មណ្ឌលគិរីៈ ក្រសួងបរិស្ថាន និងអង្គការ WWF បានឱ្យដឹងថា សត្វត្មាតត្នោត និងត្មាតផេះ បានវិលត្រឡប់មកកាន់ទ្រនំរបស់ពួកវាវិញក្នុងដែនជម្រកសត្វព្រៃស្រែពកនៃខេត្តមណ្ឌលគិរី ក្រោយពីបានអវត្តមានក្នុងតំបន់នេះអស់រយៈពេលជាង ៥ ឆ្នាំ ដោយសារមានករណីពុលដោយប្រយោលលើសត្វទាំងនេះ។
សេចក្តីប្រកាសព័ត៌មានរបស់ក្រសួងបរិស្ថាន និងអង្គការ WWF ចេញកាលពីថ្ងៃទី ២៤ ខែកក្កដា ដែលភ្នំពេញប៉ុស្តិ៍ទើបទទួលបានកាលពីម្សិលមិញ បានឱ្យដឹងថា វត្តមាននៃសត្វត្មាតត្នោតចំនួន ២ ក្បាល និងត្មាតផេះចំនួន ១ ក្បាល កំពុងរស់នៅសម្បុកព្រៃធម្មជាតិរបស់ពួកវាក្នុងដែនជម្រកសត្វព្រៃស្រែពកនៃខេត្តមណ្ឌលគិរីក្រោយពីអវត្តមានអស់រយៈពេលជាង ៥ ឆ្នាំ។
កញ្ញា MilouGroenenberg ប្រធានក្រុមស្រាវជ្រាវ និងតាមដានជីវចម្រុះនៃអង្គការ WWF ថ្លែងថា មូលហេតុដែលបណ្តាលឱ្យបាត់វត្តមានរបស់ពួកវាពីក្នុងតំបន់ក្នុងរយៈពេលដ៏យូរនេះ គឺភាគច្រើនដោយសារពួកវាបានទទួលរងនូវការពុលដោយប្រយោលនឹងសារធាតុគីមីដែលគេបានប្រើប្រាស់សម្រាប់គោលបំណងផ្សេង។
ដោយឡែកសត្វត្មាតភ្លើងក៏ជាសត្វស្លាប ១ ប្រភេទទៀតដែលកំពុងរស់នៅក្នុងតំបន់ដែនជម្រកសត្វព្រៃស្រែពកផងដែរ។
កញ្ញាបានថ្លែងថា៖ «កំណត់ត្រាថ្មីបំផុតនៃការរាប់ចំនួនសត្វត្មាតទាំង ៣ ប្រភេទដោយក្រុមស្រាវជ្រាវសត្វព្រៃនៃក្រសួងបរិស្ថាន និងអង្គការ WWF បានបង្ហាញវត្តមានសត្វត្មាតត្នោត ចំនួន ៤ ក្បាល សត្វត្មាតផេះចំនួន ១១ ក្បាល និងសត្វត្មាតភ្លើងចំនួន ៥ ក្បាល កំពុងរស់នៅក្នុងទ្រនំធម្មជាតិរបស់ពួកវាដែលស្ថិតក្នុងទីតាំងជាប់ដែនជម្រកសត្វព្រៃសំបូរតាមបណ្តោយដងទន្លេមេគង្គនៃខេត្តក្រចេះ» ។
លោក នេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថានបានកោតសរសើរក្រុមការងារស្រាវជ្រាវនៃក្រសួងបរិស្ថាន និងអង្គការ WWF ក៏ដូចជា មន្ត្រីឧទ្យានុរក្សនៃដែនជម្រកសត្វព្រៃស្រែពកដែលបានខិតខំការពារ និងអភិរក្សតំបន់ព្រៃរបោះដ៏ធំជាងគេនៅតំបន់អាស៊ីអាគ្នេយ៍ និងកំពុងធ្វើឱ្យតំបន់នេះកាន់តែមានសុវត្ថិភាពសម្រាប់សត្វព្រៃដោយខិតខំការពារព្រៃឈើជាទីជម្រកអាហារ និងប្រភពទឹក សម្រាប់ជីវចម្រុះគ្រប់ប្រភេទរស់នៅ។
លោកបានថ្លែងថា៖ «នេះគឺជាដំណឹងដ៏ល្អសម្រាប់ក្រុមអ្នកអភិរក្ស និងសម្រាប់ជីវចម្រុះ។ សូមស្នើគ្រប់ភាគីពាក់ព័ន្ធទាំងអស់ចូលរួមក្នុងការការពារ និងអភិរក្សសត្វត្មាតដែលជាប្រភេទសត្វកម្រនេះបន្ថែមទៀត ដើម្បីផលប្រយោជន៍ជីវចម្រុះ និងរក្សាបានកេរដំណែលធម្មជាតិសម្រាប់មនុស្សជំនាន់ ក្រោយបន្តទៀត»។
លោក សេង ទៀក នាយកអង្គការ WWF កម្ពុជា បានថ្លែងថា នៅកម្ពុជាចំនួនសត្វត្មាតទាំង ៣ ប្រភេទត្រូវបានអ្នកវិទ្យាសាស្ត្រកត់ត្រាថា បានធ្លាក់ចុះគួរឱ្យបារម្ភក្នុងរយៈពេលជាង ១៥ ឆ្នាំចុងក្រោយនេះ។ ការគំរាមកំហែងចម្បងៗដល់ការរស់នៅរបស់ប្រភេទសត្វស្លាបដ៏សំខាន់ជាសកលទាំងនេះរួមមាន ការពុលនឹងសារធាតុគីមីដែលគេប្រើប្រាស់សម្រាប់គោលដៅផ្សេង កង្វះចំណីអាហារ ការបាត់បង់ជម្រក និងសកម្មភាពរំខានដោយមនុស្ស។
លោកបានថ្លែងថា៖ «ដំណឹងដ៏ល្អនេះពិតជាបានលើកទឹកចិត្តដល់អ្នកពាក់ព័ន្ធទាំងអស់ ជាពិសេសក្រុមការងារនៃកម្មវិធីអភិរក្សតំបន់ព្រៃទេសភាពភាគខាងកើតនៃកម្ពុជាលើការបង្កើនកិច្ចខិតខំប្រឹងប្រែងជាប្រចាំសំដៅជំរុញឱ្យចំនួនសត្វបក្សីទាំងនេះមានកំណើនចំនួនពួកវាឡើងវិញនៅថ្ងៃខាងមុខ»។
សូមបញ្ជាក់ថា លទ្ធផលនៃការរាប់ចំនួនសត្វត្មាតថ្នាក់ជាតិដោយក្រុមការងារអភិរក្សសត្វត្មាតកម្ពុជា គិតត្រឹមខែមិថុនា ឆ្នាំ ២០២១ បានបង្ហាញថា មានសត្វត្មាតសរុបទាំងអស់មានចំនួន ១២១ ក្បាល ក្នុងនោះមានត្មាតភ្លើង ២០ ក្បាល ត្មាតផេះ ៦៦ ក្បាល និងត្មាតត្នោត ៣៥ ក្បាល៕
វីដេអូ៖