.jpg)
លោក ប៉ោ ភក្តិ ថ្លែងទៅកាន់វគ្គបណ្តុះបណ្តាលតាមប្រព័ន្ធអនឡាញពីថ្ងៃទី ២០ កក្កដា។ រូបថត ក្រសួងមហាផ្ទៃ
ភ្នំពេញៈ មន្ត្រីអនុវត្តច្បាប់របស់កម្ពុជាជាច្រើនរូបបានទទួលវគ្គបណ្តុះបណ្តាលលើគម្រោងថ្មី ហៅថា In-Country Training Programme (ICTP) ដោយក្តោបវិសាលភាពក្នុងប្រទេសមួយចំនួន នៅក្នុងតំបន់អាស៊ីពាក់ព័ន្ធនឹងការប្រើប្រាស់អាវុធធុនតូច និងធុនស្រាល។
វគ្គបណ្តុះបណ្តាល ដែលមានឈ្មោះថា ការបញ្ជ្រាបយេនឌ័រលើការគ្រប់គ្រងអាវុធធុនតូចត្រូវបានធ្វើឡើងតាមប្រព័ន្ធអនឡាញ និងមានរយៈពេល ៤ ថ្ងៃ គឺថ្ងៃទី ៨, ៩, ១៩ និងទី ២០ ក្នុងខែកក្កដា ឆ្នាំ ២០២១។
វគ្គបណ្តុះបណ្តាលនេះ ត្រូវបានរៀបចំឡើងក្រោមការសម្របសម្រួលពីអង្គការ United Nations Regional Centre for Peace និង Disarmament in Asia and the Pacific (UNRCPD) និងស្ថិតក្រោមការគាំទ្រហិរញ្ញវត្ថុពីសហភាពអឺរ៉ុប EU។
ក្រសួងមហាផ្ទៃបញ្ជាក់ថា៖ «ចំពោះសមាសភាពចូលរួមយើងមានមន្ត្រីអនុវត្តច្បាប់ និងថ្នាក់ដឹកនាំជាស្ត្រីមកពីបណ្តាអង្គភាពពាក់ព័ន្ធ ដូចជា អង្គភាពគ្រប់គ្រងអាវុធជាតិផ្ទុះ អង្គភាពប្រឆាំងការជួញដូរមនុស្ស គណៈកម្មការជាតិប្រឆាំងទារុណកម្ម និងក្រុមការងារប្រឆាំងឧក្រិដ្ឋកម្មឆ្លងដែន SOMTC-កម្ពុជា»។
ក្នុងឱកាសអញ្ជើញចូលរួមពិធីបិទវគ្គបណ្ដុះបណ្ដាលនៅថ្ងៃទី ២០ កក្កដា លោក ប៉ោ ភក្តិ អគ្គលេខាធិការនៃអគ្គលេខាធិការដ្ឋានក្រសួងមហាផ្ទៃ និងជាប្រធានក្រុមការងារទទួលបន្ទុកឧក្រិដ្ឋកម្មឆ្លងដែនកម្ពុជា (SO-MTC) បានលើកឡើងថា វគ្គបណ្តុះបណ្តាលនេះបានចូលរួមចំណែកក្នុងការពង្រឹងសមត្ថភាពសិក្ខាកាម ជាមន្ត្រីអនុវត្តច្បាប់ក្នុងការបំពេញការងាររបស់ខ្លួន កាន់តែទទួលបានប្រសិទ្ធភាពលើការគ្រប់គ្រងអាវុធធុនតូច និងធុនស្រាល។
លោកបន្តថា៖ «ជាពិសេសនោះ ការយកចិត្តទុកដាក់បញ្ជ្រាបការយល់ដឹង និងលើកកម្ពស់ការចូលរួមរបស់ស្ត្រីនៅក្នុងកិច្ចការនេះសំដៅធ្វើយ៉ាងណា សម្រេចបាននូវគោលដៅរួមមួយ គឺការកាត់បន្ថយគ្រោះថ្នាក់ និងបទល្មើសផ្សេងៗពាក់ព័ន្ធនឹងការប្រើប្រាស់អាវុធធុនតូច និងធុនស្រាល»។
លោក ផាត សុផានិត អ្នកនាំពាក្យក្រសួងមហាផ្ទៃបានប្រាប់ភ្នំពេញប៉ុស្តិ៍នៅថ្ងៃទី ២១ កក្កដាថា វគ្គបណ្តុះបណ្តាលនេះពុំមែនជាវគ្គថ្មីទើបបង្កើតឡើងនោះទេ។ ពោលគឺ UNCRPD បានផ្តល់វគ្គបណ្តុះបណ្តាលបែបនេះជាច្រើនឆ្នាំមកហើយ ជូនដល់មន្ត្រីអនុវត្តច្បាប់របស់កម្ពុជា នៅតាមបណ្តាស្ថាប័ននានានៃរាជរដ្ឋាភិបាល។
លោកបន្ថែមថា៖ «អ្វីដែលជាចំណុចថ្មីបន្ថែម នៅក្នុងវគ្គនេះគឺ បច្ចុប្បន្ន UNCRPD បាននិងកំពុងដំណើរការគម្រោងថ្មីរបស់ខ្លួនហៅថា In-Country Training Programme (ICTP) ដែលក្តោបវិសាលភាពក្នុងប្រទេសមួយចំនួនផងដែរនៅក្នុងតំបន់អាស៊ី»។
ក្រៅពីរៀបចំវគ្គបណ្តុះបណ្តាលដូចសព្វដង លោកបានបន្តថា គម្រោងវគ្គបណ្តុះបណ្តាលថ្មីនេះ គឺមានការបញ្ចូលបន្ថែម និងផ្តោតការយកចិត្តទុកដាក់ក្នុងការលើកទឹកចិត្តការចូលរួមរបស់ស្ត្រី (ឬហៅថា gender inclusive approach) ទៅលើការងារគ្រប់គ្រងអាវុធធុនតូច និងធុនស្រាលទាំងលើការងាររៀបចំគោលនយោបាយ និងអនុវត្តច្បាប់ជាក់ស្តែង ដែលចំណុចនេះក៏ស្របទៅនឹងយុទ្ធសាស្ត្រលើកកម្ពស់សមភាពយេនឌ័រ, SDG16, និងផែនការយុទ្ធសាស្ត្រក្នុងក្របខ័ណ្ឌ UN និងក្របខ័ណ្ឌជាតិ ពាក់ព័ន្ធមួយចំនួនទៀតផងដែរ។
លោក ផាត សុផានិត បានគូសបញ្ជាក់ថា៖ «ជារួម សិក្ខាកាមរបស់យើងមានការចាប់អារម្មណ៍លើគំនិតផ្តួចផ្តើមថ្មីនេះ និងប្តេជ្ញាខិតខំយកនូវចំណេះដឹង និងបទពិសោធពីវគ្គបណ្តុះបណ្តាលនេះទៅអនុវត្តដើម្បីបង្កើនប្រសិទ្ធភាព តាមស្ថានភាពជាក់ស្តែងនៃបរិបទការងាររៀងៗខ្លួន ហើយក៏បានសំណូមពរឱ្យមានវគ្គបែបនេះបន្ថែមទៀត នាពេលអនាគត ដើម្បីកៀរគរការចូលរួមរបស់ស្ត្រីឱ្យបានកាន់តែច្រើនឡើង»៕
