.jpg)
សមត្ថកិច្ចខេត្តបន្ទាយមានជ័យកំពុងត្រួតពិនិត្យពលករមកពីថៃ។ រូប រដ្ឋបាលខេត្តបន្ទាយមានជ័យ
ភ្នំពេញៈ មន្ត្រីជាន់ខ្ពស់កម្ពុជានៅមិនទាន់ដឹងច្បាស់នៅឡើយពីចំនួនជាក់ស្តែងនៃពលករខ្មែរដែលឆ្លងជំងឺកូវីដ ១៩ នៅក្នុងប្រទេសថៃដោយមន្ត្រីកំពុងបង្កើនការយកចិត្តទុកដាក់ធ្វើការលើបញ្ហានេះ ខណៈអ្នកឃ្លាំមើលសិទ្ធិការងារប្រចាំប្រទេសថៃថា គិតមកដល់ពេលនេះមានពលករខ្មែរបានឆ្លងជំងឺកូវីដ ១៩ មានប្រមាណ ៩ ០០០ នាក់។
លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ ប្រាប់ ភ្នំពេញ ប៉ុស្តិ៍ នៅថ្ងៃទី ២២ កក្កដាថា គិតមកត្រឹមថ្ងៃនេះ ក្រសួងមិនទាន់មានតួលេខផ្លូវការច្បាស់លាស់អំពីចំនួនពលករខ្មែរដែលឆ្លងជំងឺកូវីដ ១៩ នៅប្រទេសថៃនៅឡើយទេ។
បើទោះជាមិនទាន់ទទួលបានព័ត៌មានច្បាស់ក៏លោកបញ្ជាក់ថា រាជរដ្ឋាភិបាលតាមរយៈក្រសួងការបរទេសបានជំរុញស្ថានទូត និងស្ថានអគ្គកុងស៊ុលកម្ពុជា នៅប្រទេសថៃឱ្យបន្តសម្របសម្រួលជាមួយអាជ្ញាធរថៃ ជាពិសេសក្រសួងការបរទេស ក្រសួងសុខាភិបាល ក្រសួងការងារថៃ និងមជ្ឈមណ្ឌលគ្រប់គ្រងស្ថានការណ៍កូវីដ ១៩ (CCSA) សុំអន្តរាគមន៍ ដើម្បីបន្តយកចិត្តទុកដាក់ ថែរក្សា ទទួលការចាក់វ៉ាក់សាំង និងព្យាបាលកូវីដ ១៩ បើមានសភាពធ្ងន់ធ្ងរខ្លាំងដូចជាការពន្លឿនការរកគ្រែ និងឡានពេទ្យមកទទួលពលករខ្មែរដែលឆ្លងកូវីដ ១៩ ទៅព្យាបាលទាន់ពេលវេលា។
បន្ថែមពីនេះមន្ត្រីក៏បន្តចុះសួរសុខទុក្ខ និងចែកជាគ្រឿងឧបភោគបរិភោគជូនបងប្អូនពលករក្នុងពេលមានការបិទខ្ទប់តាមលទ្ធភាព និងស្ថានភាពជាក់ស្ដែង ដល់បងប្អូនដែលជួបការលំបាកខ្លាំងបំផុត និងបន្ថែមទៅលើអ្វីដែលអាជ្ញាធរ និងនិយោជកបានជួយគាំពារ និងឧបត្ថម្ភរួចហើយដែរ។
លោកបញ្ជាក់ថា៖ «រដ្ឋាភិបាលកម្ពុជាបានបន្តផ្សព្វផ្សាយវិធានការនានា ដែលដាក់ចេញដោយបណ្ដាក្រសួង/ស្ថាប័ននៃរាជរដ្ឋាភិបាលទាំង ២ កម្ពុជា និងថៃដើម្បីទប់ស្កាត់ជំងឺកូវីដ ១៩ ព្រមទាំងផ្ដល់ការប្រឹក្សាផ្ដល់កម្លាំងចិត្ត និងបន្តអំពាវនាវដល់បងប្អូនពលករខ្មែរឱ្យចូលរួមអនុវត្តវិធានការទាំងនេះ ដោយអត់ធ្មត់ និងខ្ជាប់ខ្ជួន»។
លោកបន្ថែមថា រដ្ឋាភិបាលក៏បន្តផ្សព្វផ្សាយការអប់រំអំពីការថែទាំសុខភាព ក្នុងអំឡុងការផ្ទុះការរាតត្បាតជំងឺកូវីដ ដើម្បីឱ្យពលរដ្ឋខ្មែរ ប្រុងប្រយ័ត្នការពារថែរក្សាសុខភាពផ្ទាល់ខ្លួន។
លោកបន្ថែមថា៖ «បន្តកិច្ចការជាប្រចាំផ្សេងទៀតរបស់ស្ថានទូត និងស្ថានអគ្គកុងស៊ុលដូចជា ការដោះស្រាយវិវាទការងារ ការជួយពលករដែលកើតឧបទ្ទវហេតុក្នុងពេលធ្វើការ ការជួយរកការងារថ្មី សម្រាប់អ្នកបាត់បង់ការងារការសម្រួលផ្ដល់ឯកសារចាំបាច់ផ្សេងៗ»។
