ភ្នំពេញ៖ អភិបាលរាជធានីភ្នំពេញ លោក ឃួង ស្រេង បានឱ្យដឹងថា មកដល់ពេលនេះ ស្ថានភាពនៃការឆ្លងរាលដាលនៃជំងឺកូវីដ ១៩ មានការថយចុះគួរឱ្យកត់សម្គាល់នៅក្នុងទូទាំង ១៤ ខណ្ឌ ប៉ុន្តែនៅមានឃើញការឆ្លងច្រើននៅក្នុងខណ្ឌចំនួន ២។
លោកបានថ្លែងនៅក្នុងបទសម្ភាសន៍មួយនៅថ្ងៃទី ២៣ ខែកក្កដា នេះថា ខណ្ឌចំនួន ២ ក្នុងរាជធានីភ្នំពេញ នៅឃើញមានការឆ្លងច្រើនជាងខណ្ឌចំនួន ១២ ផ្សេងទៀត ប៉ុន្តែការឆ្លងច្រើននេះ មិនច្រើនខ្លាំងក្លានោះទេ បើធៀបនឹងការឆ្លងរាលដាលក្នុងរយៈពេលប៉ុន្មានខែកន្លងមក ដែលមានអ្នកឆ្លងរាប់រាយនាក់ក្នុងមួយថ្ងៃ។
លោក ឃួង ស្រេង មានប្រសាសន៍ថា៖ «គ្រប់បណ្តាខណ្ឌមានការស្រកចុះហើយ ប៉ុន្តែសម្រាប់ខណ្ឌមានជ័យ និងខណ្ឌពោធិ៍សែនជ័យ នៅមានចំនួនឆ្លងច្រើនជាងគេបន្តិច ប៉ុន្តែបើនិយាយជាទូទៅក្នុងភូមិសាស្រ្តរាជធានីភ្នំពេញមានការថយច្រើននូវអ្នកជំងឺនៅគ្រប់បណ្តាខណ្ឌទាំងអស់ គ្រាន់តែនៅខណ្ឌ ២ មានតួលេខខ្ពស់ជាងខណ្ឌផ្សេងៗ ដោយសារមានរោងចក្រ និងមានកម្មករច្រើន»។
លោកអភិបាលក្រុងបានបញ្ជាក់ទៀតថា ការស្រកចុះនៃតួលេខអ្នកឆ្លងវីរុសកូវីដ ១៩ នៅក្នុងរាជធានីភ្នំពេញនេះ ក៏អាចជាចំណែកមួយនៃការចាក់វ៉ាក់សាំងបានច្រើន ហើយប្រសិទ្ធភាពនៃវ៉ាក់សាំងនេះ កំពុងតែជួយទៅដល់ប្រជាពលរដ្ឋក្នុងភូមិសាស្រ្តខណ្ឌទាំងអស់នេះផងដែរ។
លោកមានប្រសាសន៍ថា៖ «ខ្ញុំសង្កេតឃើញថា ក្រោយពីមានការប្រុងប្រយ័ត្នរួម និងការផ្តល់វ៉ាក់សាំងបានគ្រប់គ្នាហើយនេះ យើងឃើញថា ក្នុងសប្តាហ៍នេះ អ្នកឆ្លងជំងឺកូវីដ ១៩ ក្នុងរាជធានីភ្នំពេញមានការថយចុះ។ ដូចនេះខ្ញុំអាចសន្និដ្ឋានបានថា ឥទ្ធិពលវ៉ាក់សាំងកំពុងតែបញ្ចេញសកម្មភាព ដើម្បីការពារអាយុជីវិតរបស់ប្រជាពលរដ្ឋ»។
លោក ឃួង ស្រេង បានលើកឡើងទៀតថា ការថយចុះនេះ ក៏ដោយសារតែប្រជាពលរដ្ឋមានការប្រុងប្រយ័ត្នផងដែរ។
គួរបញ្ជាក់ថា ភូមិសាស្រ្តរាជធានីភ្នំពេញបានបញ្ចប់យុទ្ធនាការចាក់វ៉ាក់សាំងបង្ការជំងឺកូវីដ ១៩ កាលពីថ្ងៃទី ០៨ ខែកក្កដា កន្លងមកនេះ ដែលមានអ្នកចាក់វ៉ាក់សាំងលើសផែនការកំណត់។
យោងតាមរបាយការណ៍របស់ក្រសួងសុខាភិបាល គិតត្រឹមយប់ថ្ងៃទី ២២ ខែកក្កដា ប្រជាពលរដ្ឋជាង ៦,៤ លាននាក់ ឬស្មើនឹង ៦៤% ធៀបនឹងប្រជាពលរដ្ឋគោលដៅ ១០ លាននាក់នៅទូទាំងប្រទេសបានទទួលការចាក់វ៉ាក់សាំង៕
វីដេអូ៖