.jpg)
ជនសង្ស័យទាំង ៥ និងគ្រឿងញៀន ដែលត្រូវបានសមត្ថកិច្ចបង្ក្រាប និងរឹបអូសនៅថ្ងៃទី ២០ កក្កដា នៅខណ្ឌច្បារអំពៅ។ រូបថត ប៉ូលិស
ភ្នំពេញៈ មន្ត្រីជំនាញមន្ទីរប្រឆាំងបទល្មើសគ្រឿងញៀននៃក្រសួងមហាផ្ទៃ កាលពីថ្ងៃទី ២០ កក្កដាបានបង្ក្រាបទីតាំងកែច្នៃរក្សាទុកគ្រឿងញៀន និងករណីជួញដូរគ្រឿងញៀន ដោយចាប់ឃាត់ខ្លួនជនសង្ស័យ ៧ នាក់ក្នុងនោះជនជាតិខ្មែរ ៣ នាក់ ជនជាតិវៀតណាម ៤ នាក់ និងរឹបអូសគ្រឿងញៀនជាង ២០០ គីឡូក្រាម នៅសង្កាត់និរោធ ខណ្ឌច្បារអំពៅ ខណ្ឌសែនសុខ និងខណ្ឌឫស្សីកែវ រាជធានីភ្នំពេញ។
លោក មាស វិរិទ្ធ អ្នកនាំពាក្យ និងជាអគ្គលេខាធិការនៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនថ្លែងកាលពីថ្ងៃទី ២៥ កក្កដាថា ករណីឃាត់ជនល្មើសនៅខណ្ឌសែនសុខ និងខណ្ឌឫស្សីកែវចំនួន ២ នាក់ (ស្រីម្នាក់) ជាមួយគ្រឿងញៀនជាង ៥០ គីឡូក្រាម បានបញ្ចប់ការសាកសួរនឹងបញ្ជូនជនល្មើសទៅតុលាការហើយ។
ចំណែកករណីបង្ក្រាបក្រុមឧក្រិដ្ឋជន ៥ នាក់ ក្នុងនោះជនជាតិខ្មែរ ១ នាក់ និងជនជាតិវៀតណាម ៤ នាក់ រឹបអូសគ្រឿងញៀនជាង ១៥៦ គីឡូក្រាមនៅសង្កាត់និរោធ ខណ្ឌច្បារអំពៅ គឺនៅបន្តនីតិវិធីទៀតដើម្បីស្រាវជ្រាវរកក្រុមឧក្រិដ្ឋជនពាក់ព័ន្ធ។
លោកថ្លែងថា៖ «ករណីបង្ក្រាបក្រុមឧក្រិដ្ឋជនគ្រឿងញៀន ៥ នាក់នៅខណ្ឌច្បារអំពៅមានការជាប់ពាក់ព័ន្ធបន្តទៀត។ យើងមើលសកម្មភាព និងបរិមាណគ្រឿងញៀនរួមនឹងស្ថានភាពបុគ្គលដែល ត្រូវបានឃាត់ខ្លួនគឺមានជាប់ពាក់ព័ន្ធក្នុងផ្នែកមួយនៃក្រុមឧក្រិដ្ឋជន»។
យោងតាមរបាយការណ៍របស់សមត្ថកិច្ចមន្ទីរប្រឆាំងបទល្មើសគ្រឿងញៀន ការបង្ក្រាបនេះអនុវត្តតាមបទបញ្ជា លោក នេត សាវឿន អគ្គស្នងការនគរបាលជាតិ និងលោក ម៉ក់ ជីតូ អគ្គស្នងការរងទទួលផែនប្រឆាំងបទល្មើសគ្រឿងញៀន ក្រោមការបញ្ជាដឹកនាំផ្ទាល់ដោយលោក ឡឹក វណ្ណៈ នាយកមន្ទីរប្រឆាំងបទល្មើសគ្រឿងញៀន។
