ភ្នំពេញៈ ក្រសួងអប់រំយុវជន និងកីឡាប្រកាសជ្រើសរើសនិស្សិតអាហារូបករណ៍ថ្នាក់បរិញ្ញាបត្រទៅសិក្សានៅសាកលវិទ្យាល័យ DALI នៃសាធារណរដ្ឋប្រជាមានិតចិន សម្រាប់ឆ្នាំសិក្សា ២០២១-២០២២។ នេះបើតាមសេចក្តីជូនដំណឹងរបស់ក្រសួងអប់រំ កាលពីថ្ងៃទី ២០ កក្កដា ឆ្នាំ ២០២១។
សាកលវិទ្យាល័យ DALI នៃសាធារណរដ្ឋប្រជាមានិតចិនបានផ្តល់អាហារូបករណ៍ថ្នាក់បរិញ្ញាបត្រចំនួន ១០ កន្លែង ដល់និស្សិតកម្ពុជា ដើម្បីទៅបន្តការសិក្សា។ សាកលវិទ្យាល័យនឹងផ្តល់ការចំណាយផ្សេងៗដូចជាការស្នាក់នៅ ការសិក្សា និងប្រាក់អាហារូបករណ៍ប្រចាំខែ ៤០០ យ័ន (ប្រហែល ៦២ ដុល្លារសហរដ្ឋអាមេរិក)។ ប៉ុន្តែការចំណាយលើសោហ៊ុយធ្វើដំណើរ គឺជាបន្ទុករបស់សាមីជន។ សេចក្តីប្រកាសនេះបានបញ្ជាក់ថា ការជ្រើសរើសនិស្សិតអាហារូបករណ៍នេះ នឹងធ្វើឡើងតាមរយៈការជ្រើសរើសនិស្សិតដែលទទួលបានពិន្ទុខ្ពស់ជាងគេចំនួន ១០ នាក់។
ការប្រឡងនឹងធ្វើឡើងនៅថ្ងៃទី ២៩ ខែសីហាឆ្នាំ ២០២១ ជាមួយនឹងវិញ្ញាសាប្រឡងគណិតវិទ្យា និងភាសាអង់គ្លេស ដោយមានរយៈពេលកំណត់ ១ ម៉ោងកន្លះ សម្រាប់ ១ មុខវិជ្ជា។
បេក្ខជនទាំងអស់ត្រូវមានសញ្ជាតិខ្មែរ មានអាយុមិនលើស ២៥ ឆ្នាំ មានកាយសម្បទា និងសតិបញ្ញាបរិបូរណ៍បូករួមនឹងមានសញ្ញាបត្រមធ្យមសិក្សាទុតិយភូមិ ឬសញ្ញាបត្រមានតម្លៃសមមូល។ និស្សិតអាចជ្រើសរើសជំនាញសិក្សាបាននៅពេលរៀនចប់ភាសាចិនដោយជោគជ័យ។
ការចែក និងទទួលពាក្យនឹងប្រព្រឹត្តទៅចាប់ពីថ្ងៃដែលសេចក្តីប្រកាសព័ត៌មានចេញផ្សាយរហូតដល់ថ្ងៃទី ២៤ ខែ សីហាឆ្នាំ ២០២១ នៅការិយាល័យអាហារូបករណ៍ និងកម្មសិក្សានៃនាយកដ្ឋានទំនាក់ទំនងវប្បធម៌ និងអាហារូបករណ៍។
បេក្ខជនក៏អាចទាញយកពាក្យសុំប្រឡងតាមរយៈតំណ https://bit.ly/3zl0l5m មកបំពេញ និងផ្ញើមកការិយាល័យអាហារូបករណ៍ និងកម្មសិក្សាតាមរយៈតេឡេក្រាមដែលមានលេខទូរស័ព្ទ ០១២ ៦៧៧ ៤៣៣ បានផងដែរ។
លោក រស់ សុវាចា អ្នកនាំពាក្យក្រសួងអប់រំបានប្រាប់ ភ្នំពេញ ប៉ុស្តិ៍ថា៖ «ឱកាសអាហារូបករណ៍ទាំងអស់ដែលសិស្ស-និស្សិតកម្ពុជាទទួលបានមានតួនាទីសំខាន់មួយ ក្នុងការចូលរួមលើកកម្ពស់គុណភាពមូលធនមនុស្សដែលចូលរួមអភិវឌ្ឍសេដ្ឋកិច្ចកម្ពុជាលើគ្រប់វិស័យនាពេលបច្ចុប្បន្ន និងអនាគត»។
លោកបន្តថា៖ «ឱកាសអាហារូបករណ៍ទាំងអស់ឆ្លើយតបទៅនឹងការអប់រំពលរដ្ឋសកលដែលមានបំណងចូលរួមពង្រឹងសមត្ថភាពសិស្ស-និស្សិតគ្រប់កម្រិតឱ្យក្លាយជាពលរដ្ឋសកលដែលមានចរិយាសម្បទាវិជ្ជាសម្បទា បំណិនសម្បទា និងគុណតម្លៃ ឆ្លើយតបនឹងបរិបទជាតិតំបន់ និងពិភពលោក។
លោកបន្តថា ជាទូទៅក្រសួងអប់រំ ផ្សព្វផ្សាយជាសាធារណ: និងលើកទឹកចិត្តសិស្ស-និស្សិតស្តីពីឱកាសអាហារូបករណ៍ជាតិ តំបន់ និងអន្តរជាតិតាមយន្តការដែលមានស្រាប់របស់ក្រសួងអប់រំយុវជន និងកីឡា ទន្ទឹមនឹងកិច្ចសហការជាមួយក្រសួងស្ថាប័នគ្រឹះស្ថានសិក្សាពាក់ព័ន្ធជាពិសេសគ្រឹះស្ថានឧត្តមសិក្សាក្នុងប្រទេសកម្ពុជា និងប្រទេសជាមិត្ត។
បើតាមលោក រស់ សុវាចា ចាប់តាំងពីឆ្នាំ ១៩៨០ ដល់ឆ្នាំ ២០២០ និស្សិតកម្ពុជាចំនួន ១៩ ៥៤៦ នាក់ បានទទួលអាហារូបករណ៍ទៅសិក្សានៅបរទេស។ ក្នុងនោះនិស្សិតចំនួន ១ ៧៥៥ នាក់ទទួលបានអាហារូបករណ៍ទៅសិក្សានៅប្រទេសចិន។
កាលពីឆ្នាំ ២០២០ មាននិស្សិត កម្ពុជាសរុប ៤២១ នាក់ ទទួលបានអាហារូបករណ៍ពីប្រទេសផ្សេងៗ ក្នុងនោះមាននិស្សិតកម្ពុជា ១៥៥ នាក់ទទួលបានអាហារូបករណ៍ពីប្រទេសចិន៕
រ៉ូ គីមឡុង