ភ្នំពេញៈ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាបរធនបាលនៃ “មូលនិធិគន្ធបុប្ផាកម្ពុជា” លោក អូន ព័ន្ធមុនីរ័ត្ន ជំរុញឱ្យគ្រប់មជ្ឈដ្ឋានបន្តរួមចំណែកទ្រទ្រង់និរន្តរភាពរបស់មន្ទីរពេទ្យគន្ធបុប្ផាក្នុងការព្យាបាលជូនកុមារដោយឥតគិតថ្លៃ ក្នុងស្មារតី “ខ្មែរជួយខ្មែរ” ដើម្បីចូលរួមកសាង និងអភិវឌ្ឍទំពាំងស្នងឫស្សីរបស់ប្រទេសជាតិ។
ក្នុងកិច្ចប្រជុំក្រុមប្រឹក្សាបរធនបាលនៃ “មូលនិធិគន្ធបុប្ផាកម្ពុជា” តាមរយៈបណ្ដាញអនឡាញនៅថ្ងៃទី ២០ ខែកក្កដា លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាបរធនបាលនៃ “មូលនិធិគន្ធបុប្ផាកម្ពុជា” បានវាយតម្លៃខ្ពស់លើការខិតខំប្រឹងប្រែងបំពេញការងារពិនិត្យ និងព្យាបាលជំងឺរបស់មន្ទីរពេទ្យគន្ធបុប្ផាជូនកុមារដ៏ច្រើន និងបានលើកទឹកចិត្តឱ្យបន្តខិតខំបំពេញការងារដ៏មានសារៈសំខាន់នេះថែមទៀត ដើម្បីចូលរួមកសាង និងអភិវឌ្ឍទំពាំងស្នងឫស្សីរបស់ប្រទេសជាតិ។
លោកក៏បានវាយតម្លៃខ្ពស់លើការខិតខំប្រឹងប្រែង បំពេញការងារកៀរគរការបរិច្ចាគថវិកានាពេលកន្លងមក ខណៈលោកបានណែនាំឱ្យលេខាធិការដ្ឋាន ខិតខំបន្ថែមទៀតក្នុងការផ្សព្វផ្សាយដល់សាធារណជនឱ្យបានយល់ដឹងអំពីវត្តមាន និងសារៈសំខាន់របស់ “មូលនិធិគន្ធបុប្ផាកម្ពុជា” ក្នុងគោលដៅកៀរគរវិភាគទានសប្បុរសធម៌បន្ថែមទៀតពីគ្រប់មជ្ឈដ្ឋាននានាដើម្បីបន្តរួមចំណែកទ្រទ្រង់ប្រតិបត្តិការ និងនិរន្តរភាពរបស់មន្ទីរពេទ្យគន្ធបុប្ផា និងលើកស្ទួយស្មារតី “ខ្មែរជួយខ្មែរ” ឱ្យបានកាន់តែទូលំទូលាយ។
សេចក្តីប្រកាសព័ត៌មានស្តីពីលទ្ធផលកិច្ចប្រជុំក្រុមប្រឹក្សាបរធនបាលនៃមូលនិធិគន្ធបុប្ផាកម្ពុជា ចុះថ្ងៃទី ២០ ខែកក្កដា បានឱ្យដឹងថា គិតត្រឹមឆមាសទី ១ ឆ្នាំ ២០២១“ មូលនិធិគន្ធបុប្ផាកម្ពុជា” បានទទួលថវិកាបរិច្ចាគសរុបចំនួនប្រមាណ ១៥,៧ លានដុល្លារអាមេរិក គឺកើនឡើងប្រមាណ ៩,៧០ ភាគរយបើធៀបទៅនឹងរយៈពេល ៦ ខែដំបូងក្នុងឆ្នាំ ២០២០។
