ភ្នំពេញៈ លោកនាយករដ្ឋមន្ត្រី ហ៊ុន សែន នឹងអញ្ជើញទៅទទួលវ៉ាក់សាំងបង្ការជំងឺកូវីដ ១៩ ចំនួន ១ លានដូស ដែលជាជំនួយរបស់រដ្ឋាភិបាល និងប្រជាជនជប៉ុនហើយនឹងត្រូវដឹកមកដល់កម្ពុជានៅថ្ងៃទី ២៣ កក្កដាខាងមុខនេះ។ នេះបើតាមនាយកដ្ឋានព័ត៌មានក្រសួងការពារជាតិពីម្សិលមិញ។
ក្រសួងការពារជាតិបានបញ្ជាក់ថាការអញ្ជើញទទួលវ៉ាក់សាំងនៅព្រលានយន្តហោះអន្តរជាតិភ្នំពេញរបស់លោកនាយករដ្ឋមន្ត្រី ហ៊ុន សែន នាពេលខាងមុខនេះ គឺជាការអញ្ជើញទទួលវ៉ាក់សាំងប្រទេសជាមិត្តលើកទី២ ហើយ។ ការចេញទៅទទួលវ៉ាក់សាំងផ្ទាល់លើកទី១ គឺនៅថ្ងៃទី ៧ ខែកុម្ភៈ ដែលជាជំនួយរបស់រដ្ឋាភិបាល និងប្រជាជនចិនចំនួន ៦០ ម៉ឺនដូស។
កាលពីសប្តាហ៍មុន លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំព្រះរាជាណាចក្រកម្ពុជាបានឱ្យដឹងថា រដ្ឋាភិបាលជប៉ុនបានប្រកាសផ្ដល់ជំនួយវ៉ាក់សាំង AstraZeneca ប្រមាណ ១ លានដូសដល់កម្ពុជា។ ជំនួយនេះធ្វើឡើងស្របតាមចំណងមិត្តភាពរវាងជប៉ុន និងកម្ពុជា ដោយផ្អែកលើស្ថានភាពជំងឺកូវីដ ១៩ នៅកម្ពុជានាពេលបច្ចុប្បន្ន។
លោកបញ្ជាក់ថា៖ «ខ្ញុំសង្ឃឹមថា ជំនួយនេះនឹងជួយគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងកូវីដ ១៩ ក៏ដូចជាកាត់បន្ថយការព្រួយបារម្ភមួយចំនួនរបស់ប្រជាជនកម្ពុជា»។
លោក មិកាមិ ម៉ាសាហ៊ីរ៉ូ បានបន្ត ថាការប្រឈមមុខនឹងការរីករាលដាលនៃមេរោគឆ្លងថ្មីដែលពិភពលោកកំពុងជួបប្រទះនេះ ការចាក់វ៉ាក់សាំង និងការពង្រឹងប្រព័ន្ធសុខាភិបាល គឺជាកត្តាសំខាន់សម្រាប់រាជរដ្ឋាភិបាល និងប្រជាជនកម្ពុជា។
មកទល់ពេលនេះ រដ្ឋាភិបាលជប៉ុនបានផ្ដល់ជំនួយសរុបប្រមាណច្រើនជាង ៥០ លានដុល្លារអាមេរិកដល់កម្ពុជា រួមមានការផ្ដល់បរិក្ខារពេទ្យ ការកែលម្អមន្ទីរពេទ្យ ការគាំទ្រដល់គម្រោងរបស់អង្គការអន្តរជាតិនានាសម្រាប់វិធានការទប់ស្កាត់ការចម្លងជំងឺតាមព្រំដែន ក៏ដូចជាការផ្ដល់បរិក្ខារសម្រាប់ដឹកជញ្ជូន និងរក្សាទុកវ៉ាក់សាំងឱ្យបានត្រឹមត្រូវផងដែរ។ រដ្ឋាភិបាលជប៉ុន ក៏បានផ្ដល់ជាកម្ចីប្រមាណ ២២៧ លានដុល្លារអាមេរិក ដែលត្រូវបានប្រើប្រាស់ក្នុងកម្មវិធីឧបត្ថម្ភសាច់ប្រាក់ដល់ប្រជាជន ដែលរងផលប៉ះពាល់ដោយសារកូវីដ ១៩ និងសម្រាប់ការពង្រឹងប្រព័ន្ធសុខាភិបាល។
