងអត់ត្រូវដោះស្រាយឱ្យពួកគាត់ទេ ព្រោះពួកគាត់អត់មានឯកសារគ្រប់គ្រាន់ទាក់ទងការកាន់កាប់ដីនោះទេ ទោះបីជាមានក៏ដោយដីនោះជាដីគម្របព្រៃឈើដែរ អត់មានអ្នកណាអាចគ្រប់គ្រង ឬចាត់ចែងបានទេ»។
ភ្នំពេញប៉ុស្តិ៍មិនទាន់អាចសុំការអត្ថាធិប្បាយពីពលរដ្ឋ ២១ គ្រួសារបានទេ។
សូមជម្រាបថា រាជរដ្ឋាភិបាលកម្ពុជាកាលពីឆ្នាំ ២០០៤ បានចេញអនុក្រឹត្យ ស្តីពីការបង្កើតតំបន់អភិវឌ្ឍន៍រុនតាឯក។ ក្នុងអនុក្រឹត្យនេះបានអនុញ្ញាតឱ្យអាជ្ញាធរជាតិអប្សរាជាអ្នកទទួលបន្ទុករៀបចំប្លង់អភិវឌ្ឍន៍តំបន់នេះ ដើម្បីបង្កលក្ខណៈងាយស្រួល ជូនដល់ប្រជាពលរដ្ឋ ដែលត្រូវចេញពីតំបន់អង្គរទៅរស់នៅក្នុងតំបន់នោះ អាចរស់នៅបានយ៉ាងសមរម្យ និងមានការអភិវឌ្ឍ។
រដ្ឋបាលខេត្តសៀមរាប និងអាជ្ញាធរជាតិអប្សរា សង្ឃឹមថា ប្រជាពលរដ្ឋទាំង ២១ គ្រួសារ នឹងទទួលយកការដោះស្រាយគោលនយោបាយដីឡូត៍ នេះដើម្បីបញ្ចប់ការតវ៉ាដោយស្មារតីទទួលខុសត្រូវខ្ពស់៕
វីដេអូ៖