.jpg)
សកម្មភាពត្រួតពិនិត្យការធ្វើចរាចរណ៍របស់សមត្ថកិច្ចនៅថ្ងៃទី ២១ កក្កដា ឆ្នាំនេះ។ ហេង ជីវ័ន
ភ្នំពេញៈ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានបញ្ជាក់ថា វិធានការច្បាប់ក្នុងការដកពិន្ទុលើបណ្ណបើកបរចំពោះអ្នកល្មើសច្បាប់ចរាចរណ៍នឹងដាក់ឱ្យអនុវត្តជាផ្លូវការនៅខែមករា ឆ្នាំ ២០២២ ខណៈលោកក្រើនរំឭកពលរដ្ឋឱ្យចូលរួមគោរពច្បាប់ចរាចរណ៍ទាំងអស់គ្នា ដើម្បីជាប្រយោជន៍រួម។
នៅក្នុងពិធីបើកឱ្យដំណើរការជាផ្លូវការនូវមណ្ឌលផ្តល់សេវាសាធារណៈទី៥ របស់ក្រសួងសាធារណការនិងដឹកជញ្ជូននៅផ្សារទំនើប ហេរីថេក វ៉ក ខេត្តសៀមរាប កាលពីថ្ងៃទី ២១ ខែកក្កដា លោក ស៊ុន ចានថុល រដ្ឋមន្ត្រីក្រសួងសាធារណការនិងដឹកជញ្ជូនបានថ្លែងថា នៅថ្ងៃនេះលោកនឹងរាយការណ៍ជូនរដ្ឋមន្ត្រីក្រសួងមហាផ្ទៃលោក ស ខេង ដើម្បីពិនិត្យ App ថ្មី ដែលជាកម្មវិធីសម្រាប់ដកពិន្ទុបណ្ណបើកបរ។
លោកបានថ្លែងថា៖ «ស្អែកនេះ (ថ្ងៃទី ២២) ខ្ញុំនឹងរាយការណ៍ជូនទៅសម្តេចក្រឡាហោម ស ខេង ឧបនាយករដ្ឋមន្ត្រីនិងជារដ្ឋមន្ត្រីក្រសួងមហាផ្ទៃនិងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកអំពីការដកពិន្ទុអ្នករំលោភច្បាប់ចរាចរណ៍ត្រូវផាកពិន័យហើយត្រូវដកពិន្ទុទៀត»។ «យើងទាំងអស់គ្នាពេលមានបណ្ណបើកបរគេឱ្យ ១២ ពិន្ទុ ប៉ុន្តែបើយើងបើកបរលើសល្បឿនកំណត់គេដកប៉ុន្មានពិន្ទុទៅអ្នកបើកបរអត់ពាក់ខ្សែក្រវាត់គេផាកពិន័យហើយគេដកពិន្ទុទៀត ដូច្នេះក្រសួងសាធារណការ និងដឹកជញ្ជូន រួមជាមួយអគ្គស្នងការដ្ឋាននគរបាលជាតិសហការគ្នាបានល្អណាស់ បានធ្វើ App មួយល្អឥតខ្ចោះនេះ»។
លោកបានគូសបញ្ជាក់ថា ប្រសិនបើរដ្ឋមន្ត្រីក្រសួងមហាផ្ទៃលោក ស ខេង ពិនិត្យ និងឯកភាពលើ App នោះ ក្រសួងសាធារណការនឹងចាប់ផ្តើមអនុវត្តនាដើមឆ្នាំ២០២២ខាងមុខនេះ។លោកថា៖ «បើសម្តេច ស ខេង ឯកភាពហើយ យើងបញ្ចប់ Appហើយ យើងចាប់ផ្តើមផ្សព្វផ្សាយអំពីការប្រើប្រាស់និងបង្រៀនដល់មន្ត្រីនគរបាលហើយថ្ងៃទី ១ ខែ មករា ឆ្នាំ ២០២២ យើងនឹងការអនុវត្តការដកពិន្ទុហើយ អ៊ីចឹងសូមប្រុងប្រយ័ត្ន កុំរំលោភច្បាប់»។