របាយការណ៍បានឱ្យដឹងថា កាលពីថ្ងៃទី ២០ ខែ កក្កដា ឆ្នាំ ២០២១ វេលាម៉ោង ២២ និង ២០ នាទី សមត្ថកិច្ចនៃមន្ទីរប្រឆាំងបទល្មើសគ្រឿងញៀន (ក៨) ដឹកនាំដោយលោក វ៉ាន់ កុសល និងលោក សារី បុត្រសត្យា នាយករងមន្ទីរ និងចូលរួមពីកម្លាំងជំនាញស្នងការដ្ឋាននគរបាលរាជធានីភ្នំពេញ ព្រមទាំងមានការសម្របសម្រួល ដោយ លោក វង្ស សាវ៉ាត ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញបានចុះស៊ើបអង្កេត ស្រាវជ្រាវ ឈានទៅបង្ក្រាបក្រុមឧក្រិដ្ឋជន កែច្នៃ រក្សាទុក ដោយខុសច្បាប់នូវសារធាតុញៀន ស្ថិតនៅចំណុចផ្ទះលេខ ៨០ ផ្លូវ M៣ បូរីប៉េងហួត (បឹងស្នោ) សង្កាត់និរោធ ខណ្ឌច្បារអំពៅ រាជធានីភ្នំពេញ។
ក្នុងប្រតិបត្តិការនោះសមត្ថកិច្ចឃាត់ខ្លួនជនសង្ស័យ ៥ នាក់ រួមមាន ១ ឈ្មោះ ហម សាវុធ ភេទប្រុស អាយុ ៥២ ឆ្នាំ ជនជាតិខ្មែរ។ ២ ឈ្មោះ ឡេ វ៉ាន់ឌឿត (LE VAN DUOT) ភេទប្រុសអាយុ ៣១ ឆ្នាំ ជនជាតិវៀតណាម។ ៣ ឈ្មោះង្វៀន ថាន់គឿង (NGUYEN THANH CUONG ) ភេទប្រុស អាយុ ២៦ ឆ្នាំ ជនជាតិវៀតណាម។ ៤ ឈ្មោះ ឡេ កឹមហ្វុក (LE CAM PHUNG ) ភេទស្រី អាយុ ២៥ ឆ្នាំ ជនជាតិវៀតណាម។ ៥ ឈ្មោះ ហ្វ័ង ង៉ុកហាន (HOANG NGOC HAN ) ភេទស្រី អាយុ ២៥ ឆ្នាំ ជនជាតិវៀតណាម។
របាយការណ៍បានបញ្ជាក់ថា វត្ថុតាងចាប់យកបាន រួមមាន ១ អ៊ិចស្តាស៊ី (MDMA) ទម្ងន់សុទ្ធជាង ១០១ គីឡូក្រាម។ ២ កាទីណូន (CATHINONE) ទម្ងន់សុទ្ធជាង ៣៩ គីឡូក្រាម។ ៣ មេតំហ្វេតាមីន (ICE) ទម្ងន់សុទ្ធជាង ១៤ គីឡូក្រាម។ ៤ កេតាមីន (KETANINE) ទម្ងន់សុទ្ធ ១១២,៨១ ក្រាម ។ សរុបសារធាតុញៀនទម្ងន់ជាង ១៥០ គីឡូក្រាម។
ក្រៅពីនេះសមត្ថកិច្ចក៏បានរកឃើញសារធាតុគីមីផ្សំ (រាវ) អាសេតូន ទម្ងន់សុទ្ធជាង ៦ គីឡូក្រាម។ សម្ភារ មធ្យោបាយ និងឧបករណ៍កែច្នៃសារធាតុញៀន។ ទូរស័ព្ទ ៤ គ្រឿង។ ម៉ាស៊ីនសម្រាប់សម្ងួតសារធាតុញៀនចំនួន ២ គ្រឿង។ ម៉ាស៊ីនក្រឡុកសារធាតុញៀនចំនួន ៦ គ្រឿង។ ពុម្ពសម្រាប់វាយគ្រាប់សារធាតុញៀនមួយចំនួនធំ និងម៉ាស៊ីនវេចខ្ចប់សារធាតុញៀន ១ គ្រឿង។
ជាមួយគ្នានេះកាលពីថ្ងៃទី ២០ ខែ កក្កដា ឆ្នាំ ២០២១ សមត្ថកិច្ចបានចុះស្រាវជ្រាវ និងឈានទៅបង្ក្រាបក្រុមឧក្រិដ្ឋជនជួញដូរខុសច្បាប់នូវសារធាតុញៀននៅ ៤ ទីតាំងផ្សេងគ្នាជាបន្តបន្ទាប់ ស្ថិតនៅខណ្ឌសែនសុខ ខណ្ឌឫស្សីកែវ ឃាត់ខ្លួនជនសង្ស័យជនជាតិខ្មែរចំនួន ២ នាក់ក្នុងនោះស្រីម្នាក់ និងរឹបអូសគ្រឿងញៀនបានជាង ៥០ គីឡូក្រាមផងដែរ។ ជនសង្ស័យទាំង ២ នាក់ត្រូវបានសមត្ថកិច្ចនគរបាលកសាងសំណុំរឿងបញ្ជូនទៅតុលាការ ដើម្បីអនុវត្ដតាមនីតិវិធី។
