ភ្នំពេញៈ ការប្រារព្ធទិវាបង្ការការលង់ទឹកជាសកល ២៥ កក្កដា ឆ្នាំ ២០២១ ខាងមុខនេះ អង្គការហេបកូដ (Helpcode) ប្រចាំប្រទេសកម្ពុជា ប្រកាសស្វែងរកការគាំទ្រ ដើម្បីជួយការពារកុមារពីការលង់ទឹក ខណៈករណីគ្រោះថ្នាក់ ដោយសារការលង់ទឹកស្លាប់ ជាពិសេសលើកុមារកម្ពុជានៅតែកើតមានស្ទើរគ្រប់ខេត្ត។
តាមរយៈសេចក្ដីប្រកាសព័ត៌មានរបស់អង្គការ ហេបកូដ ស្ដីពីទិវាបង្ការការលង់ទឹកជាសកល ២៥ កក្កដា ២០២១ ក្រោមប្រធានបទ «គាំទ្រអង្គការហេបកូដជួយការពារកុមារពីការលង់ទឹកក្នុងប្រទេសកម្ពុជា» ពីម្សិលមិញ ឱ្យដឹងថា ទិវាបង្ការការលង់ទឹកពិភពលោកបានប្រកាសឡើងតាមរយៈសេចក្ដីសម្រេចមហាសន្និបាត ថ្ងៃទី ៧ ខែ មេសា ឆ្នាំ ២០២១ ស្ដីពី «ការបង្ការការលង់ទឹកពិភពលោក»។
ទិវានេះត្រូវបានប្រារព្ធធ្វើជារៀងរាល់ឆ្នាំនៅថ្ងៃទី ២៥ ខែកក្កដា ដើម្បីធ្វើការតស៊ូមតិជាសកលបង្ហាញពីផលប៉ះពាល់ដ៏គួរឱ្យសោកសៅយ៉ាងក្រៃលែងនៃការលង់ទឹកទៅលើគ្រួសារ និងសហគមន៍ និងផ្តល់នូវដំណោះស្រាយសង្គ្រោះជីវិតដើម្បីការពារការលង់ទឹក។
សេចក្ដីប្រកាសបានឱ្យដឹងថា មនុស្សប្រមាណ ២៣៥ ៦០០ នាក់ បានលង់ទឹកជារៀងរាល់ឆ្នាំ ហើយការលង់ទឹកនេះស្ថិតក្នុងចំណោមមូលហេតុទាំង ១០ នៃការស្លាប់របស់កុមារ ដែលមានអាយុពី ៥-១៤ ឆ្នាំ។ ការស្លាប់ ដោយសារការលង់ទឹកច្រើនជាង ៩០ ភាគរយ កើតឡើងនៅតាមដងទន្លេ បឹង អណ្តូង នាវាផ្ទុកស៊ីទែនទឹកក្នុងស្រុក ហើយនិងអាងហែលទឹកក្នុងប្រទេសដែលមានប្រាក់ចំណូលទាប និងមធ្យម ដោយមានកុមារ និងក្មេងជំទង់នៅតំបន់ជនបទរងផលប៉ះពាល់យ៉ាងខ្លាំង។
«នៅប្រទេសកម្ពុជា ការលង់ទឹក គឺជាបុព្វហេតុចម្បងនៃការស្លាប់ចំពោះកុមារ បន្ទាប់ពីទារក (១-១៧ ឆ្នាំ)។ បើយោងតាមរបាយការណ៍ អត្រាមរណភាពកុមាររបស់អង្គការសុខភាពពិភពលោកឆ្នាំ ២០១៩ បង្ហាញថា ជាមធ្យម កុមារចំនួន ៥ នាក់បានស្លាប់ដោយសារលង់ទឹកជារៀងរាល់ថ្ងៃនៅក្នុងប្រទេសកម្ពុជា។ ដូច្នេះការលង់ទឹក គឺជាគ្រោះថ្នាក់ពិតប្រាកដ និងមិនធ្លាប់មានសម្រាប់កុមារកម្ពុជា»។ នេះបើតាមសេចក្ដីប្រកាសព័ត៌មាន។
