ភ្នំពេញៈ រាជរដ្ឋាភិបាលកម្ពុជា តាមរយៈក្រសួងសង្គមកិច្ចអតីតយុទ្ធជន និងយុវនីតិសម្បទាបានប្រកាសបន្តកម្មវិធីឧបត្ថម្ភសាច់ប្រាក់ជូនជនក្រីក្រ និងងាយរងគ្រោះពីវិបត្តិកូវីដ ១៩ សម្រាប់ជុំទី៦ លើកទី១ ចាប់ផ្ដើមពីថ្ងៃទី ២៥ ខែ កក្កដា រហូតដល់ថ្ងៃទី ២៤ ខែ សីហា ឆ្នាំ ២០២១។
តាមសេចក្ដីជូនដំណឹងរបស់ក្រសួងសង្គមកិច្ចកាលពីថ្ងៃទី ២៤ ខែ កក្កដា ឆ្នាំ ២០២១ ស្ដីពីលទ្ធផលនៃការអនុវត្ដកម្មវិធីឧបត្ថម្ភសាច់ប្រាក់ជូនគ្រួសារក្រីក្រនិងងាយរងគ្រោះក្នុងអំឡុងពេលប្រយុទ្ធប្រឆាំងនឹងកូវីដ ១៩ សម្រាប់ជុំទី៥ លើក៣ និងការបើកសាច់ប្រាក់ជុំទី៦លើកទី១ បានឱ្យដឹងថា គិតត្រឹមថ្ងៃទី ២៤ ខែ មិថុនា ឆ្នាំ ២០២១ ការបើកផ្ដល់នៅជុំទី៥ លើកទី៣ ត្រូវបានបញ្ចប់ ដែលជាលទ្ធផលប្រជាពលរដ្ឋក្រីក្រ ១ និងក្រីក្រ ២ ចំនួន ៦៥៨ ៨៥៧ គ្រួសារ ស្មើនឹងជាង២,៦លាននាក់ បានទទួលសាច់ប្រាក់ឧបត្ថម្ភសរុបជាង ១១៧ ប៊ីលានរៀល ស្មើនឹងជាង២៩លានដុល្លារ។
សេចក្ដីជូនដំណឹងនេះបញ្ជាក់ថា សម្រាប់ការបើកផ្តល់ប្រាក់ឧបត្ថម្ភជុំទី៦ លើកទី១ គឺចាប់ផ្តើមពីថ្ងៃទី ២៥ ខែ កក្កដា ឆ្នាំ ២០២១ រហូតដល់ថ្ងៃទី ២៤ ខែ សីហា ឆ្នាំ ២០២១ ដែលមានរយៈពេល ៣០ ថ្ងៃ។
បើតាមក្រសួងសង្គមកិច្ច រាជរដ្ឋាភិបាលបានផ្ដល់ការអន្តរាគមន៍ក្នុងការអនុវត្តកម្មវិធីឧបត្ថម្ភសាច់ប្រាក់ជូនប្រជាជនក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ១៩ ចាប់ពីថ្ងៃទី ២៥ ខែ មិថុនា ឆ្នាំ ២០២០ ដល់ថ្ងៃទី ២៤ ខែ មិថុនា ឆ្នាំ ២០២១ ដោយបានចំណាយថវិការដ្ឋចំនួនជាង ១ ៥២៤ ប៊ីលានរៀល ស្មើនឹង ៣៨១,០៨ លានដុល្លារអាមេរិក៕