ភ្នំពេញៈ មន្ត្រីច្រកទ្វារអន្តរជាតិភ្នំពេញបានឱ្យដឹងថា មានអ្នកដំណើរជាជនជាតិបរទេសជាង ៥០ ករណីហើយ ដែលមិនត្រូវបានអនុញ្ញាតឱ្យចូលមកក្នុងផ្ទៃប្រទេសកម្ពុជា ដោយសារមិនបានបំពេញតាមគ្រប់លក្ខខណ្ឌរបស់រាជរដ្ឋាភិបាលដែលបានកំណត់ចាប់តាំងពីមានការឆ្លងរាលដាលខ្លាំងនៃជំងឺកូវីដ ១៩ មក។
លោកឧត្តមសេនីយ៍ត្រី ថោង សុផាត នាយរងប៉ុស្តិ៍នៃច្រកទ្វារអន្តរជាតិភ្នំពេញបានលើកឡើងកាលពីថ្ងៃទី ២០ កក្កដាថា ជនបរទេសណាដែលមកដល់អាកាសយានដ្ឋានអន្តរជាតិ-ភ្នំពេញ ហើយមិនបានបំពេញតាមគ្រប់លក្ខខណ្ឌដែលត្រូវបានកំណត់សម្រាប់ភ្ញៀវដែលមកដល់កម្ពុជាគឺមន្ត្រីអាកាសយានដ្ឋាននឹងស្នើសុំគោលការណ៍ពីក្រសួងសុខាភិបាល និងក្រុមហ៊ុនអ៊ែរឡាញបញ្ជូនពួកគាត់ត្រឡប់ទៅវិញ។
លោកមានប្រសាសន៍ថា៖ «ចាប់តាំងពីយើងអនុវត្តនូវវិធានការនេះតាំងពីឆ្នាំ ២០២០ មកទល់ពេលនេះ យើងជួបចំនួន ៥៣ ករណីហើយ ដែលករណីទាំងនោះភាគច្រើនគឺវិលត្រឡប់ទៅវិញទាំងអស់ ដោយសារពួកគាត់មិនមានគ្រប់លក្ខខណ្ឌដែលតម្រូវសម្រាប់ពួកគាត់។ នៅពេលពួកគាត់មិនមានគ្រប់លក្ខខណ្ឌគឺយើងស្នើសុំគោលការណ៍ពីក្រសួងសុខាភិបាល និងក្រុមហ៊ុនអ៊ែរឡាញ បញ្ជូនពួកគាត់ត្រឡប់ទៅវិញ»។
នាយរងប៉ុស្តិ៍នៃច្រកទ្វារអន្តរជាតិភ្នំពេញបានបន្ថែមថា ក្នុងរយៈពេល ៦ ខែចុងក្រោយនេះអ្នកដំណើរហោះហើរមកកាន់ប្រទេសកម្ពុជាមានការថយចុះប្រមាណពី ៤០ ភាគរយទៅ ៥០ ភាគរយបើធៀបនឹងឆមាសទី ២ នៃឆ្នាំ ២០២០ កន្លងមក។
លោកបានបញ្ជាក់ថា ចាប់ពីមានការឆ្លងរាលដាលជំងឺកូវីដ ១៩ នៅតាមបណ្តាប្រទេសជាច្រើនលើសកលលោករាជរដ្ឋាភិបាលកម្ពុជាតាមរយៈក្រសួងពាក់ព័ន្ធបានដាក់កំណត់លក្ខខណ្ឌមួយចំនួនសម្រាប់អ្នកដំណើរដែលបានហោះហើរមកកាន់ប្រទេសកម្ពុជា ហើយក្នុងករណីមិនគ្រប់លក្ខខណ្ឌនឹងមិនអនុញ្ញាតឱ្យចូលឡើយ។
