.jpg)
លោក ឃួង ស្រេង ពេលប្រជុំកាលពីថ្ងៃ ២០ កក្កដា។ រូប សាលាក្រុង
ភ្នំពេញៈ អភិបាលរាជធានីភ្នំពេញលោក ឃួង ស្រេង បានជំរុញឱ្យអាជ្ញាធរខណ្ឌទាំង ១៤ មន្ទីរពាក់ព័ន្ធ និងកងកម្លាំងទាំងអស់ត្រូវបន្តយកចិត្តទុកដាក់ខ្ពស់ ចំពោះការព្យាបាលអ្នកជំងឺកូវីដ ១៩ នៅតាមផ្ទះ ដើម្បីឱ្យពួកគាត់កាន់តែមានទំនុកចិត្តមកលើក្រុមគ្រូពេទ្យ និងអាជ្ញាធរ ដែលជាផ្នែកមួយជួយជំរុញដល់ការព្យាបាលតាមផ្ទះឱ្យបានកាន់តែច្រើន។
ការជំរុរញនេះត្រូវបានធ្វើឡើងនៅក្នុងកិច្ចប្រជុំគណៈបញ្ជាការឯកភាព រាជធានីភ្នំពេញតាមរយៈវីដេអូពីចម្ងាយកាលពីថ្ងៃទី ២០ ខែកក្កដា ស្តីពីវិធានការការពារទប់ស្កាត់ ការរីករាលដាលនៃជំងឺកូវីដ ១៩ នឹងការគ្រប់គ្រង ថែទាំ និងព្យាបាលអ្នកជំងឺកូវីដ-១៩ដោយស្ម័គ្រចិត្តនៅតាមផ្ទះ និងក្រុមការងារត្រួតពិនិត្យទីតាំងបិទខ្ទប់ចត្តាឡីស័ក ដោយសារជំងឺកូវីដ ១៩ ក្នុងភូមិសាស្ត្រខណ្ឌនីមួយៗ និងស្ដីពីការរឹតបន្តឹង ការអនុវត្តវិធានការរដ្ឋបាលរបស់រដ្ឋបាលរាជធានីភ្នំពេញ។
លោក ឃួង ស្រេង ថ្លែងថា ការព្យាបាលតាមផ្ទះគឺជាជម្រើសដ៏ល្អ ដែលអាចជួយកាត់បន្ថយភាពកកណែននៅមណ្ឌលព្យាបាលជំងឺកូវីដ។ លោកថា៖ «ដូច្នេះអ្វីដែលត្រូវអនុវត្តនោះ គឺអាជ្ញាធរខណ្ឌទាំង ១៤ មន្ទីរពាក់ព័ន្ធ និងកងកម្លាំងទាំងអស់ ត្រូវតែយកចិត្តទុកដាក់ឱ្យបានខ្ពស់បំផុត ចំពោះការព្យាបាលតាមផ្ទះ»។
ចំពោះខណ្ឌនីមួយៗត្រូវបង្កើតឱ្យមានទីបញ្ជាការស្រាល ១ កន្លែង ក្នុង ១ ខណ្ឌដើម្បីប្រចាំបញ្ជាជួយអន្តរាគមន៍ ប្រជាពលរដ្ឋពេលមានបញ្ហាអ្វីមួយ ហើយប្រធានការិយាល័យសុខាភិបាលស្រុកប្រតិបត្តិ (OD) ក៏ត្រូវតែនៅក្នុងទីបញ្ជាការស្រាលនេះដែរ ពោលគឺនៅពេលមានបញ្ហាអ្វី គឺអាចជួយបានទាន់ពេលវេលាមិនគ្រោះថ្នាក់ដល់អាយុជីវិត។
លោកបញ្ជាក់ថា ចំពោះអ្នកដែលពិនិត្យរកឃើញថា មានវិជ្ជមានជំងឺកូវីដ ១៩ និងបានសម្រេចចិត្តព្យាបាលនៅតាមផ្ទះហើយ ប៉ុន្តែបែរជាល្មើសនឹងច្បាប់ ដោយលួចចេញមកខាងក្រៅ និងបានចម្លងដល់អ្នកដទៃថែមទៀតនោះ គឺអាចប្រឈមនឹងផ្លូវច្បាប់ ដោយមិនមានការលើកលែងឡើយ។
ជាមួយគ្នានេះដែរ លោក ងី មានហេង ប្រធានមន្ទីរសុខាភិបាលរាជធានីភ្នំពេញបានថ្លែងក្នុងកិច្ចប្រជុំនោះថា ចំពោះអ្នកដែលរកឃើញមានវិជ្ជមានជំងឺកូវីដ ១៩ ហើយស្ម័គ្រចិត្តព្យាបាលតាមផ្ទះត្រូវព្យាបាលឱ្យបានរយៈពេល ១៣ ថ្ងៃ។
លោកបន្តថា៖ «ក្នុងថ្ងៃទី ១៣ គ្រូពេទ្យត្រូវទៅយកសំណាកបន្តទៀត នៅពេលពិនិត្យយកសំណាកនោះ បើទោះបីជារកឃើញ ឬរកមិនឃើញ ជំងឺកូវីដ-១៩ ក៏ដោយក៏ត្រូវតែបន្តដាក់ខ្លួនឱ្យនៅដាច់ដោយឡែកចំនួន ១៤ ថ្ងៃបន្តទៀត មិនអាចចេញក្រៅបានទេ»។