ដោយឡែកកាលពីថ្ងៃទី ២០ កក្កដា ជាការចាប់ផ្តើមយុទ្ធនាការចាក់វ៉ាក់សាំងការពារជំងឺកូវីដ ១៩ ដូសទី ១ ជូនដល់ជនបរទេសទាំងអស់ដែលកំពុងស្នាក់នៅ និងកំពុងបំពេញការងារក្នុងខេត្តសៀមរាប ដែលប្រព្រឹត្តទៅក្នុងបរិវេណមន្ទីរពេទ្យបង្អែកខេត្តសៀមរាប។
លោក លីវ សុខុន អ្នកនាំពាក្យ និងជាប្រធានមន្ទីរព័ត៌មានខេត្តសៀមរាប ប្រាប់ភ្នំពេញប៉ុស្តិ៍នៅថ្ងៃទី ២១ ខែកក្កដា ថា គិតត្រឹមថ្ងៃទី ១ នៃការចាក់វ៉ាក់សាំងជូនជនជាតិបរទេស ក្រុមការងារបានចាក់វ៉ាក់សាំងជូនជនបរទេស បានជាង ៧០០ នាក់។
លោកប្រាប់ថា៖ «តាមការឱ្យដឹងពីលោកឱសថការី លីម ហេង អនុប្រធានមន្ទីរពេទ្យបង្អែកខេត្តសៀមរាប និងជាប្រធានមណ្ឌលចាក់វ៉ាក់សាំងមន្ទីរពេទ្យបង្អែកខេត្តសៀមរាបក្នុងពេល ១ ថ្ងៃ ជនបរទេសចំនួន ៧៤៥ នាក់ (ស្រី ២៨៧ នាក់) បានទទួលការចាក់វ៉ាក់សាំងដោយឥតគិតថ្លៃ»។
លោក លីវ សុខុន បញ្ជាក់ថា ការចាក់វ៉ាក់សាំងជូនជនបរទេស គ្រោងបញ្ចប់តាមផែនការរបស់រដ្ឋបាលខេត្តសៀមរាប គឺនៅត្រឹមថ្ងៃទី ២៣ ខែកក្កដា ហើយជនបរទេសដែលបានចុះឈ្មោះចាក់វ៉ាក់សាំងនេះមានចំនួនដល់ ២ ១២០ នាក់។
គិតត្រឹមយប់ថ្ងៃទី ២០ កក្កដា ប្រជាពលរដ្ឋជាង ៦,២ លាននាក់នៅទូទាំងប្រទេសបានចាក់វ៉ាក់សាំងបង្ការវីរុសកូវីដ ១៩ ដែលស្មើនឹងជាង ៦២% ធៀបនឹងគោលដៅចាក់ ១០ លាននាក់ ដែលគ្រោងបញ្ចប់ក្នុងខែតុលា ឬដើមខែវិច្ឆិកា ឆ្នាំ ២០២១ នេះ។
ជាមួយគ្នានេះ លោកស្រី យក់ សម្បត្តិ រដ្ឋលេខាធិការក្រសួងសុខាភិបាល បានឱ្យដឹងថា វ៉ាក់សាំងស៊ីណូហ្វាមចំនួន ១ លានដូសនឹងត្រូវដឹកមកដល់កម្ពុជានៅព្រឹកថ្ងៃទី ២២ ខែកក្កដា នេះ ដែលរាជរដ្ឋាភិបាលកម្ពុជាបានបញ្ជាទិញបន្ថែម។ សរុបក្នុងខែកក្កដានេះ វ៉ាក់សាំងដែលបានដឹកមកកម្ពុជាមានចំនួន ៦ លានដូស។
គិតមកដល់ពេលនេះ កម្ពុជាទទួលបានវ៉ាក់សាំងសរុបជាង ១៦ លានដូស ហើយភាគច្រើនជាវ៉ាក់សាំងចិនដែលជាការបញ្ជាទិញនិងការផ្តល់ជាជំនួយរបស់ភាគីចិន។ ក្នុងនោះមានវ៉ាក់សាំងស៊ីណូហ្វាមចំនួន ៥,២ លានដូស វ៉ាក់សាំងស៊ីណូវ៉ាក់ចំនួន ១០,៥ លានដូស និងវ៉ាក់សាំងកូវីសែល (COVISHIELD) ចំនួន ៣២៤ ០០០ ដូសរបស់ក្រុមហ៊ុន AstraZeneca។
គួរបញ្ជាក់ថា ក្នុងខែសីហាខាងមុខនេះ វ៉ាក់សាំង ៤ លានដូសទៀតនឹងដឹកមកពីសាធារណរដ្ឋប្រជាមានិតចិនផងដែរសម្រាប់ចាក់ជូនប្រជាពលរដ្ឋកម្ពុជា ឱ្យបាន ១០ លាននាក់តាមផែនការដែលបានកំណត់៕