កំពតៈ លោក ស ខេង រដ្ឋមន្ត្រីក្រសួងមហាផ្ទៃណែនាំឱ្យថ្នាក់ដឹកនាំខេត្តកំពត រៀបចំពិធីប្រកាសបង្កើត និងដាក់ឱ្យដំណើរការនូវរដ្ឋបាលក្រុងបូកគោថ្មី ខណៈការបោះឆ្នោត ជ្រើសរើសក្រុមប្រឹក្សាក្រុងបូកគោនេះនឹងប្រព្រឹត្តទៅនៅថ្ងៃទី ២៥ ខែកក្កដា។
កាលពីថ្ងៃទី ១៦ ខែ មីនា ឆ្នាំ ២០២១ រាជរដ្ឋាភិបាលបានប្រកាសបង្កើតក្រុងបូកគោនៃខេត្តកំពត ដោយក្នុងនោះក៏បានណែនាំឱ្យកំណត់ចំនួនសមាជិកក្រុមប្រឹក្សាក្រុងបូកគោ សម្រាប់អាណត្តិទី១ និងកំណត់ចំនួនគណៈអភិបាលក្រុងផងដែរ។
លិខិត ១ ច្បាប់របស់ក្រសួងមហាផ្ទៃចុះថ្ងៃទី ២១ ខែកក្កដា ចុះហត្ថលេខាដោយលោក ស ខេង ឱ្យដឹងថា ការបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុងបូកគោនឹងប្រព្រឹត្តទៅនៅថ្ងៃទី ២៥ ខែ កក្កដា ឆ្នាំ ២០២១។ ដូច្នេះអនុលោមមាត្រា ៦២ នៃច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ បានកំណត់ថា កិច្ចប្រជុំចូលកាន់តំណែងរបស់ក្រុមប្រឹក្សា ត្រូវប្រារព្ធធ្វើឡើងក្នុងរយៈពេលមិនឱ្យលើសពីដប់បួន (១៤) ថ្ងៃ បន្ទាប់ពីថ្ងៃដែលគណៈកម្មាធិការជាតិ រៀបចំការបោះឆ្នោត (គ.ជ.ប) ប្រកាសលទ្ធផលផ្លូវការនៃការបោះឆ្នោតជ្រើសរើសក្រុមប្រឹក្សា។
លោក ស ខេង បានបញ្ជាក់ក្នុងលិខិតថា បន្ទាប់ពីប្រកាសបង្កើត និងដាក់ឱ្យដំណើរការនូវរដ្ឋបាលក្រុងបូកគោរួចហើយ ក្រុមប្រឹក្សាក្រុងបូកគោត្រូវដំណើរការរៀបចំកិច្ចប្រជុំសាមញ្ញលើកទី ១ និងកិច្ចប្រជុំសាមញ្ញលើកទី២ របស់ខ្លួនជាបន្តបន្ទាប់ ស្របតាមបទប្បញ្ញត្តិដែលបានកំណត់ក្នុងច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ។
ដើម្បីមានមូលដ្ឋាន និងធានាឱ្យពិធីប្រកាសបង្កើត និងដាក់ឱ្យដំណើរការរដ្ឋបាលក្រុងបូកគោអាចដំណើរការបានរួមទាំងការរៀបចំកិច្ចប្រជុំចូលកាន់តំណែង កិច្ចប្រជុំសាមញ្ញលើកទី១ និងកិច្ចប្រជុំសាមញ្ញលើកទី២ របស់ក្រុមប្រឹក្សាក្រុងបូកគោទទួលបានជោគជ័យទាន់ពេលវេលា និងស្របទៅតាមច្បាប់ និងលិខិតបទដ្ឋានគតិយុត្តកំណត់លោក ស ខេង បានធ្វើការណែនាំដល់ថ្នាក់ដឹកនាំខេត្តកំពតត្រូវរៀបចំពិធីប្រកាសបង្កើត និងដាក់ឱ្យដំណើរការនូវរដ្ឋបាលក្រុងនេះ តាមការកំណត់ជាក់លាក់ណាមួយ។