លោក ហេង សួរ អ្នកនាំពាក្យក្រសួងការងារ បណ្តុះបណ្តាលវិជ្ជាជីវៈក៏បានប្រាប់ ភ្នំពេញ ប៉ុស្តិ៍ នៅថ្ងៃទី ២២ កក្កដាដែរថា ក្រសួងការងារក៏មិនទាន់ទទួលបានព័ត៌មាននៃការឆ្លងជំងឺកូវីដលើពលករខ្មែរនៅប្រទេសថៃដូចគ្នា ដោយសារតែមិនទាន់ទទួលរបាយការណ៍ផ្លូវការណាមួយពីភាគីថៃនៅឡើយ។
លោកថ្លែងថា ចំពោះបញ្ហានេះក៏អាចពាក់ព័ន្ធជាមួយនឹងច្បាប់ឯកជនភាព នៅប្រទេសថៃ ឬមូលហេតុផ្សេងទៀត ដែលរដ្ឋាភិបាលថៃ មិនបញ្ជូនរបាយការណ៍ឆ្លងនេះមកកម្ពុជា។
យ៉ាងណាក្តី លោកបញ្ជាក់ថា៖ «អ្វីដែលច្បាស់គឺរាជរដ្ឋាភិបាលថៃមានគោលការណ៍មួយគឺទទួលពិនិត្យព្យាបាលអ្នកវិជ្ជមានកូវីដ ១៩ ទាំងអស់ដោយមិនគិតថ្លៃ និងមិនប្រកាន់ជាតិសាសន៍ ឋានៈ ពណ៌សម្បុរ ដូចដែលកម្ពុជាយើងកំពុងប្រកាន់យកដែរ»។
លោក លឹម សុផុន ក្រុមការងារនៃអង្គការសង់ត្រាល់ ប្រចាំប្រទេសថៃ ប្រាប់ ភ្នំពេញ ប៉ុស្តិ៍ នៅថ្ងៃទី ២២ កក្កដាថា យោងតាមការប្រកាសរបស់ក្រសួងសុខាភិបាលថៃ ដែលបានធ្វើបច្ចុប្បន្នភាព ចំពោះអ្នកឆ្លងនៅក្នុងប្រទេសនេះ គឺបង្ហាញថា មានបងប្អូនពលករខ្មែរបានឆ្លងជំងឺកូវីដ ១៩ ប្រមាណ ៩ ០០០ នាក់។
លោករៀបរាប់ថា៖ «ទាំងនេះ គឺចំនួនបងប្អូនខ្មែរយើងឆ្លងនៅថៃ ជាពិសេសគឺបងប្អូនពលករខ្មែរ។ សម្រាប់ចំនួនទូទៅដែលឆ្លងក្នុងប្រទេសថៃ គឺមានការឆ្លងកាន់តែច្រើនក្នុង ១ ថ្ងៃៗ ឆ្លងរហូតដល់ជាង ១ ម៉ឺននាក់ ខណៈរដ្ឋាភិបាល ប្រកាសបិទមិនឱ្យមានការចរាចរដល់ទៅ ១០ ខេត្ត ដើម្បីទប់ស្កាត់ការឆ្លងរីករាលដាលជំងឺកូវីដ ១៩»។
លោក លឹម សុផុន ដែលបានតាមដានស្ថានការណ៍ពលករខ្មែរនៅប្រទេសថៃជាប់ជាប្រចាំ បញ្ជាក់ថា ការដ្ឋានសំណង់នៅទីក្រុងបាងកក និងខេត្តជុំវិញនេះចំនួន ១០ ខេត្ត គឺត្រូវរដ្ឋាភិបាលថៃប្រកាសបិទខ្ទប់។ ស្ថានការណ៍នេះ បានធ្វើឱ្យពលករខ្មែរ ក៏ប្រឈមនឹងបញ្ហាលំបាកផងដែរ ជាពិសេសពលករដែលរស់នៅ និងធ្វើការខុសច្បាប់។
លោកបានរៀបរាប់ថា៖ «ក្នុងអំឡុងពេលបិទខ្ទប់បងប្អូននេះ រដ្ឋាភិបាលថៃ ក៏បានប្រកាសផ្តល់ប្រាក់ឧបត្ថម្ភដល់ពលករដែលតម្រូវផ្អាកការងារប្រមាណ ៧ ពាន់បាត ក្នុង ១ ខែរួមជាមួយនឹងស្បៀងអាហារមួយចំនួនផងដែរ។ ប៉ុន្តែយ៉ាងណា ការផ្តល់ប្រាក់ឧបត្ថម្ភទាំងនេះគឺទទួលបានសម្រាប់តែពលករដែលធ្វើការស្របច្បាប់តែប៉ុណ្ណោះ»។
លោកបន្តថា ចំណែកពលករដែលរស់នៅ និងធ្វើការដោយខុសច្បាប់ គឺមិនត្រូវទទួលបានអត្ថប្រយោជន៍ទាំងនេះទេ។ ដូច្នេះ លោក សុផុន រំពឹងថា រដ្ឋាភិបាលខ្មែរនឹងពិភាក្សាបន្តទៀត ជាមួយរដ្ឋាភិបាលថៃ ដើម្បីជួយដល់ពលករខ្មែរ ដែលកំពុងប្រឈមនឹងបញ្ហាទាំងនេះ៕
វីដេអូ៖