យោងតាមរបាយការណ៍របស់អគ្គស្នងការនគរបាលជាតិកាលពីថ្ងៃទី ២០ ខែ កក្កដា ឆ្នាំ ២០២១ វេលាម៉ោង ១០ និង ៣៥ នាទី កម្លាំងជំនាញនៃមន្ទីរប្រឆាំងបទល្មើសគ្រឿងញៀន (ក១) ដឹកនាំដោយលោក អ៊ិន សុង នាយករងមន្ទីរ និងលោក ហុង វណ្ណារិទ្ធ នាយការិយាល័យ (ក១) សហការជាមួយកម្លាំងជំនាញស្នងការដ្ឋាននគរបាលរាជធានីភ្នំពេញ សម្របសម្រួលដោយលោក ស៊ិត វណ្ណៈ ព្រះរាជអាជ្ញារងនៃអយ្យការអមសាលាដំបូងរាជធានី-ភ្នំពេញ ចុះស្រាវជ្រាវ និងឈានទៅបង្ក្រាបក្រុមឧក្រិដ្ឋជនជួញដូរដោយខុសច្បាប់នូវសារធាតុញៀននៅ ៤ ទីតាំងផ្សេងគ្នាជាបន្តបន្ទាប់។
ទីតាំងចុះបង្ក្រាបទាំងនោះ រួមមាន ទី១- នៅចំណុចផ្លូវលំ សង្កាត់ទួលសង្កែ១ ខណ្ឌឫស្សីកែវ។ ទី២- នៅចំណុចអតីតរោងចក្រទឹកដោះគោលើផ្លូវជាតិលេខ ៥ សង្កាត់ទួលសង្កែ ១ ខណ្ឌឫស្សីកែវ។ ទី៣- នៅចំណុចផ្ទះជួលលេខ ១៣២៩ ផ្លូវ ១០៣ ភូមិទួលថ្លាន់ សង្កាត់ទួលសង្កែ២ ខណ្ឌឫស្សីកែវ។ ទី៤- ផ្ទះដេ២ ផ្លូវបេតុង ភូមិក្រាំងធ្នង់ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។
របាយការណ៍បញ្ជាក់ថា ជាលទ្ធផលកម្លាំងជំនាញឃាត់ខ្លួនជនសង្ស័យ ២ នាក់ គឺ ឈ្មោះ សាន ពិសិដ្ឋ ភេទប្រុស អាយុ ៣៧ ឆ្នាំ ជនជាតិខ្មែរ និង ២ ឈ្មោះ សុខ ពន្លក ភេទប្រុស អាយុ ៣០ ឆ្នាំ ជនជាតិខ្មែរ។
សមត្ថកិច្ចជំនាញក៏បានចាប់យកវត្ថុតាង រួមមាន មេតំហ្វេតាមីន (ICE) ៣០ កញ្ចប់ធំ ៤ កញ្ចប់តូច ស្មើទម្ងន់ជាង ៣០ គីឡូក្រាម។ កេតាមីន (Ketamine) ២០ កញ្ចប់ធំ ស្មើទម្ងន់ជាង ១៩ គីឡូក្រាម។ ទូរស័ព្ទ ៣ គ្រឿង ម៉ូតូ ១ គ្រឿង និងរថយន្ត ១ គ្រឿង។ សរុបសារធាតុញៀនចំនួនជាង ៥០ គីឡូក្រាម។
របាយការណ៍ដដែលបញ្ជាក់ថា ក្រោយបញ្ចប់ការធ្វើតេស្ដសារធាតុញៀនជាង ៥០ គីឡូក្រាម និងបង្ហាញមុខជនសង្ស័យកាលពីថ្ងៃទី ២៣ ខែកក្កដា នៅមន្ទីរប្រឆាំងបទល្មើសគ្រឿងញៀននៃអគ្គស្នងការដ្ឋាននគរបាលជាតិ ជនសង្ស័យ និងវត្ថុតាងខាងលើត្រូវបានកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធី៕
វីដេអូ៖
