តាកែវៈ តុលាការខេត្តតាកែវបានសម្រេចឃុំខ្លួនបុរសម្នាក់ក្នុងពន្ធនាគារខេត្តនៅថ្ងៃទី ២១ កក្កដា ក្រោយពីចាប់ខ្លួនបាន ៣ ថ្ងៃ ពាក់ព័ន្ធការវាយក្មេងស្រីម្នាក់អាយុ ២ ឆ្នាំត្រូវចំថ្ងាសរបួសធ្ងន់ ប្រព្រឹត្តនៅភូមិ-ឃុំពពេល ស្រុកត្រាំកក់។
លោកព្រះរាជអាជ្ញារង លឹម សុខន និងជាអ្នកនាំពាក្យអយ្យកាអមសាលាដំបូងខេត្តតាកែវ ប្រាប់នៅថ្ងៃទី ២២ ខែកក្កដាថា ជនត្រូវចោទឈ្មោះ ចិត្រ បុល ត្រូវបានចៅក្រមចេញដីកាឃុំខ្លួននៅពន្ធនាគារហើយពីថ្ងៃទី ២១ កក្កដា។
លោកថ្លែងថា៖ «គាត់ត្រូវបានតំណាងអយ្យការ ចោទពីបទហិង្សាមានស្ថានទម្ងន់ទោសតាមមាត្រា ២១៨ នៃក្រមព្រហ្មទណ្ឌ»។ យោងតាមមាត្រា ២១៨ នៃក្រមព្រហ្មទណ្ឌប្រសិនបើតុលាការរកឃើញថា ជនត្រូវចោទពិតជាបានប្រើអំពើហិង្សាវាយក្មេងមែននោះ នឹងត្រូវផ្តន្ទាទោសជាប់ពន្ធនាគារពី ២ ឆ្នាំទៅដល់ ៥ ឆ្នាំ និងពិន័យពី ២ ទៅ ៤ លានរៀល។
ពាក់ព័ន្ធអង្គហេតុនៃរឿងនេះនៅថ្ងៃទី ២២ ខែកក្កដា ត្រូវបានលោក ឌុច ធីយ៉ា អធិការនគរបាលស្រុកត្រាំកក់ឱ្យដឹងតាមសម្តីសាច់ញាតិរបស់ជនត្រូវចោទថា ជនត្រូវចោទឈ្មោះ ចិត្រ បុល អាយុ ៤៩ ឆ្នាំម្នាក់នេះ ជាមនុស្សសរសៃប្រសាទមានស្មារតីវង្វេងវង្វាន់ ដោយសារតែគាត់ញៀនស្រា។
លោកបន្តថា កាលពីវេលាម៉ោងជាង ៤ រសៀល ថ្ងៃទី ១៨ កក្កដា មានបុរសម្នាក់បានជិះម៉ូតូ ១ គ្រឿង កាត់ភូមិដោយឌុបកូនដែលជាក្មេងស្រីរងគ្រោះ។ ពេលនោះស្រាប់តែជនត្រូវចោទបានកាន់បំពង់ទីបដេញវាយជនរងគ្រោះ ខណៈកំពុងតែជិះម៉ូតូយឺតៗ បណ្តាលឱ្យត្រូវចំថ្ងាសក្មេងស្រីរងគ្រោះ ហូរឈាមរបួសធ្ងន់ រីឯឪពុកក៏ត្រូវរបួសដៃដែរ។
លោកបញ្ជាក់ថា៖ «ជននោះ គាត់មិនមែនមនុស្សញៀនថ្នាំញៀនទេ តែគាត់សរសៃប្រសាទ។ នៅថ្ងៃនោះគាត់វាយឪពុករបួសស្រាលតែកូនគាត់របួសធ្ងន់»។
លោក ធីយ៉ា បញ្ជាក់ថា ហេតុការណ៍នោះ ប្រជាពលរដ្ឋបានរាយការណ៍ទៅនគរបាលប៉ុស្តិ៍ឃុំពពេល ហើយនគរបាលឃុំបានរាយការណ៍មកអធិការដ្ឋាននគរបាលស្រុកត្រាំកក់។ បន្ទាប់ពីទទួលបានព័ត៌មានហើយគឺកម្លាំងសមត្ថកិច្ចស្រុក រួមទាំងកម្លាំងនគរបាលប៉ុស្តិ៍រដ្ឋបាលឃុំពពេលបានចុះដល់កន្លែងកើតហេតុ។
លោកបន្តទៀតថា នៅពេលសមត្ថកិច្ចលោកចុះដល់ទីតាំងកើតហេតុ គឺជនសង្ស័យបានគេចខ្លួនបាត់ តែក្រោយប៉ុន្មានម៉ោង ទើបសមត្ថកិច្ចលោកស្រាវជ្រាវចាប់បាន។
លោកបន្ថែមថា រហូតដល់ថ្ងៃទី ២២ កក្កដា គឺកុមាររងគ្រោះកំពុងព្យាបាលនៅមន្ទីរពេទ្យគន្ធបុប្ផានៅឡើយ៕