.jpg)
មន្ដ្រីនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» កាលពីយប់ថ្ងៃទី ២២-២៣ ខែកក្កដានេះ បន្តបង្ក្រាបអាល់កុលក្លែងក្លាយ (មេតាណុល និងអេតាណុល) សរុបចំនួន ៦២៩ កាន ស្មើនឹង ១៨ ៨៧០ លីត្រទៀតនៅរាជធានីភ្នំពេញ។
ភ្នំពេញៈ មន្ដ្រីនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» កាលពីយប់ថ្ងៃទី ២២-២៣ ខែកក្កដានេះ បន្តបង្ក្រាបអាល់កុលក្លែងក្លាយ (មេតាណុល និងអេតាណុល) សរុបចំនួន ៦២៩ កាន ស្មើនឹង ១៨ ៨៧០ លីត្រទៀតនៅរាជធានីភ្នំពេញ។
បើតាមអគ្គនាយកដ្ឋាន ក.ប.ប. បន្ទាប់ពីបានទទួលករណីសង្ស័យលើការចរាចរអាល់កុលក្លែងក្លាយលើទីផ្សារ កាលពីយប់ថ្ងៃទី ២២ ខែកក្កដា ឆ្នាំ ២០២១ នេះ មន្ត្រីអគ្គនាយកដ្ឋាន ក.ប.ប. ដោយទទួលបានការណែនាំពី លោក ផាន អូន អគ្គនាយកនៃអគ្គនាយកដ្ឋាន ក.ប.ប. បានចុះអង្កេតតាមបណ្តោយផ្លូវ ៣៧១ លើមធ្យោបាយដឹកជញ្ជូនជាម៉ូតូកង់បី និងរថយន្តដឹកអាល់កុលជាលទ្ធផលជាក់ស្តែងពិនិត្យឃើញថា ជាសារធាតុមេតាណុល ហើយឃាត់បានម៉ូតូកង់បី ៤ គ្រឿង និងរថយន្តកូរ៉េ ១គ្រឿង សរុបមានអាល់កុលចំនួន ១១២ កាន ស្មើនឹង ៣ ៣៦០ លីត្រ។
លោក ផាន អូន បានថ្លែងថា បន្ទាប់ពីបានធ្វើកំណត់ហេតុមន្ត្រីជំនាញបានបញ្ជូនមធ្យោបាយជាវត្ថុតាងទៅរក្សាទុកនៅអគ្គនាយកដ្ឋានជាបឋម ហើយបានកំណត់មុខសញ្ញាទីតាំងឃ្លាំងស្តុកទុក ចែកចាយ ដោយតាមឃ្លាំមើលជាប្រចាំ។
លោកបានបញ្ជាក់ថា៖ «លុះព្រឹកថ្ងៃទី ២៣ ខែកក្កដា ឆ្នាំ ២០២១ មន្ត្រីអគ្គនាយកដ្ឋាន ក.ប.ប. បានរៀបចំនីតិវិធីចុះឆែកឆេរទីតាំងស្តុក ដោយមានការឯកភាពពីឯកឧត្តមព្រះរាជអាជ្ញាបានចុះត្រួតពិនិត្យ ដកហូត និងឃាត់ទុកបណ្តោះអាសន្ន មេតាណុល និងអេតាណុលសរុបចំនួន ៦២៩ កាន ស្មើនឹង ១៨ ៨៧០ លីត្រ នៅទីតាំងស្តុកទុកមួយកន្លែងស្ថិតក្នុងភូមិសាស្ត្រខណ្ឌដង្កោ រាជធានីភ្នំពេញ»។
លោកបានឱ្យដឹងថា បច្ចុប្បន្ន សមត្ថកិច្ចចម្រុះសម្រេចបិទឃ្លាំងស្ដុកអាល់កុលក្លែងក្លាយនេះជាបណ្តោះអាសន្ន ដើម្បីដោះស្រាយតាមផ្លូវច្បាប់។ ប្រតិបត្តិការនេះ ប្រព្រឹត្តទៅដោយមានការចូលរួមពីអាជ្ញាធរមូលដ្ឋានផងដែរ៕
