ភ្នំពេញៈ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន គ្រោងនឹងដាក់ដំណើរការសាកល្បង និងផ្សព្វផ្សាយដល់សាធារណជននូវកម្មវិធីដកពិន្ទុបណ្ណបើកបរ និងពិន័យបទល្មើសចរាចរណ៍ផ្លូវគោក នៅខែកញ្ញា បន្ទាប់ពីធ្វើការបណ្តុះបណ្តាលកម្មវិធីនេះដល់មន្ត្រីនគរបាលចរាចរណ៍នៅខែសីហាខាងមុខរួច។
នៅក្នុងកិច្ចប្រជុំរាយការណ៍វឌ្ឍនភាពការងារកម្មវិធីដកពិន្ទុបណ្ណបើកបរ និងពិន័យលើបទល្មើសចរាចរណ៍ ផ្លូវគោក ជូនលោក ស ខេង រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិ សុវត្ថិភាពចរាចរណ៍ផ្លូវគោក តាមប្រព័ន្ធវីដេអូពីចម្ងាយ កាលពីថ្ងៃទី ២២ ខែកក្កដា លោក ស៊ុន ចាន់ថុល បានលើកឡើងថា ក្រសួងសាធារណការ និងដឹកជញ្ជូន ត្រៀមនឹងប្រគល់ទទួលឧបករណ៍ដកពិន្ទុ និងពិន័យរួមគ្នា ចំនួន ៥០០ គ្រឿង ដល់អគ្គស្នងការនគរបាលជាតិ ហើយកម្មវិធីនេះនឹងត្រូវសម្ពោធ ដាក់ប្រើប្រាស់ផ្លូវការនៅដើមឆ្នាំ ២០២២។
កម្មវិធីដកពិន្ទុបណ្ណបើកបរ និងពិន័យលើបទល្មើសចរាចរណ៍ផ្លូវគោក គឺជាកម្មវិធីបច្ចេកវិទ្យា ដែលអនុញ្ញាតឱ្យមន្ត្រីនគរបាលចរាចរណ៍ ធ្វើការដកពិន្ទុលើបណ្ណបើកបរ និងពិន័យលើបទល្មើស ចរាចរណ៍ផ្លូវគោក ដើម្បីពង្រឹងការអនុវត្តច្បាប់ចរាចរណ៍ផ្លូវគោក។
ក្នុងនោះ លក្ខណពិសេសដូចជា ការស្គាល់ទម្រង់បណ្ណរួមមាន បណ្ណបើកបរ លិខិតឆ្លងដែន អត្តសញ្ញាណបណ្ណ និងបណ្ណសម្គាល់យានយន្ត និងអាចដឹងថា បណ្ណបើកបរត្រឹមត្រូវ ឬក្លែងក្លាយ ដឹងពីប្រតិបត្តិការនៃការកាត់ពិន្ទុ និងពិន័យលឿនរហ័ស ដឹងទីតាំងភូមិសាស្ត្រ និងប្រវត្តិនៃការដកពិន្ទុ និងពិន័យ និងអាចកត់ត្រារាល់ទិន្នន័យ ដែលអាចប្រើប្រាស់ជាយុទ្ធសាស្ត្រ សម្រាប់កាត់បន្ថយគ្រោះថ្នាក់ចរាចរណ៍។
លោក ស ខេង បានគាំទ្រយ៉ាងពេញទំហឹងលើគំនិតផ្តួចផ្តើមនេះ ហើយលោកក៏ស្នើឱ្យពន្លឿនលើខ្លឹមសារ ប្រកាសអន្តរក្រសួង ដែលបានព្រាងរួចរាល់ និងឯកភាពក្នុងកម្រិតបច្ចេកទេស។
ជាមួយជាគ្នានោះដែរ លោក ស ខេង ក៏បានស្នើឱ្យក្រសួងយកចិត្តទុកដាក់ឱ្យបានខ្ពស់ ក្នុងការផ្សព្វផ្សាយ ពន្យល់ណែនាំពីនីតិវិធីនៃការកាត់ពិន្ទុ និងប្រឡងបំពេញពិន្ទុឡើងវិញ ជូនសាធារណជន ដែលត្រូវអនុវត្ត ត្រួតពិនិត្យ និងផាកពិន័យ ដើម្បីទប់ស្កាត់ និងកាត់បន្ថយគ្រោះថ្នាក់ចរាចរណ៍។
ឆ្លៀតក្នុងឱកាសនោះដែរ លោក ស៊ុន ចាន់ថុល ក៏បានលើកឡើងពីការរៀបចំដំឡើងប្រព័ន្ធកាមេរ៉ា ចាប់ល្បឿនលើផ្លូវជាតិមួយចំនួន ដោយសហការជាមួយអគ្គស្នងការនគរបាលជាតិ។
លោកថ្លែងថា៖ «នៅតាមដងផ្លូវជាតិលេខ ៣ ចាប់ពីចោមចៅ ដល់កំពត ក្រុមការងារនឹងបំពាក់ប្រព័ន្ធកាមេរ៉ាចាប់ល្បឿន ១០ ទីតាំង ចំនួន ១៤ ឈុត និងកំពុងសិក្សាបំពាក់ប្រព័ន្ធកាមេរ៉ាចាប់ល្បឿន លើផ្លូវជាតិលេខ ៧ ស្គន់ទៅកំពង់ចាម ព្រមទាំងពិនិត្យលទ្ធភាពស្នើសុំ JICA បំពាក់កាមេរ៉ានេះលើផ្លូវជាតិលេខ ៥ ផងដែរ»។
ជាការឆ្លើយតប លោក ស ខេង បានកោតសរសើរលើការរៀបចំប្រព័ន្ធកាមេរ៉ាចាប់ល្បឿន និងគាំទ្រលើចំណាត់ការរបស់ក្រសួងសាធារណការ និងដឹកជញ្ជូនលើបញ្ហាបាតុភាពមិនត្រឹមត្រូវណាមួយ ដោយត្រូវអនុវត្តតាមច្បាប់ និងមិនមានការលើកលែងខុសពីច្បាប់ឡើយ៕