លោក ឡោ ហារី ប្រធានកម្មវិធីអប់រំរបស់អង្គការហេបកូដថ្លែងថា៖ «ខ្ញុំសង្កេតឃើញថា ករណីគ្រោះថ្នាក់ដោយការលង់ទឹកស្លាប់ ជាពិសេសលើកុមារកម្ពុជា នៅតែមានស្ទើរគ្រប់ខេត្ត។ ការលង់ទឹកមិនមែនជាបញ្ហាដែលមិនអាចការពារបាននោះទេ។ ខ្ញុំសូមលើកទឹកចិត្តដល់អាណាព្យាបាល សូមចូលរួមយល់ដឹងអំពីសុវត្ថិភាពទឹក ដើម្បីសុវត្ថិភាពដល់គ្រួសាររបស់ពួកគាត់ពីការលង់ទឹក»។
របាយការណ៍ថ្មីរបស់អង្គការសុខភាពពិភពលោកប្រចាំតំបន់អាស៊ីប៉ាស៊ីហ្វិក ចេញផ្សាយនៅថ្ងៃទី ២២ ខែ កក្កដា ឆ្នាំ ២០២១ បានផ្តល់នូវអនុសាសន៍សម្រាប់សកម្មភាពដើម្បីជួយសង្គ្រោះជីវិតមនុស្ស។ របាយការណ៍នេះបានបង្ហាញថា ជិត ២ ភាគ ៣ នៃការស្លាប់ដោយសារលង់ទឹកលើពិភពលោកគឺកើតឡើងនៅតំបន់អាស៊ីប៉ាស៊ីហ្វិក។
នៅឆ្នាំ ២០១៩ ប្រជាជនជាង ១៤៤ ០០០ នាក់ បានលង់ទឹកស្លាប់នៅតំបន់អាស៊ីប៉ាស៊ីហ្វិក ដែលស្មើនឹង ៦១% នៃការស្លាប់ដោយសារលង់ទឹកពិភពលោក។ នេះបើយោងតាមការវាយតម្លៃក្នុងតំបន់ដំបូងរបស់អង្គការសុខភាពពិភពលោក (WHO) ស្តីពីការការពារការលង់ទឹកដែលបានចេញផ្សាយនៅថ្ងៃទី ២២ ខែកក្កដា មុនថ្ងៃទិវាបង្ការការលង់ទឹកពិភពលោក។
តាមរយៈសេចក្ដីសម្រេចមហាសន្និបាតស្ដីពី «ការបង្ការការលង់ទឹកពិភពលោក» បានដាក់ចេញវិធានការមួយចំនួន ដូចជា ទី១ បង្រៀនហែលទឹក បង្រៀនសុវត្ថិភាពទឹក និងជំនាញសង្គ្រោះដោយសុវត្ថិភាព។ ទី២ បណ្តុះបណ្តាលអ្នកឈរមើលក្នុងការជួយសង្គ្រោះ និងជួយសង្គ្រោះដោយសុវត្ថិភាព។ ទី៣ ផ្តល់កន្លែងដែលមានសុវត្ថិភាពនៅឆ្ងាយពីទឹកដូចជាកន្លែងសម្រាប់សិស្សមត្តេយ្យ ដោយមានការថែទាំប្រកបដោយសមត្ថភាព។ ទី៤ ដំឡើងរនាំងការពារ ដោយការគ្រប់គ្រងការចូលទៅកន្លែងទឹក។ ទី៥ កំណត់ និងអនុវត្តបទបញ្ជា ការជិះទូក ការដឹកជញ្ជូន និងស្រឡាងដោយសុវត្ថិភាព និងទី៦ ធ្វើឱ្យប្រសើរឡើងនូវការគ្រប់គ្រងហានិភ័យទឹកជំនន់។
