ភ្នំពេញៈ តុលាការកំពូលកម្ពុជានៅថ្ងៃទី ១២ ខែកក្កដានេះបានសម្រេចរំលាយគណបក្សនយោបាយចំនួន ៣ តាមរយៈបណ្ដឹងរបស់ក្រសួងមហាផ្ទៃ ដោយសារតែគណបក្សទាំងនេះបានប្រព្រឹត្ដល្មើសទៅនឹងច្បាប់ស្ដីពីគណបក្សនយោបាយ និងគ្មានសកម្មភាពនយោបាយ និងមិនបានធ្វើរបាយការណ៍មកក្រសួងមហាផ្ទៃជាច្រើនឆ្នាំ។ នេះបើតាមសាលដីកា។
យោងតាមសាលដីការបស់តុលាការកំពូលកាលពីថ្ងៃទី ១៩ ខែកក្កដានេះ បានឱ្យដឹងថា គណបក្សនយោបាយដែលតុលាការកំពូលសម្រេចរំលាយតាមរយៈបណ្ដឹងរបស់ក្រសួងមហាផ្ទៃក្រោយគ្មានសកម្មភាពជាច្រើនឆ្នាំនេះរួមមាន «គណបក្សប្រជាធិបតេយ្យខ្មែរ» របស់លោក ហោ ម៉េងហ៊ាង, «គណបក្ស វង្គត ខេមរៈ មហានគរ» របស់លោក ផាន់ ស៊ីណា និង «គណបក្សសង្គមប្រជាធិបតេយ្យ» របស់លោក ថោង សុវណ្ណារ៉ា ដែលគណបក្សទាំងនេះ ត្រូវបានតុលាការកំពូលរំលាយកាលពីថ្ងៃទី ១២ ខែកក្កដា ឆ្នាំ ២០២១ នេះ។
តាមអង្គហេតុនៃសាលដីការបស់តុលាការកំពូលឱ្យដឹងថា ក្រសួងមហាផ្ទៃ បានដាក់ពាក្យប្តឹងទៅតុលាការកំពូល បន្ទាប់ពីគណបក្សទាំង ៣ ខាងលើនេះ គ្មានសកម្មភាព និងអស់រយៈពេលច្រើនឆ្នាំមិនអាចទាក់ទងបាន ហើយមិនបានធ្វើរបាយការណ៍អំពីការធ្វើសកម្មភាព និងរបាយការណ៍ហិរញ្ញវត្ថុមកក្រសួងមហាផ្ទៃ។
ចាប់តាំងពីឆ្នាំ ២០១៧ មក រហូតមកដល់ពេលនេះ គណបក្សនយោបាយប្រមាណ ៤ ហើយត្រូវតុលាការកាត់ទោសរំលាយ ដោយការល្មើសច្បាប់ស្ដីពីគណបក្សនយោបាយ និងគ្មានសកម្មភាព។ ប៉ុន្ដែបច្ចុប្បន្ននៅប្រទេសកម្ពុជាមានគណបក្សនយោបាយជាច្រើនផ្សេងទៀត កំពុងធ្វើសកម្មភាព ដោយក្នុងនោះមានមួយចំនួន បានប្រកាសរួចហើយក្នុងការត្រៀមខ្លួនចូលរួមក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ ២០២២ និងការបោះឆ្នោតជ្រើសតាំងតំណាងរាស្ត្រនៅឆ្នាំ ២០២៣ ខាងមុខ៕