លោក ថោង សុផាត បានបញ្ជាក់ថា៖ «ក្នុងនាមខ្ញុំជាកងកម្លាំងនគរបាលអន្តោប្រវេសន៍ប្រចាំនៅទីនេះ ខ្ញុំគិតថា ការដាក់ចេញនេះគឺសមហេតុសមផលសម្រាប់សភាពការណ៍នៃពិភពលោកកំពុងតែរីករាលដាលនៃជំងឺកូវីដ ១៩ នេះ ដូចនេះប្រទេសរបស់យើងក៏ត្រូវតែរឹតបន្តឹងជាមួយនឹងការនាំចូលកូវីដនេះដែរ»។
បើតាមលោក ថោង សុផាត ចំពោះអ្នកដំណើរមកពីបរទេស នៅពេលមកដល់ច្រកទ្វារនៃអាកាសយានដ្ឋានអន្តរជាតិ-ភ្នំពេញគឺមានការត្រួតពិនិត្យចំនួន ២ ដែលទី ១ គឺមន្ត្រីចត្តាឡីស័កដែលត្រូវធ្វើការពិនិត្យឯកសារស្គែនមុខរួច ហើយ និងការតម្កល់ថវិកាចំនួន ២ ០០០ ដុល្លារ។ បន្ទាប់មកគឺការត្រួតពិនិត្យទី ២ នៅផ្នែកអន្តោប្រវេសន៍។
លោកបានបន្តថា មន្ត្រីអន្តោប្រវេសន៍ត្រូវពិនិត្យមើលឯកសារឡើងវិញទាំងអស់ ហើយប្រសិនបើមិនមានគ្រប់ចំណុចណាមួយទេ ខាងអន្តោប្រវេសន៍នឹងមិនអនុញ្ញាតឱ្យអ្នកដំណើរនោះចូលឡើយ។
តាមការសម្រេចរបស់ក្រសួងសុខាភិបាលដែលអនុវត្តទៅលើភ្ញៀវដែលចូលមកក្នុងប្រទេសកម្ពុជាគឺតម្រូវឱ្យមានឯកសារ និងលក្ខខណ្ឌមួយចំនួនដូចជាអ្នកដំណើរដែលមុននឹងអាចចូលមកក្នុងប្រទេសកម្ពុជាបានត្រូវតែមានក្រដាសលទ្ធផលតេស្តកូវីដ ១៩ (PCR) ដែលជាតម្រូវការរបស់ក្រសួងសុខាភិបាល ទី២ ត្រូវមានការធានារ៉ាប់រង (Insurance Forte) សម្រាប់ធានាទៅលើការចំណាយការព្យាបាល ទី៣ ត្រូវមានលុយតម្កល់ចំនួន ២ ០០០ ដុល្លារ នៅពេលចុះមកដល់ទី៤ ត្រូវមានទិដ្ឋាការបញ្ជាក់ពីស្ថានទូត ដើម្បីចូលមកកាន់ប្រទេសកម្ពុជាដោយសារចាប់ពីខែមេសា ឆ្នាំ ២០២០ មក កម្ពុជាបានបិទការផ្តល់ទិដ្ឋាការពេលមកដល់ (Visa on Arrival) ហើយ។
លោក ថោង សុផាត បានបញ្ជាក់បន្ថែមថា៖ «លក្ខខណ្ឌទាំងអស់នេះហើយដែលសមត្ថកិច្ចអន្តោប្រវេសន៍នៅច្រកទ្វារត្រូវតែមើល និងពិនិត្យឱ្យបានជាក់លាក់ មុននឹងអនុញ្ញាតឱ្យភ្ញៀវទាំងអស់នោះបានចូលមកក្នុងប្រទេសកម្ពុជា។ បន្ទាប់ពីនេះគឺការយកសំណាក និងការដាក់នៅកន្លែងធ្វើចត្តាឡីស័កគឺជាតួនាទីភារកិច្ចរបស់ក្រសួងសុខាភិបាល»៕