.jpg)
វ៉ាក់សាំងបង្ការជំងឺកូវីដ ១៩ ស៊ីណូហ្វាមចំនួន ១ លានដូសទៀត ពេលដឹកមកដល់ព្រលានយន្តហោះអន្តរជាតិភ្នំពេញកាលពីម្សិលមិញ។ ហេង ជីវ័ន
ភ្នំពេញៈ រាជរដ្ឋាភិបាលកម្ពុជាបានបញ្ជាទិញវ៉ាក់សាំងបន្ថែមចំនួន ៥ លានដូសពីសាធារណរដ្ឋប្រជាមានិតចិនសម្រាប់ត្រៀមចាក់ដល់កុមារ និងយុវវ័យអាយុពី ១២ ឆ្នាំដល់ ១៧ ឆ្នាំ ដែលវ៉ាក់សាំងនេះនឹងដឹកមកដល់ប្រទេសកម្ពុជាក្នុងខែសីហា និងខែកញ្ញាខាងមុខនេះ ខណៈដែលកម្ពុជាក៏នឹងទទួលបានវ៉ាក់សាំងប្រភេទ Johnson&Johnson តាមរយៈយន្តការកូវ៉ាក់ចំនួន ១ លានដូសផងដែរ។
នេះជាការលើកឡើងរបស់លោកស្រី យក់ សម្បត្តិ រដ្ឋលេខាធិការក្រសួងសុខាភិបាល នាព្រឹកថ្ងៃទី ២២ ខែកក្កដា ក្នុងពេលលោកស្រីទទួលវ៉ាក់សាំងស៊ីណូហ្វាមចំនួន ១ លានដូសដែលរាជរដ្ឋាភិបាលបានបញ្ជាទិញពីសាធារណរដ្ឋប្រជាមានិតចិន។
លោកស្រីថ្លែងថា៖ «នៅក្នុងខែសីហា យើងនឹងមានវ៉ាក់សាំងស៊ីណូវ៉ាក់ចំនួន ៣ លានដូស ហើយនៅក្នុងខែកញ្ញា យើងនឹងមានស៊ីណូវ៉ាក់ចំនួន ២ លានដូសទៀតសម្រាប់ត្រៀមចាក់ទៅដល់កុមារ និងយុវវ័យ ដែលសម្តេចតេជោកំពុងតែណែនាំចំពោះក្រុមការងារចាក់វ៉ាក់សាំងក៏ដូចជាក្រុមចំពោះកិច្ចនៃការធ្វើលទ្ធកម្មវ៉ាក់សាំង»។
លោកស្រី យក់ សម្បត្តិ បានអះអាងផងដែរថា កម្ពុជាក៏នឹងទទួលបានវ៉ាក់សាំងប្រភេទចនសុន&ចនសុន (Johnson&Johnson) ចំនួន ១ លានដូសផងដែរដែលត្រូវបានផ្តល់តាមរយៈយន្តការកូវ៉ាក់ ប៉ុន្តែលោកស្រីមិនទាន់អាចបញ្ជាក់ពីពេលវេលានៃការមកដល់របស់វ៉ាក់សាំងនៅឡើយទេ។
ទាក់ទងនឹងការចាប់ផ្តើមចាក់វ៉ាក់សាំងទៅដល់កុមារ និងយុវវ័យនេះដែរ លោកស្រី យក់ សម្បត្តិ បានលើកឡើងថា ក្រុមការងារនៃគណៈកម្មការចំពោះកិច្ចចាក់វ៉ាក់សាំងបង្ការវីរុសកូវីដ ១៩ ក្នុងក្របខ័ណ្ឌទូទាំងប្រទេសកំពុងតែធ្វើផែនការ និងពិភាក្សាក្នុងក្រុមការងារយ៉ាងសកម្មផងដែរ។
កេសវ៉ាក់សាំងស៊ីណូហ្វាម ត្រូវបានជញ្ជូនចេញពីយន្តហោះក្រោយពេលដឹកមកដល់។ហេង ជីវ័ន
លោកស្រី យក់ សម្បត្តិ បានលើកឡើងថា នៅប្រទេសជិតខាងនៃប្រទេសកម្ពុជាកំពុងមានការផ្ទុះខ្លាំង ប៉ុន្តែប្រទេសទាំងនោះមិនទាន់មានវ៉ាក់សាំងសម្រាប់ចាក់ជូនប្រជាពលរដ្ឋបានច្រើនដូចកម្ពុជាទេ ដែលគិតមកដល់យប់ថ្ងៃទី ២១ ខែកក្កដា កម្ពុជាបានចាក់វ៉ាក់សាំងដល់ប្រជាពលរដ្ឋបានជាង ៦ លាននាក់ហើយ។
