.jpg)
ជនត្រូវចោទ ដែលបានវ៉ៃដោយបំពង់ទីបលើក្មេងស្រីអាយុ ២ ឆ្នាំឱ្យរបួសធ្ងន់រហូតដល់ស្លាប់។ រូបថត CPU
តាកែវៈ អង្គភាពការពារកុមារ (CPU) អះអាងថា ក្នុងកិច្ចសហប្រតិបត្តិការជាមួយស្នងការដ្ឋាននគរបាលខេត្តតាកែវនឹងពិនិត្យសំណុំរឿងឡើងវិញ ដើម្បីធ្វើឱ្យប្រាកដថាជនល្មើសនឹងទទួលនូវការផ្តន្ទាទោសសមស្របបំផុត ក្រោយពីកុមារីរងគ្រោះពីករណីហិង្សានៅខេត្តតាកែវដោយបុរសម្នាក់វាយដោយបំពង់ទីបបានស្លាប់កាលពីល្ងាចថ្ងៃទី ២២ ខែកក្កដា។ នេះបើតាមអង្គភាព CPU។
កាលពីវេលាម៉ោងជាង ៤ រសៀល ថ្ងៃទី ១៨ កក្កដា មានបុរសម្នាក់បានជិះម៉ូតូ ១ គ្រឿងកាត់ភូមិ-ឃុំពពេល ស្រុកត្រាំកក់ ដោយឌុបកូនដែលជាក្មេងស្រីរងគ្រោះឈ្មោះ លី សៀវ។ ពេលនោះស្រាប់តែបុរសឈ្មោះ ចិត្រ បុល បានកាន់បំពង់ទីបដេញវាយជនរងគ្រោះ ខណៈកំពុងតែជិះម៉ូតូយឺតៗបណ្តាលឱ្យត្រូវចំថ្ងាសក្មេងស្រីរងគ្រោះហូរឈាមរបួសធ្ងន់ រីឯឪពុកក៏ត្រូវរបួសដៃផងដែរ។
ហេតុការណ៍នោះត្រូវបានប្រជាពលរដ្ឋបានរាយការណ៍ទៅនគរបាលប៉ុស្តិ៍ឃុំពពេល ហើយនគរបាលឃុំបានរាយការណ៍មកអធិការដ្ឋាននគរបាលស្រុកត្រាំកក់។ បន្ទាប់ពីទទួលបានព័ត៌មានហើយ គឺកម្លាំងសមត្ថកិច្ចស្រុករួមទាំងកម្លាំងនគរបាលប៉ុស្តិ៍រដ្ឋបាលឃុំពពេលបានចុះដល់កន្លែងកើតហេតុ ស្រាវជ្រាវចាប់ជនសង្ស័យបាន។
រហូតដល់ថ្ងៃទី ២១ កក្កដា ក្រោយពីចាប់ខ្លួនបាន ៣ ថ្ងៃ ពាក់ព័ន្ធការវាយក្មេងស្រីម្នាក់អាយុ ២ ឆ្នាំត្រូវចំថ្ងាសរបួសធ្ងន់ ប្រព្រឹត្តនៅភូមិ-ឃុំពពេល ស្រុកត្រាំកក់ តុលាការខេត្តតាកែវបានសម្រេចឃុំខ្លួនបុរសឈ្មោះ ចិត្រ បុល ក្នុងពន្ធនាគារខេត្តតាកែវ។
អង្គភាពការពារកុមារបានឱ្យដឹងកាលពីថ្ងៃទី ២២ ខែកក្កដានេះថា៖ «ខ្ញុំសូមរាយការណ៍ទាំងមានភាពសោកស្តាយយ៉ាងខ្លាំង ថាទោះជាក្រុមគ្រូពេទ្យនៅមន្ទីរពេទ្យគន្ធបុប្ផាបានព្យាយាមអស់ពីសមត្ថភាពយ៉ាងណាក៏ដោយសុខភាពរបស់ក្មេងស្រី លី សៀវ អាយុ ២ ឆ្នាំ មិនបានធូរស្រាលឡើយ និងបានផុតជីវិតកាលពីរសៀលនេះ»។
អង្គភាពការពារកុមារបញ្ជាក់ថានឹងផ្តល់ជំនួយទៅដល់ក្រុមគ្រួសាររងគ្រោះក្នុងការរៀបចំពិធីបុណ្យសព និងជំនួយផ្នែកច្បាប់សម្រាប់រាល់ដំណើរការតុលាការខាងមុខនេះ។
អង្គភាពការពារកុមារអះអាងថា៖ «ក្នុងកិច្ចសហប្រតិបត្តិការជាមួយស្នងការដ្ឋាននគរបាលខេត្តតាកែវនឹងពិនិត្យសំណុំរឿងនេះឡើងវិញ ដើម្បីធ្វើឱ្យប្រាកដថាជនល្មើសនឹងទទួលនូវការផ្តន្ទាទោសសមស្របបំផុត»៕
