ភ្នំពេញៈស្ថានទូតកម្ពុជាប្រចាំប្រទេសថៃ បដិសេធទាំងស្រុងចំពោះការអំពាវនាវរបស់ម្ចាស់គណនីហ្វេកប៊ុកមួយ ដែលបានប្រើប្រាស់ឈ្មោះស្ថានទូត ដើម្បីប្រកាសរៃអង្គាសថវិកាសម្រាប់ជួយដោះស្រាយការលំបាករបស់ពលករខ្មែរនៅក្នុងប្រទេសថៃ។
កាលពីថ្ងៃទី២៣ ខែកក្កដា ឆ្នាំ២០២១ មានគណនីហ្វេសប៊ុកមួយ មានឈ្មោះ ពូឈីវ បានចុះផ្សាយសេចក្តីអំពាវនាវ ដោយបានលើកឡើងថា មើលឃើញការលំបាករបស់ពលករខ្មែរ រាប់សែននាក់ នៅប្រទេសថៃ ដែលជួបរលកទី៣នៃការរាតត្បាតជំងឺកូវីដ១៩ «ខ្ញុំសុំសទ្ធាបងប្អូនម្នាក់ ២ ០០០រៀល ឬស្មើ 0,៥$ ដើម្បីរួមចំណែកនូវការលំបាក់។
គណនីហ្វេសប៊ុកនេះ ក៏បានភ្ជាប់ជាមួយនឹងលេខធនាគា ចំនួន ២ ខ្សែរ ដោយសំអាងថា គណនីធនាគានេះ គឺជារបស់ស្ថានទូតកម្ពុជា ប្រចាំប្រទេសថៃទៀតផង។
ដោយមើលឃើញពីការបង្ហោះយ៉ាងដូច្នេះ ស្ថានទូតកម្ពុជាប្រចាំប្រទេសថៃ បានចេញលិខិតបដិសេធ មួយច្បាប់ ចុះថ្ងៃទី ២៤ ខែកក្កដា ដោយស្ថានទូតបានបដិសេធទាំងស្រុងថា ការអំពាវនាវរបស់ម្ចាស់គណនីហ្វេកប៊ុកខាងលើមិនពាក់ព័ន្ធ នឹងស្ថានទូតឡើយ ហើយកន្លងមក ស្ថានទូត ក៏ពុំមានគោលការណ៍រៃអង្គាសថវិកានោះដែរ។
ដូច្នេះដើម្បីចៀសវាងការខាតបង់ប្រាក់កាស ស្ថានទូត បានអំពាវនាវដល់សាធារណជនកុំឲ្យចាញ់បោកការអំពាវនាវនេះ ឬកុំផ្ទេរប្រាក់ទៅគណនីធនាគារខាងលើជាដាច់ខាត។
ស្ថានទូតកម្ពុជា ប្រចាំប្រទេសថៃ បានសង្កត់ធ្ងន់ថា៖«ស្ថានទូតស្នើសុំឲ្យម្ចាស់គណនីហ្វេសប៊ុកឈ្មោះ ពូឈីវ លុបសារនេះចេញ ពីទំព័រហ្វេសប៊ុក និងវេរប្រាក់ដែលទទួលបានកន្លងមក ត្រឡប់ជូនទៅម្ចាស់ដើមវិញ និងបញ្ឈប់ទង្វើនានា ដែលនាំឲ្យសាធារណជនមានការភ័ន្តច្រឡំបែបនេះ»។
លោក លឹម សុផុន ក្រុមការងារ នៃអង្គការសង់ត្រាល់ប្រចាំប្រទេសថៃ បានប្រាប់ភ្នំពេញប៉ុស្តិ៍នៅថ្ងៃទី ២៥ កក្កដាថា កន្លងទៅ ដោយសារតែបងប្អូនពលករខ្មែរ បានជួបប្រទះនូវផលលំបាកផ្នែកជីវភាព គឺឃើញមានប្រជាពលរដ្ឋ និងសហគមន៍មួយចំនួន បានប្រកាសអំពាវនាវរកថវិកា ដើម្បីជួយដល់ពលករខ្មែរ។
ប៉ុន្តែក្នុងករណីដែលគណនីហ្វេសប៊ុកនេះ យកឈ្មោះស្ថានទូតខ្មែរ មកប្រើ ដើម្បីប្រមូលលុយនេះ គឺលោក មិនច្បាស់ទេថា ពួកគេ មានចេតនាអ្វីឲ្យប្រាកដនោះដែរ។
លោក សុផុន បានអះអាងថា ក្នុងពេលនេះ ស្ថានភាពពលករខ្មែរមួយចំនួនធំ នៅប្រទេសថៃ គឺពិតជាជួបការលំបាកខ្លាំងពិតមែន ព្រោះការងារ ក៏គ្មានធ្វើ ថវិការក៏គ្មាន ហើយត្រូវបានរដ្ឋាភិបាលថៃ ប្រកាសហាមឃាត់មិនឲ្យចាកចេញពីកន្លែងរស់នៅទៀត។
លោក បានរៀបរាប់ថា៖«ពាក់ព័ន្ធនឹងការអំពាវនាវរកស្បៀងអាហាររបស់ពលករខ្មែរយើងនេះ គឺពួកគាត់តែងតែទាក់ទងមកខ្ញុំ ជារឿយៗ ព្រោះពួកគាត់ ជួបការលំបាកខ្លាំងមែនទែន មិនថា អ្នករស់នៅក្នុងទីក្រុងបាងកកនោះទេ នៅតាមបណ្តាលខេត្ត ក៏មានបញ្ហាដូចគ្នា»៕