លោកស្រីថ្លែងថា៖ «យើងមានវ៉ាក់សាំងគ្រប់គ្រាន់នៅក្នុងដៃសម្រាប់ចាក់ជូនប្រជាពលរដ្ឋរបស់យើង ក៏ដូចជាកុមារៗជាគោលដៅដែលសម្តេចតេជោបានសម្រេចរួចហើយ។ ដូចនេះ ទន្ទឹមនឹងការចាក់វ៉ាក់សាំងជូនប្រជាពលរដ្ឋឱ្យបានគ្រប់ៗគ្នានេះគឺត្រូវតែមានការចូលរួមពីបុគ្គលម្នាក់ៗក្នុងសហគមន៍ទើបកាត់បន្ថយការឆ្លងរាលដាលនៃវីរុសកូវីដនេះ»។
លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅថ្ងៃទី ២២ ខែកក្កដា បានថ្លែងថា វ៉ាក់សាំង ពិតជាមានសារៈសំខាន់ក្នុងការប្រយុទ្ធប្រឆាំងនឹងការរាតត្បាតជំងឺកូវីដ ១៩។ រាជរដ្ឋាភិបាលកម្ពុជាបានកំណត់ការចាក់វ៉ាក់សាំង ជាផែនការយុទ្ធសាស្ត្រក្នុងការប្រយុទ្ធប្រឆាំងនឹងជំងឺកូវីដ ១៩ នេះ។
លោកនាយករដ្ឋមន្ត្រីបានសរសេរលើបណ្តាញសង្គមហ្វេសប៊ុកថា៖ «តាមរយៈផែនការយុទ្ធសាស្ត្រនេះ កម្ពុជាបានប្រឹងប្រែងគ្រប់វិធីក្នុងការរកវ៉ាក់សាំងចាក់ជូនប្រជាពលរដ្ឋ។ វ៉ាក់សាំង ដែលកម្ពុជាទទួលបាន គឺជាការសម្រេចផែនការរបស់កម្ពុជា ដែលរកវ៉ាក់សាំងឱ្យបាន ២០ លានដូស ដើម្បីចាក់ជូនប្រជាពលរដ្ឋប្រមាណ ១០ លាននាក់»។
បើតាមការជូនដំណឹងរបស់នាយកដ្ឋានព័ត៌មាននៃក្រសួងការពារជាតិកាលពីថ្ងៃទី ២១ ខែកក្កដា ឆ្នាំ ២០២១ បានឱ្យដឹងថា លោកនាយករដ្ឋមន្ត្រី ហ៊ុន សែន នឹងទៅទទួលវ៉ាក់សាំងការពារវីរុសកូវីដ ១៩ ចំនួន ១ លានដូស ដែលជាជំនួយរបស់រដ្ឋាភិបាល និងប្រជាជនជប៉ុនដែលនឹងដឹកមកដល់ព្រលានយន្តហោះអន្តរជាតិភ្នំពេញ នៅថ្ងៃទី ២៣ ខែកក្កដានេះ។
ក្រសួងការពារជាតិបានលើកឡើងថា ការអញ្ជើញទទួលវ៉ាក់សាំងនៅព្រលានយន្តហោះរបស់លោកនាយករដ្ឋមន្ត្រី ហ៊ុន សែន នាពេលខាងមុខនេះ គឺជាការអញ្ជើញទទួលវ៉ាក់សាំងប្រទេសជាមិត្តលើកទី ២ ហើយ ដែលនៅលើកទី ១ បានធ្វើឡើងកាល ពីថ្ងៃទី ៧ ខែកុម្ភៈ លោកបានទទួលវ៉ាក់សាំងផ្ទាល់ដែលជាជំនួយរបស់រដ្ឋាភិបាល និងប្រជាជនចិន ចំនួន ៦០ ម៉ឺនដូស។
នៅសប្តាហ៍មុននេះ លោក មិកាមិ ម៉ាសាហ៊ីរ៉ូ ឯកអគ្គរាជទូតជប៉ុនប្រចាំព្រះរាជាណាចក្រកម្ពុជាបានឱ្យដឹងថា រដ្ឋាភិបាលជប៉ុនបានប្រកាសផ្ដល់ជំនួយវ៉ាក់សាំង AstraZeneca ចំនួនប្រមាណ ១ លានដូសដល់កម្ពុជា។ ជំនួយនេះធ្វើឡើងស្របតាមចំណងមិត្តភាពរវាង ជប៉ុន និងកម្ពុជា និងដោយផ្អែកលើស្ថានភាពកូវីដ ១៩ នៅកម្ពុជានាពេលបច្ចុប្បន្ន៕
វីដេអូ៖
