ភ្នំពេញៈ ជនសង្ស័យចំនួន ២ នាក់ក្នុងនោះស្រីម្នាក់ត្រូវបានសមត្ថកិច្ច មន្ទីរប្រឆាំងបទល្មើសគ្រឿងញៀននៃអគ្គស្នងការដ្ឋាននគរបាលជាតិ កសាងសំណុំរឿងបញ្ចូនទៅតុលាការ ដើម្បីអនុវត្ដតាមនីតិវិធី ក្រោយឃាត់ខ្លួនបាន នៅខណ្ឌឫស្សីកែវ និងខណ្ឌសែនសុខកាលពីថ្ងៃទី ២០ ខែកក្កដា ឆ្នាំ ២០២១ ជាមួយនឹងគ្រឿងញៀនជាង ៥០ គីឡូក្រាម។
យោងតាមរបាយការណ៍របស់អគ្គស្នងការនគរបាលជាតិកាលពីថ្ងៃទី ២០ ខែកក្កដា ឆ្នាំ ២០២១ វេលាម៉ោង ១០ និង ៣៥ នាទី កម្លាំងជំនាញនៃមន្ទីរប្រឆាំងបទល្មើសគ្រឿងញៀន (ក១) ដឹកនាំដោយលោក អ៊ិន សុង នាយករងមន្ទីរ និងលោក ហុង វណ្ណារិទ្ធ នាយការិយាល័យ (ក១) សហការជាមួយកម្លាំងជំនាញស្នងការដ្ឋាននគរបាលរាជធានីភ្នំពេញ សម្របសម្រួលដោយលោក ស៊ិត វណ្ណៈ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ចុះស្រាវជ្រាវ និងឈានទៅបង្ក្រាបក្រុមឧក្រិដ្ឋជនជួញដូរដោយខុសច្បាប់ នូវសារធាតុញៀននៅ ៤ ទីតាំងផ្សេងគ្នាជាបន្តបន្ទាប់។
ទីតាំងចុះបង្ក្រាបទាំងនោះរួមមាន ទី១-នៅចំណុចផ្លូវលំ សង្កាត់ទួលសង្កែ១ ខណ្ឌឫស្សីកែវ។ ទី២-នៅចំណុចអតីតរោងចក្រទឹកដោះគោលើផ្លូវជាតិលេខ ៥ សង្កាត់ទួលសង្កែ១ ខណ្ឌឫស្សីកែវ។ ទី៣-នៅចំណុចផ្ទះជួលលេខ ១៣២៩ ផ្លូវ ១០៣ ភូមិទួលថ្លាន់ សង្កាត់ទួលសង្កែ២ ខណ្ឌឫស្សីកែវ។ ទី៤-ផ្ទះដេ២ ផ្លូវបេតុង ភូមិក្រាំងធ្នង់ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។
របាយការណ៍បញ្ជាក់ថា ជាលទ្ធផលកម្លាំងជំនាញឃាត់ខ្លួនជនសង្ស័យ ២ នាក់ រួមមាន ១ ឈ្មោះ សាន ពិសិដ្ឋ ភេទប្រុស អាយុ ៣៧ ឆ្នាំ ជនជាតិខ្មែរ និង ២ ឈ្មោះ សុខ ពន្លក ភេទប្រុស អាយុ ៣០ ឆ្នាំ ជនជាតិខ្មែរ។
សមត្ថកិច្ចជំនាញក៏បានចាប់យកវត្ថុតាងរួមមាន ១ មេតំហ្វេតាមីន (ICE) ៣០ កញ្ចប់ធំ ៤ កញ្ចប់តូច ស្មើទម្ងន់ជាង ៣០ គីឡូក្រាម ២ កេតាមីន (Ketamine) ២០ កញ្ចប់ធំ ស្មើទម្ងន់ជាង ១៩ គីឡូក្រាម ៣ ទូរស័ព្ទ ៣ គ្រឿង, ៤ ម៉ូតូ ១ គ្រឿង ៥-រថយន្ត ១ គ្រឿង។ សរុបសារធាតុញៀនចំនួនជាង ៥០ គីឡូក្រាម។
របាយការណ៍ដដែលបញ្ជាក់ថាក្រោយបញ្ចប់ការធ្វើតេស្ដសារធាតុញៀនជាង ៥០ គីឡូក្រាម និងបង្ហាញមុខជនសង្ស័យកាលពី ថ្ងៃទី ២៣ ខែកក្កដា ឆ្នាំ ២០២១ នេះនៅមន្ទីរប្រឆាំងបទល្មើសគ្រឿងញៀននៃអគ្គស្នងការដ្ឋាននគរបាលជាតិ ជនសង្ស័យ និងវត្ថុតាងខាងលើបានកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធី៕