កំពតៈ អង្គការ JICA បានចាប់ផ្តើមពិភាក្សាសិក្សាលើការអភិវឌ្ឍប្រែក្លាយ មន្ទីរពេទ្យបង្អែកខេត្តកំពតឱ្យទៅជាមន្ទីរពេទ្យតំបន់ ដើម្បីពង្រីកសេវាសុខាភិបាលឱ្យកាន់តែកៀកទៅនឹងប្រជាពលរដ្ឋ។
លោក វិត វឌ្ឍនា អ្នកនាំពាក្យរដ្ឋបាលខេត្តកំពត ប្រាប់ភ្នំពេញ-ប៉ុស្តិ៍នៅថ្ងៃទី ២៥ ខែកក្កដា ថា តំណាង JICA បានចុះមកពិភាក្សា និងសិក្សាជាមួយលោក ជាវ តាយ អភិបាលខេត្តកំពតពីលទ្ធភាពក្នុងការប្រែក្លាយមន្ទីរពេទ្យបង្អែកខេត្តទៅជាមន្ទីរពេទ្យតំបន់ដែលមានលក្ខណៈទំនើបក្នុងការព្យាបាលជូនប្រជាពលរដ្ឋ។
លោក វឌ្ឍនា បន្តថា ក្រសួងសុខាភិបាលរបស់កម្ពុជាបានស្នើសុំទៅរដ្ឋាភិបាលជប៉ុនឱ្យអង្គការចៃកានេះ ចុះមកសិក្សា ដំឡើងពីមន្ទីរពេទ្យបង្អែកខេត្តទៅជាមន្ទីរពេទ្យតំបន់នៅក្នុងប្រទេសកម្ពុជា នៅក្នុងខេត្តមួយចំនួន រួមមានរាជធានីភ្នំពេញ ខេត្តកំពងចាម បាត់ដំបង ស្វាយរៀង និងកំពតជាដើម។
បើតាមលោក វឌ្ឍនា តំណាង JICA បានចាប់ផ្តើមសិក្សា ប្រមូលទិន្នន័យ និងពិនិត្យសមិទ្ធលទ្ធភាព ពង្រីក មន្ទីរពេទ្យបង្អែកខេត្ត ទៅជាមន្ទីរពេទ្យតំបន់។ ទោះជាយ៉ាងណាគម្រោងនេះនៅមិនទាន់អនុវត្តរៀបចំនៅឡើយទេ ព្រោះមិនទាន់មានលទ្ធផលនៃការសិក្សា និងម្យ៉ាងភាគី JICA មានក្រុមការងារច្រើន ដែលនឹងចុះមកសិក្សាអំពីគម្រោងនេះ។
អ្នកនាំពាក្យរដ្ឋបាលខេត្តរូបនេះថ្លែងថា៖ «វាគ្រាន់តែជាការសិក្សា អ៊ីចឹងការសិក្សារបស់ JICA នេះមានដល់ ៦ ក្រុម ទើបតែមកបានក្រុមទី ១ ទេ។ ដូច្នេះគាត់កំពុងតែដំណើរការសិក្សា គាត់ជួបជាមួយនឹងប្រធានមន្ទីរពេទ្យ គាត់សិក្សាទិន្នន័យច្រើន គ្រាន់តែប៉ុណ្ណឹងទេ»។
ក្នុងជំនួបពិភាក្សាជាមួយលោក ជាវ តាយ កាលពីថ្ងៃទី ១២ ខែកក្កដា ឆ្នាំ ២០២១ កន្លងមកនេះ លោក យ៉ាម៉ា សាគិ ទីប្រឹក្សាបច្ចេកទេសនៃអង្គការ JICA មកពីទីក្រុងតូក្យូ ប្រទេសជប៉ុនថ្លែងថា បេសកកម្មរបស់លោកមកខេត្តកំពតលើកនេះ គឺតាមរយៈការស្នើសុំរបស់ក្រសួងសុខាភិបាល ដើម្បីសិក្សាអភិវឌ្ឍន៍មន្ទីរពេទ្យតំបន់ ក៏ដូចជាពង្រីកសេវាសុខាភិបាលឱ្យកាន់តែកៀកទៅនឹងប្រជាពលរដ្ឋ។
ការសិក្សាគម្រោងមន្ទីរពេទ្យតំបន់នេះ គឺធ្វើឡើងនៅខេត្តកំពត ខេត្តកំពង់ចាម ខេត្តស្វាយរៀង ខេត្តស្ទឹងត្រែង ខេត្តបាត់ដំបង និងរាជធានីភ្នំពេញ។ គម្រោងនេះគឺធ្លាប់បានធ្វើរួចហើយនៅឆ្នាំ ២០១៧ ប៉ុន្តែមិនបានជោគជ័យ ទើប JICA បានរៀបចំយន្តការថ្មី ដើម្បីសិក្សាឱ្យកាន់តែលម្អិត និងស៊ីជម្រៅ ឈានទៅរកការជោគជ័យ។
លោក វឌ្ឍនា ថ្លែងថា តាមរយៈមន្ទីរពេទ្យតំបន់នេះនឹងជួយបង្កើនសេវាព្យាបាលជូនប្រជាពលរដ្ឋ នៅក្នុងខេត្តកាន់តែរហ័ស និងប្រសិទ្ធភាពជាងបច្ចុប្បន្ន ទាំងការប្រើប្រាស់ថ្នាំ និងសម្ភារ៕