លោក ស៊ុន ចាន់ថុល បានពន្យល់ពីមូលហេតុដែលនាំឱ្យមានការដកពិន្ទុលើបណ្ណបើកបរយ៉ាងដូច្នេះថា៖«ហេតុដូចម្តេចបានជាយើងមានការដកពិន្ទុ ស្រុកណាក៏មានដកពិន្ទុដែរ ដើម្បីឱ្យអ្នកបើកបរនេះ ចេះគោរពច្បាប់ ដើម្បីកាត់បន្ថយគ្រោះថ្នាក់ចរាចរណ៍ ព្រោះ ១ ឆ្នាំៗ យើងខាត ៣៥០ លានដុល្លារ ដោយសារមានគ្រោះថ្នាក់ចរាចរណ៍ ប្រជាពលរដ្ឋស្លាប់ ខូចខាតទ្រព្យសម្បត្តិរដ្ឋ សម្បត្តិឯកជន បង់ថ្លៃពេទ្យ អត់បានធ្វើការបូកសរុបទៅ យើងខាត ៣៥០ លានដុល្លារ ក្នុង ១ ឆ្នាំ អ៊ីចឹងយើងមិនចង់បានអីទេពីបងប្អូនប្រជាពលរដ្ឋសូមឱ្យចូលរួមគោរពច្បាប់ទាំងអស់គ្នា»។
លោកស្រី លឹម សុខជា ទីប្រឹក្សាជាន់ខ្ពស់អង្គការសម្ព័ន្ធដើម្បីសុវត្ថិភាពចរាចរណ៍ផ្លូវគោក (CRY) បានថ្លែងថា ការដាក់ឱ្យដំណើរការកម្មវិធីដកពិន្ទុបណ្ណបើកបរនឹងរួមចំណែកដល់ការកាត់បន្ថយគ្រោះថ្នាក់ចរាចរណ៍និងជួយពង្រឹងស្មារតីដល់អ្នកបើកបរនៅតាមដងផ្លូវសាធារណៈ។
លោកស្រីបានបញ្ជាក់ថា៖ «ប្រសិនបើឈានដល់ការអនុវត្តនៅដើមឆ្នាំ ២០២២ វាជាផ្នែកមួយជំរុញឱ្យមានសុវត្ថិភាពអ្នកបើកបរ ព្រោះអ្នកបើកបរនឹងចាប់ផ្តើមយកចិត្តទុកដាក់ក្នុងការបើកបរដោយប្រយ័ត្នប្រយែង បើគាត់មានកំហុសគាត់នឹងប្រឈមការដកពិន្ទុ ឬអស់ពិន្ទុ ហើយគាត់ត្រូវចំណាយពេលច្រើន ដើម្បីរៀនសូត្រឡើងវិញ ហើយអ្នកខ្លះនឹងអាចអស់ពិន្ទុដោយស្វ័យប្រវត្តិអ្នកដែលមានកំហុសធំដុំ»។
លោកស្រីបន្តថា នៅពេលច្បាប់នេះចូលជាធរមានដាក់ឱ្យប្រើប្រាស់ជាផ្លូវការ នឹងជួយដាស់ស្មារតីដល់អ្នកបើកបរឱ្យមានការប្រុងប្រយ័ត្នខ្ពស់ ខណៈពលរដ្ឋមួយចំនួននាពេលបច្ចុប្បន្ន ខ្វះការប្រុងប្រយ័ត្នទៅលើការបើកបរ។
លោកស្រីថា៖ «នៅបណ្តាប្រទេសប្រទេសអាស៊ាន យើងឃើញថាកិច្ចការនេះគេអនុវត្តរួចហើយ ចំណែកប្រជាពលរដ្ឋយើងភាគច្រើនអត់សូវយកចិត្តទុកដាក់លើរឿងនេះទេ ភាគច្រើននៅលើដងផ្លូវ នៅពេលយើងមានគ្រោះថ្នាក់ យើងអត់សូវបានឆែករកបណ្ណបើកបរគាត់ ដូច្នេះបើគេអនុវត្តដកពិន្ទុបណ្ណបើកបរ នោះគាត់នឹងបារម្ភ ហើយប្រុងប្រយ័ត្នជាងមុន»។
ក្រសួងសាធារណការ បានឱ្យដឹងថា ផ្អែកតាមច្បាប់ស្តីពីចរាចរណ៍ផ្លូវគោកបានកំណត់ឱ្យគ្រប់បណ្ណបើកបរត្រូវមាន ពិន្ទុសរុប១២ពិន្ទុ ហើយចំនួនពិន្ទុនេះ ត្រូវកាត់បន្ថយទៅតាមស្ថាននៃការប្រព្រឹត្តបទល្មើសចរាចរណ៍ ចាប់ពី ១ ពិន្ទុ ដល់ ៦ ពិន្ទុ ហើយក្នុងករណីអស់ពិន្ទុ គឺបណ្ណបើកបរត្រូវទុកជាមោឃៈ។ ក្នុងករណី អ្នកបើកបរចង់បានបណ្ណបើកបរថ្មី គឺត្រូវរៀន និងប្រឡងយកបណ្ណបើកបរឡើងវិញក្នុងរយៈពេលយ៉ាងតិច ៦ ខែ គិតចាប់ពីថ្ងៃដែលបណ្ណបើកបរត្រូវទុកជាមោឃៈ៕