លោកស្រី Mary Mccabe ប្រធានអង្គការ ហេបកូដ ប្រចាំប្រទេសកម្ពុជាឱ្យដឹងថា នៅប្រទេសកម្ពុជា អង្គការហេបកូដ ធ្វើការដើម្បីការពារសុខុមាលភាពរបស់កុមារងាយរងគ្រោះបំផុតនៅកម្ពុជា និងកំពុងអនុវត្តកម្មវិធី ការពារសុវត្ថិភាពទឹក និងលង់ទឹកតាំងពីឆ្នាំ ២០១៨ មក ដោយសហការជាមួយមន្ទីរអប់រំ យុវជន និងកីឡា ខេត្តព្រះសីហនុ។ តាមរយៈកិច្ចសហការនេះអង្គការបានផ្តល់លទ្ធភាពដល់នាយកសាលាធ្វើការសម្របសម្រួលពេលវេលាសម្រាប់សិស្សក្នុងថ្នាក់នីមួយៗ។ ចូលរួមកម្មវិធីសុវត្ថិភាពទឹក និងកម្មវិធីបណ្តុះបណ្តាលសង្គ្រោះបឋម ដើម្បីគាំទ្រដល់តម្រូវការចាំបាច់ក្នុងការការពារកុមារពីការលង់ទឹក។
លោកស្រីបញ្ជាក់ថា៖ «អង្គការ ហេបកូដ កំពុងធ្វើការយ៉ាងសកម្ម ជាមួយក្រសួងអប់រំ យុវជន និងកីឡា ដើម្បីបន្តបេសកកម្មរបស់ខ្លួន ដើម្បីកសាងកម្មវិធីការពារការលង់ទឹកនាពេលបច្ចុប្បន្ននៅក្នុងប្រទេស និងបង្កើនកម្មវិធីភូមិសាស្ត្រនៅទូទាំងប្រទេស ដើម្បីរក្សាការពារកុមារកម្ពុជា និងគ្រួសាររបស់ពួកគេឱ្យមានសុវតិ្ថភាពពីការលង់ទឹក»។
អង្គការ ហេបកូដ ក៏បានប្រកាសស្វែងរកការគាំទ្រពីសប្បុរសជន ប្រសិនបើចង់គាំទ្រសកម្មភាពដែលអាចជួយដល់កុមារកម្ពុជាឱ្យមានសុវត្ថិភាពពីគ្រោះថ្នាក់នៃការលង់ទឹក អាចបរិច្ចាគជំនួយតាមរយៈធនាគារ JTrust Bank តាមរយៈលេខគណនេយ្យ 4312289។
លោកស្រី អ៊ុច សោភា ប្រធានមន្ទីរអប់រំ យុវជន និងកីឡាខេត្ដព្រះសីហនុ ថ្លែងពីម្សិលមិញថា តាមរយៈកិច្ចសហការជាមួយអង្គការហេបកូដ មន្ទីរអប់រំខេត្ដព្រះសីហនុបានរៀបចំការផ្សព្វផ្សាយ បញ្ជ្រាបចំណេះដឹងពាក់ព័ន្ធទៅនឹងគ្រោះថ្នាក់នៃការលង់ទឹកនេះ ដោយមានបំពាក់ផ្ទាំងផ្សព្វផ្សាយនៅតាមទីសាធារណៈមួយចំនួន និងប្រជុំផ្សព្វផ្សាយតាមអនឡាញផងដែរ។
លោកស្រីបានថ្លែងទៀតថា៖ «រយៈពេល ៧ ខែនេះ យើងមិនមានគ្រោះថ្នាក់ដោយសារលង់ទឹករបស់កុមារទេ នៅក្នុងខេត្ដព្រះសីហនុ។ ប៉ុន្ដែកាលពីឆ្នាំ ២០២០ កើតមានករណីលង់ទឹកមួយចំនួនក្នុងនោះក៏មានករណីលង់ទឹកសមុទ្រផងដែរ»។
លោកស្រី អ៊ុច សោភា បានបញ្ជាក់ថា៖ «យើងសង្កេតឃើញថា មូលហេតុនៃការលង់ទឹករបស់កុមារ ដោយសារតែមាតា បិតា អ្នកណាព្យាបាលខ្វះការយល់ដឹង ហើយគ្មានការប្រុងប្រយ័ត្នទើបបណ្ដាលឱ្យកុមារលង់ទឹកស្លាប់»៕