សៀមរាបៈ មន្ទីរពេទ្យកុមារអង្គរកាលពីម្សិលមិញបានទទួលថវិកាចំនួន ៥០ ០០០ ដុល្លារអាមេរិកពីកាកបាទក្រហមកម្ពុជា ស្របពេលដែលមន្ទីរពេទ្យនេះកំពុងតែធ្វើយុទ្ធនាការស្វែងរកជំនួយ ដើម្បីទ្រទ្រង់។
តាមរយៈហ្វេសប៊ុកមន្ទីរពេទ្យកុមារអង្គរកាលពីម្សិលមិញបានឲ្យដឹងថា ស្របពេលដែលមន្ទីរពេទ្យកំពុងតែធ្វើយុទ្ធនាការស្វែងរកជំនួយ ដើម្បីទ្រទ្រង់ទៅលើការឆ្លងរីករាលដាលលើកុមារនៅក្នុងមន្ទីរពេទ្យកុមារអង្គរ គណៈប្រតិភូនៃកាកបាទក្រហមកម្ពុជា ជាច្រើនរូបបានអញ្ជើញជួបថ្នាក់ដឹកនាំនៅក្នុងមន្ទីរពេទ្យកុមារអង្គរ ដែលកំពុងជួបការលំបាកនៃការឆ្លងរីករាលដាលជំងឺកូវីដ ១៩ នៅក្នុងមន្ទីរពេទ្យ និងនៅក្នុងសហគមន៍ទូទាំងប្រទេស។
ក្នុងឱកាសនោះ លោកស្រី ពុំ ច័ន្ទីនី អគ្គលេខាធិការកាកបាទក្រហមកម្ពុជា បានប្រគល់ថវិកាចំនួន ៥០ ០០០ ដុល្លារអាមេរិក ដែលជាថវិកាសប្បុរសធម៌ពី លោកស្រី ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាជូនដល់មន្ទីរពេទ្យកុមារអង្គរ ជាមួយនឹងសម្ភារបរិក្ខារប្រើប្រាស់ក្នុងការព្យាបាលថែទាំអ្នកជំងឺនៅក្នុងមន្ទីរពេទ្យមួយចំនួនទៀតជាច្រើន ដើម្បីជួយសម្រាលបន្ទុកនៃការខ្វះខាតបន្ទាន់កំពុងកើតឡើងក្នុងពេលបច្ចុប្បន្ននេះ។
លើបណ្តាញសង្គមហ្វេសប៊ុកមន្ទីរពេទ្យកុមារអង្គរបញ្ជាក់ថា «កាកបាទក្រហមកម្ពុជាបានផ្តល់ជំនួយជាថវិកាសរុបចាប់តាំងពីឆ្នាំ២ ០១៩ រហូតមកដល់បច្ចុប្បន្ននេះគឺមានចំនួន ១២០ ០០០ ដុល្លារអាមេរិក សម្រាប់ការចូលរួមចំណែកនៅក្នុងការបន្តនិរន្តរភាពប្រតិបត្តិការផ្តល់សេវាថែទាំសុខភាពកុមារកម្ពុជាប្រកបដោយគុណភាព ក្តីមេត្តាករុណា និងឥតគិតកម្រៃ»។
ថ្នាក់ដឹកនាំមន្ទីរពេទ្យកុមារអង្គរបានថ្លែងអំណរគុណយ៉ាងជ្រាលជ្រៅបំផុត ចំពោះទឹកចិត្តដ៏សប្បុរសរបស់លោកស្រី ប៊ុន រ៉ានី ហ៊ុន សែន និង លោក លោកស្រី សមាជិកគណៈកម្មាធិការ និងប្រតិបត្តិទាំងអស់របស់កាកបាទក្រហមកម្ពុជានៅក្នុងការយកចិត្តទុកដាក់ដល់មន្ទីរពេទ្យកុមារអង្គរឲ្យមានសុខភាពល្អ និងជោគជ័យគ្រប់ភារកិច្ច។
សូមជម្រាបថា មន្ទីរពេទ្យកុមារអង្គរសហការជាមួយព្រះមហាវិមលធម្ម ពិន សែម សិរីសុវណ្ណោ ព្រះរាជាគណៈថ្នាក់ទោ ជាឧត្តមទីប្រឹក្សាគណៈសង្ឃនាយក និងជាសមាជិកថេរសភានៃព្រះពុទ្ធសាសនានៅព្រះរាជាណាចក្រកម្ពុជា ព្រមទាំងសប្បុរសជនជាច្រើននាក់ទៀតនឹងរៀបចំពិធីបុណ្យផ្កាប្រាក់មហាសាមគ្គីឆ្នាំទី ៨ ដោយរៀបចំជា ២ វគ្គ។ គឺកម្មវិធីសម្តែងព្រះធម៌ទេសនាជាធម្មទាន និងមានការផ្សាយផ្ទាល់តាមប្រព័ន្ធអនឡាញ បណ្តាញសង្គមហ្វេសប៊ុករបស់មន្ទីរពេទ្យកុមារអង្គរ ដោយធម្មកថិកល្បីៗទាំងក្នុង និងក្រៅប្រទេស ចាប់ពីម៉ោង ៩ ដល់ម៉ោង ១០ ព្រឹករៀងរាល់ថ្ងៃ ចាប់ពីថ្ងៃទី ១៣ ដល់ ២៨ ខែសីហា ២០២១ ជាមួយនឹងប្រធានបទខុសៗគ្នា។
និងកម្មវិធីសូត្រមន្តចម្រើនព្រះបរិត្ត និងកម្មវិធីសម្តែងព្រះធម្មទេសនាដោយធម្មកថិកចំនួន ៧ អង្គឆ្លងឆ្លើយអំពី “អរិយទ្រព្យ ៧ ប្រការ" រៀបចំឡើងនៅក្នុងបរិវេណរង់ចាំនៃមន្ទីរពេទ្យកុមារអង្គរ ខេត្តសៀមរាប (ដោយអ្នកចូលរួមមានចំនួនកំណត់) ព្រមទាំងផ្សាយផ្ទាល់នៅលើបណ្តាញសង្គមហ្វេសប៊ុក មន្ទីរពេទ្យកុមារអង្គរ ប្រព្រឹត្តទៅនៅថ្ងៃទី ២៩ ខែសីហា ឆ្នាំ ២០២១៕