លោកបញ្ជាក់ថា៖ «ការប្រកាសបង្កើត និងដាក់ឱ្យដំណើរនេះត្រូវរៀបចំធ្វើរួមគ្នាជាមួយកិច្ចប្រជុំចូលកាន់តំណែងក្រុមប្រឹក្សាក្រុងបូកគោនៃខេត្តកំពត។ អនុលោមមាត្រា ៦២ នៃច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ក្រសួងមហាផ្ទៃធ្វើប្រតិភូកម្ម និងប្រគល់សិទ្ធិជូនអភិបាលនៃគណៈអភិបាលខេត្តកំពត ដើម្បីធ្វើជាអធិបតីក្នុងកិច្ចប្រជុំចូលកាន់តំណែងក្រុមប្រឹក្សាក្រុងបូកគោ»។
ជាមួយនឹងប្រកាសនេះលោកបញ្ជាក់ថា ចំពោះកាលបរិច្ឆេទជាក់ស្ដែងនៃពិធីប្រកាសបង្កើត និងដាក់ឱ្យដំណើរការនូវរដ្ឋបាលក្រុងបូកគោ រួមទាំងកិច្ចប្រជុំចូលកាន់តំណែងក្រុមប្រឹក្សាក្រុងបូកគោនៃខេត្តកំពត ក្រសួងមហាផ្ទៃ ស្នើឱ្យអភិបាលនៃគណៈអភិបាលខេត្តកំពត ជាអ្នកកំណត់ដោយគ្រាន់តែជូនដំណឹងមកក្រសួងមហាផ្ទៃដើម្បីជ្រាប។
ពិធីប្រកាសបង្កើត និងដាក់ឱ្យដំណើរការនូវរដ្ឋបាលក្រុងបូកគោ រួមទាំងកិច្ចប្រជុំចូលកាន់តំណែងក្រុមប្រឹក្សាក្រុងបូកគោ ត្រូវដំណើរការតាមកម្មវិធី និងត្រូវអញ្ជើញសមាសភាពសមាជិក និងភ្ញៀវចូលរួមដូចមានក្នុងកម្មវិធី និងសមាសភាពជូនភ្ជាប់ជាមួយលិខិតនេះ។
លោក វ៉ិត វឌ្ឍនា នាយករដ្ឋបាលសាលាខេត្តកំពតបានប្រាប់ ភ្នំពេញ ប៉ុស្តិ៍ នៅថ្ងៃទី ២២ កក្កដាថា រដ្ឋបាលខេត្តកំពតបានត្រៀមលក្ខណៈរួចជាស្រេចចំពោះពិធីប្រកាសបង្កើត និងដំណើរការក្រុងថ្មីនេះ។ ប៉ុន្តែ លោកមិនទាន់អាចបញ្ជាក់បានទេ ចំពោះថ្ងៃជាក់លាក់នៃការប្រារព្ធពិធីនេះ ដោយរង់ចាំលទ្ធផលនៃការបោះឆ្នោតដែលរៀបចំដោយ គជប ជាមុនសិន។
លោកថា៖ «ព្រោះក្រោយបោះឆ្នោតហើយ ២ អាទិត្យ គឺយើងប្រកាសលទ្ធផលជាផ្លូវការ បើមិនមានបញ្ហា ក្រោយការបោះឆ្នោត ១ សប្តាហ៍ គឺយើងអាចកំណត់ថ្ងៃបានហើយ។ អ៊ីចឹងប្រហែលជាកៀកនឹងលទ្ធផលនៃការបោះឆ្នោត បានយើងកំណត់ថ្ងៃបាន»។
គួរបញ្ជាក់ថា រាជរដ្ឋាភិបាលបានសម្រេចបង្កើតក្រុងបូកគោ ដោយបានកាត់យកឃុំចំនួន ៣ ចេញពីស្រុកទឹកឈូ គឺឃុំបឹងទូក ឃុំកោះតូច និងឃុំព្រែកត្នោត ដើម្បីឱ្យមានភាពងាយស្រួលក្នុងការគ្រប់គ្រង និងអភិវឌ្ឍឱ្យកាន់តែរីកចម្រើនថែមទៀត៕