ភ្នំពេញៈ បុរសសង្ស័យជាចោរប្លន់ ២ នាក់ប្រើដាវសាម៉ូរ៉ៃភ្ជង់ប្លន់ត្រូវបានតុលាការខេត្តបាត់ដំបង ចេញដីកាឃុំខ្លួននៅពន្ធនាគារខេត្ត នៅថ្ងៃទី២៥ កក្កដា បន្ទាប់ពីប្រព្រឹត្ត និងចាប់ខ្លួនបាន២ថ្ងៃ ពាក់ព័ន្ធនឹងការប្លន់បុរសម្នាក់យកម៉ូតូ នៅភូមិ អូរតាគាំ ៣ សង្កាត់ទួលតាឯក ក្រុង-ខេត្តបាត់ដំបង។
លោកឈឿង គឹមសុង នាយការិយាល័យទទួលផែន ការងារនគរបាលព្រហ្មទណ្ឌកម្រិតស្រាល ប្រាប់នៅថ្ងៃទី២៥ កក្កដាថា ជនត្រូវចោទឈ្មោះ ឡាច ងួនយី អាយុ២២ឆ្នាំ រស់នៅភូមិ១៣ មករា សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង និងឈ្មោះសា រ៉មលី ហៅ ជីន អាយុ ៤២ឆ្នាំ រស់នៅភូមិដាំស្ពៃ សង្កាត់ស្លាកែត ក្រុង-ខេត្តបាត់ដំបង។ ជនទាំង២ត្រូវបានលោកចៅក្រមស៊ើបសួរសម្រេចចេញដីកាឃុំនៅពន្ធនាគារហើយនៅថ្ងៃទី២៥កក្កដា។
លោកបញ្ជាក់ថា៖«ពួកគេត្រូវលោកតំណាងអយ្យការចោទបទលួចមានស្ថានទម្ងន់ទោសមាត្រា៣៥៧នៃក្រមព្រហ្មទណ្ឌ។ ចំពោះប្រាក់ដុល្លារក៏ជាប់ពាក់ព័ន្ធដែរ តែមិនដឹងតុលាការលោកចោទឬយ៉ាងណាទេ»។
ពាក់ព័ន្ធការចោទប្រកាន់នេះ បើតុលាការរកឃើញថា ជនត្រូវចោទទាំង២នាក់ ពិតជាបានប្រព្រឹត្តមែននោះនឹងត្រូវប្រឈមការផ្តន្ទាទោសពី៣ទៅ១០ឆ្នាំ និងពិន័យប្រាក់ពី១លាន ទៅ ៦ លានរៀល។
លោក គឹមសុង ប្រាប់ថា ពាក់ព័ន្ធលុយដុល្លារក្លែងក្លាយនោះមានក្រដាស១០ដុល្លារ ក្រដាស២០ដុល្លារ និងក្រដាស១០០ដុល្លារ សរុបចំនួន ៣០ សន្លឺក។ ករណីប្រាក់ដុល្លារនេះ គឺសមត្ថកិច្ចលោកចោទបឋមពីបទរក្សាទុកប្រាក់ដុល្លារក្លែងក្លាយ។ បើតាមលោកគឹមសុង ចំពោះប្រាក់ដុល្លារក្លែងក្លាយនេះជាលុយដុល្លារដែលគេដាក់លក់នៅទីផ្សារសម្រាប់សែនខ្លោច។ តែលុយនោះជនសង្ស័យមិនទាន់យកទៅចាយនៅឡើយទេ។
លោកបញ្ជាក់ថា៖«លុយនេះពួកគេមិនទាន់ចេញជាសកម្មភាពអីទេ។ ដូច្នេះខ្ញុំយល់ថាបើពួកគេមិនទាន់មានសកម្មភាពក៏បទល្មើសមិនទាន់កើតមានដែរ»។
លោកបានរំឭកថា កាលពីម៉ោងជាង១២អធ្រាត្រឈានចូលថ្ងៃទី២៣ កក្កដា ជនរងគ្រោះម្នាក់ជាភេទទី៣ បានជិះម៉ូតូ១គ្រឿងតាមសួនច្បារ ក្នុងក្រុងបាត់ដំបង។ ពេលនោះជនសង្ស័យឈ្មោះឡាច ងួនយី បានជិះម៉ូតូតាមក្រោយហើយក៏សុំលេខទូរស័ព្ទជនរងគ្រោះ។ បន្ទាប់ពីឈ្មោះឡាច ងួនយី បានលេខទូរស័ព្ទហើយក៏ណាត់ជនរងគ្រោះទៅជួលបន្ទប់ផ្ទះសំណាក់។ ក្រោយពីដេកជាមួយគ្នាហើយជនត្រូវចោទបានដើរចេញមកក្រៅមួយសន្ទុះក៏ទូរស័ព្ទហៅជនរងគ្រោះខ្ទើយឱ្យយកម៉ូតូទៅឌុបខ្លួន។
ពេលនោះឈ្មោះឡាច ងួនយី បានទូរស័ព្ទហៅបក្ខពួកគេឈ្មោះ សា រ៉មលី មកចាំមុន ហើយពេលជនរងគ្រោះជិះម៉ូតូមកដល់កន្លែងណាត់ក៏យកដាវភ្ជង់ប្លន់តែម្តង។លុះព្រឹកឡើងថ្ងៃទី២៣ កក្កដា ជនសង្ស័យ ក៏មកដាក់ពាក្យបណ្តឹងនៅអធិការដ្ឋាននគរបាលក្រុងបាត់ដំបង ហើយសមត្ថកិច្ចក៏បានចុះស្រាវជ្រាវឃាត់ខ្លួនពួកគេតែម្តង៕