ភ្នំពេញ៖ លោកនាយករដ្ឋមន្ដ្រី ហ៊ុន សែន នៅថ្ងៃទី ២៣ ខែកក្កដានេះ បានចេញសេចក្ដីសម្រេចបង្កើតអនុគណៈកម្មការដឹកនាំការអនុវត្តច្បាប់ ចំណុះឱ្យគណៈកម្មការអន្ដរក្រសួង ដើម្បីប្រយុទ្ធនឹងជំងឺកូវីដ ១៩។
យោងតាមសេចក្ដីសម្រេចរបស់លោកនាយករដ្ឋមន្រ្ដីស្ដីពីការបង្កើតអនុគណៈកម្មការដឹកនាំអនុវត្តច្បាប់នេះ បានតែងតាំងសមាភាពលោក ថោង លីម អនុរដ្ឋលេខាធិការក្រសួងមហាផ្ទៃជាប្រធាន អមដោយអនុប្រធាន ៣ រូប និងសមាជិកពីអភិបាលរងខេត្ដ ស្នងការរងនគរបាល មេបញ្ជាការរងកងរាជអាវុធហត្ថ និងអនុប្រធានមន្ទីរសុខាភិបាលរាជធានី-ខេត្ដ ផងដែរ។
សេចក្ដីសម្រេចបានបញ្ជាក់ថា អនុគណៈកម្មការដឹកនាំការអនុវត្តច្បាប់ មានភារកិច្ចដូចជា ដឹកនាំ និងសម្របសម្រួលការអនុវត្តវិធានការរដ្ឋបាល វិធានការសុខាភិបាល និងវិធានការច្បាប់ ដើម្បីការបង្ការ ទប់ស្កាត់ និងគ្រប់គ្រងការឆ្លងរាលដាលនៃជំងឺកូវីដ ១៩។ ដាក់ចេញវិធានការចាំបាច់នានា ដើម្បីពង្រឹងប្រសិទ្ធភាពនៃការអនុវត្តវិធានការនានា ពាក់ព័ន្ធនឹងការបង្ការ ទប់ស្កាត់ និងគ្រប់គ្រងការឆ្លងរាលដាលនៃជំងឺកូវីដ ១៩។ តាមដាន និងត្រួតពិនិត្យការអនុវត្តវិធានការនានា ទាំងវិធានការសុខាភិបាល ទាំងវិធានការរដ្ឋបាល និងវិធានការច្បាប់ដែលត្រូវបានដាក់ចេញ ដើម្បីបង្ការ ទប់ស្កាត់ និងគ្រប់គ្រងការឆ្លងរាលដាលនៃជំងឺកូវីដ ១៩។
អនុគណៈកម្មការដឹកនាំការអនុវត្តច្បាប់ក៏មានភារកិច្ចលើកសំណើវិធានការថ្មី ឬកែសម្រួលវិធានការនានា ដើម្បីឆ្លើយតបទៅនឹងការវិវត្តជាក់ស្ដែង នៃសភាពការណ៍នៃការឆ្លងរាលដាលនៃជំងឺកូវីដ ១៩ ជូនគណៈប្រតិបត្តិនៃគណៈកម្មការអន្ដរក្រសួង ដើម្បីប្រយុទ្ធនឹងជំងឺកូវីដ ១៩។ ត្រួតពិនិត្យ តាមដាន និងវាយតម្លៃអំពីវឌ្ឍនភាពនៃការអនុវត្តវិធានការនានា ពាក់ព័ន្ធនឹងការបង្ការ ទប់ស្កាត់ និងគ្រប់គ្រងការឆ្លងរាលដាលនៃជំងឺកូវីដ ១៩ និងធ្វើរបាយការណ៍ជាប្រចាំជូនគណៈប្រតិបត្តិនៃ គណៈកម្មការអន្ដរក្រសួង ដើម្បីប្រយុទ្ធនឹងជំងឺកូវីដ ១៩ និងអនុវត្តការងារផ្សេងទៀត តាមការប្រគល់ភារកិច្ចរបស់គណៈប្រតិបត្តិនៃគណៈកម្មការអន្ដរក្រសួងដើម្បីប្រយុទ្ធនឹងជំងឺកូវីដ ១៩។
លោកនាយករដ្ឋមន្រ្ដីបញ្ជាក់ថា អនុគណៈកម្មការដឹកនាំការអនុវត្តច្បាប់នេះ ស្ថិតក្រោមការដឹកនាំសម្របសម្រួលរបស់លោក នេត សាវឿន អនុប្រធានគណៈប្រតិបត្ដិនៃគណៈប្រតិបត្តិនៃគណៈកម្មការអន្ដរក្រសួង ដើម្បីប្រយុទ្ធនឹងជំងឺកូវីដ ១៩៕