ទន្ទឹមនេះ ត្រឹមរយៈពេល ៦ ខែដំបូងនៃឆ្នាំ ២០២១ នេះ “មូលនិធិគន្ធបុប្ផាកម្ពុជា” ក៏បានផ្ទេរថវិកាជូនមន្ទីរពេទ្យជាបន្តបន្ទាប់ ដែលមានចំនួនសរុបប្រមាណជាង ៤ លានដុល្លារអាមេរិក។ សេចក្តីប្រកាសបន្តថា ជាមួយគ្នានេះ ថវិកាដែលមិនទាន់យកទៅប្រើប្រាស់ក៏ត្រូវបានវិនិយោគជាការដាក់ប្រាក់បញ្ញើ មានកាលកំណត់ នៅធនាគារពាណិជ្ជដែលការប្រាក់ដែលទទួលបានត្រូវបានចាត់ទុកថា ជាចំណូលបន្ថែមរបស់មូលនិធិគន្ធបុប្ផាកម្ពុជាផងដែរ។
សេចក្តីប្រកាសដដែលបន្តថា ដោយសារការរីករាលដាលនៃជំងឺកូវីដលេខាធិការដ្ឋានមូលនិធិគន្ធបុប្ផាកម្ពុជាបាន និងបន្តផ្តោតសំខាន់លើការអនុវត្តសកម្មភាពបំផុសចលនាកៀរគរការបរិច្ចាគតាមរយៈប្រព័ន្ធអនឡាញក្នុងគោលបំណងប្រមូលវិភាគទានសប្បុរសធម៌ ក៏ដូចផ្សព្វផ្សាយជាសាធារណៈអំពីមូលនិធិដោយមានសកម្មភាពចម្បងៗ។
បន្ថែមលើវឌ្ឍនភាព និងទិសដៅការងាររបស់មូលនិធិគន្ធបុប្ផាកម្ពុជា ក្រុមប្រឹក្សាបរធនបាលក៏បានទទួលនូវរបាយការណ៍អំពីស្ថានភាពមន្ទីរពេទ្យគន្ធបុប្ផាទាំង ៥ ទីតាំងសម្រាប់រយៈពេល ៦ ខែដើមឆ្នាំ ២០២១ នេះ ដែលក្នុងនោះមន្ទីរពេទ្យបានទទួលព្យាបាលអ្នកជំងឺជាង ២២៦ ១៩៤ នាក់ ដែលករណីជំងឺធ្ងន់មានចំនួន ៤៥ ០៧៥ នាក់ និង ទទួលការវះកាត់ចំនួន ១០ ១៩០ នាក់។
សម្រាប់ផ្នែកសម្ភព មន្ទីរពេទ្យគន្ធបុប្ផាសៀមរាប ឬមន្ទីរពេទ្យជ័យវរ្ម័នទី៧ បានទទួលពិនិត្យ និងព្យាបាលស្ត្រីមានផ្ទៃពោះចំនួន ៤១ ៨៥៥ នាក់ និងបានទទួលសម្រាលកូនចំនួន ១០ ៣២៣ នាក់។ ជាមួយគ្នានេះដែរ ដើម្បីចូលរួមទប់ស្កាត់ការរីករាលដាលនៃជំងឺកូវីដ ១៩ មន្ទីរពេទ្យ បានរៀបចំសម្រួលហេដ្ឋារចនាសម្ព័ន្ធ បុគ្គលិក និងក្រុមការងារក្នុងការព្យាបាលអ្នកជំងឺដែលរកឃើញមេរោគកូវីដ ១៩ នៅអគារដាច់ដោយឡែកពីអគារពិនិត្យ និងព្យាបាលជំងឺទូទៅរបស់មន្ទីរពេទ្យ ទាំងនៅភ្នំពេញ និងនៅសៀមរាបផងដែរ។
មូលនិធិគន្ធបុប្ផាកម្ពុជា ក៏បានអំពាវនាវ និងលើកទឹកចិត្តដល់សប្បុរសជនទាំងក្នុង និងក្រៅប្រទេស សូមឱ្យបន្តចូលរួមបរិច្ចាគជាសមាជិកដែលរួមមាន ១ សមាជិកកិត្តិយស គឺបរិច្ចាគចាប់ពី ៥ ពាន់ដុល្លារអាមេរិកឡើងទៅក្នុង ១ ឆ្នាំ ឬសមាជិកគាំទ្រ បរិច្ចាគចាប់ពី ៥ ០០០ រៀលឡើងទៅ ក្នុង ១ ខែ គឺស្មើនឹង ៦ ម៉ឺនរៀលក្នុង ១ ឆ្នាំដើម្បីបង្ហាញពីសាមគ្គីភាពក្នុងស្មារតី «ខ្មែរជួយខ្មែរ»៕
វីដេអូ៖