អភិបាលខណ្ឌបឹងកេងកងលោក ធឹម សំអាន ប្រាប់ ភ្នំពេញ ប៉ុស្តិ៍ថា ដើម្បីបង្កលក្ខណៈងាយស្រួល ដល់អ្នកជំងឺព្យាបាលតាមផ្ទះ រដ្ឋបាលខណ្ឌបានបង្កើតទីបញ្ជាការស្រាលចំនួន ២ ដើម្បីតាមដាន និងផ្តល់ការពិគ្រោះយោបល់។
លោកថ្លែងថា៖ «បងប្អូនខ្លះ គាត់ចង់ទៅពេទ្យ យើងយកឡានពេទ្យទៅដឹកគាត់បញ្ជូនទៅកន្លែងព្យាបាល ហើយបងប្អូនខ្លះ ដែលមានអាការស្រាលសុំព្យាបាលនៅផ្ទះ យើងបានទៅពិនិត្យគាត់ដល់ទីតាំង ហើយយើងបន្តប្រាស្រ័យទាក់ទងគ្នា ដោយបង្កើតក្រុមតេឡេក្រាម ដើម្បីសួរនាំ និងតាមដាន»។
លោកឱ្យដឹងថា សម្រាប់ខណ្ឌបឹងកេងកង អ្នកជំងឺដែលកំពុងសម្រាកព្យាបាលជំងឺកូវីដ ១៩ តាមផ្ទះមានជាង ១៥០ នាក់។
អភិបាលរងខណ្ឌមានជ័យលោក ឌី រ័ត្នខេមរុណ ក៏បានថ្លែងពីម្សិលមិញដែរថា សម្រាប់ខណ្ឌមានជ័យបានអនុវត្តមួយជំហានរួចមកហើយ ដោយរដ្ឋបាលខណ្ឌបានរៀបចំទីបញ្ជាការស្រាល ២ កន្លែង នៅសង្កាត់ចាក់អង្រែក្រោម ដោយមានកម្លាំងចូលរួមពីគណៈបញ្ជាការឯកភាពខណ្ឌ រួមទាំងក្រុមការងារបស់សុខាភិបាលផងដែរ។
លោកបានបន្តថា៖ «រដ្ឋបាលខណ្ឌមានជ័យក៏បានរៀបចំក្រុមការងារគ្រូពេទ្យមន្ត្រីមូលដ្ឋានសង្កាត់ដែលចុះទៅពិនិត្យពិគ្រោះយោបល់ និងព្យាបាល ថែទាំ អ្នកជំងឺដែលស្ម័គ្រចិត្តព្យាបាលតាមផ្ទះ ដោយមានការយកចិត្តដាក់ពីអាជ្ញាធរ យើងបានចុះជារៀងរាល់ថ្ងៃ ដើម្បីសួរសុខទុក្ខ និងតាមដានសុខភាពរបស់ពួកគាត់»។
លោកឱ្យដឹងថា គិតត្រឹមថ្ងៃទី ២១ ខែកក្កដានេះ សម្រាប់មូលដ្ឋានខណ្ឌមានជ័យអ្នកជំងឺកំពុងសម្រាកព្យាបាលជំងឺកូវីដ ១៩ តាមផ្ទះមានចំនួន ២៥៦ នាក់។
លោកបានបញ្ជាក់ថា៖ «ក្នុងករណីស្នើសុំព្យាបាលតាមផ្ទះមិនមែនយើងនឹកឃើញចេះតែឱ្យទេ គឺរដ្ឋបាលខណ្ឌ និងក្រុមគ្រូពេទ្យនឹងចុះទៅពិនិត្យទីតាំងអ្នកស្ម័គ្រចិត្តព្យាបាលតាមផ្ទះ អ៊ីចឹងបើពិនិត្យឃើញថា អ្នកជំងឺធូរស្រាលគឺក្រុមគ្រូពេទ្យវាយតម្លៃ ហើយធ្វើកិច្ចសន្យាមួយ ដើម្បីឱ្យគាត់ព្យាបាលតាមផ្ទះ ប៉ុន្តែបើពិនិត្យឃើញថា អ្នកជំងឺមានស្ថានភាពធ្ងន់ធ្ងរ គឺក្រុមគ្រូពេទ្យមិនឱ្យគាត់ព្យាបាលតាមផ្ទះទេ»។
លោក ឌី រ័ត្នខេមរុណ បានបន្ថែមទៀតថា ចំពោះទីតាំងអ្នកជំងឺកូវីដ ១៩ ដែលសម្រាកព្យាបាលនៅតាមផ្ទះ អាជ្ញាធរបានដាក់ស្លាកសញ្ញាសម្គាល់ និងហ៊ុមព័ទ្ធខ្សែនៅមុខផ្ទះ ដើម្បីបង្ហាញជូនប្រជាពលរដ្ឋឱ្យបានដឹង ឬអ្នកក្បែរនោះមានការប្រុងប្រយ័ត្នខ្ពស់៕
