.jpg)
ជនជាតិចិននៅលើនាវា ក្នុងខេត្តព្រះសីហនុ។ រូបថត FB
ភ្នំពេញៈ នគរបាលអន្តោប្រវេសន៍នៃអគ្គស្នងការដ្ឋាននគរបាលជាតិនៅថ្ងៃទី ២៦ កក្កដា កំពុងបន្តនីតិវិធីសាកសួរ ករណីជនជាតិចិនប្រុសស្រីចំនួន ៣៦ នាក់ បន្ទាប់ពីឃាត់ខ្លួនពួកគេកាលពីយប់ថ្ងៃទី ២៤ កក្កដា ពាក់ព័ន្ធការឆ្លងដែនសមុទ្រដោយខុសច្បាប់ ដោយធ្វើដំណើរតាមកប៉ាល់ពីប្រទេសចិន មកខេត្តព្រះសីហនុ។
លោក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិបានឱ្យដឹងនៅថ្ងៃទី ២៦ កក្កដាថា ករណីជនជាតិចិនទាំង ៣៦ នាក់នោះគឺត្រូវបានបញ្ជូនទៅស្ថាប័នជំនាញ ដើម្បីចាត់ការបន្តហើយ។
លោកថ្លែងថា៖ «រឿងនេះខាងនាយកដ្ឋានអន្តោប្រវេសន៍កំពុងចាត់វិធានការបន្តទៀតហើយ។ ប៉ុន្តែសួរថា ត្រូវបញ្ជូនពួកគេទៅស្រុកវិញយ៉ាងណានោះ ខ្ញុំសូមទោសមិនទាន់អាចឆ្លើយជូនបានទេ»។
លោក គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍មិនអាចទាក់ទងតាមទូរស័ព្ទសុំអត្ថាធិប្បាយបានទេកាលពីថ្ងៃទី ២៦ កក្កដា។
លោក ជួន ណារិន្ទ ស្នងការនគរបាលខេត្តព្រះសីហនុនៅព្រឹកថ្ងៃទី ២៦ កក្កដា បានប្រាប់ឱ្យដឹងថា ការងារនេះសមត្ថកិច្ចរបស់លោកមិនបានអនុវត្តផ្ទាល់ទេ និងគ្រាន់តែសហការប៉ុណ្ណោះ។
ទោះយ៉ាងណា បើតាមរបាយការណ៍របស់សមត្ថកិច្ចខេត្តព្រះសីហនុបានឱ្យដឹងថា កាលពីយប់ថ្ងៃទី ២៤ កក្កដា សមត្ថកិច្ចបានឃាត់នាវារបស់ចិន ១ គ្រឿង មានដោតទង់ជាតិកម្ពុជាចូលមកសមុទ្រក្នុងខេត្តព្រះសីហនុ។ ដោយនាវានោះឈ្មោះ តុង ហាយ មកពីខេត្តហ៊្វូចៀន ប្រទេសចិន។
នៅក្នុងនាវានោះមានជនជាតិចិន ៣៦ នាក់ ក្នុងនោះមានស្រី ១ នាក់ និងជនជាតិខ្មែរ ២ នាក់ជាកម្មករ។ នាវានេះបានចាកចេញពីកំពង់ផែ ឈ្មោះ ហ៊្វូអាន ខេត្ត ហ៊្វូចៀន នៅថ្ងៃទី ១៨ ខែកក្កដា ឆ្នាំ ២០២១៕
