ស្ទឹងត្រែងៈ សមត្ថកិច្ចកងរាជអាវុធហត្ថខេត្តស្ទឹងត្រែងបានបញ្ជូនជនជាតិវៀតណាម និងខ្មែរសរុបចំនួន ១៥ នាក់ទៅតុលាការកាលពីម្សិលមិញ បន្ទាប់ពីបានឃាត់ខ្លួនកាលពីថ្ងៃទី ២៤-២៥ ខែកក្កដា ក្នុងពេលចុះបង្ក្រាបទីតាំងធ្វើអាជីវកម្មរ៉ែ (រ៉ែថ្មម៉ាប) ខុសច្បាប់នៅភូមិអន្លង់ស្វាយ ឃុំអូររៃ ស្រុកថាឡាបរិវ៉ាត់ ដោយបានរឹបអូសទាំងម៉ាស៊ីនខួងថ្មធុនធំជាច្រើនគ្រឿង។
តាមរបាយការណ៍របស់សមត្ថកិច្ចបានឱ្យដឹងថា ប្រតិបត្តិការនេះធ្វើឡើងក្រោមការបញ្ជាផ្ទាល់ពីលោក សៅ សុខា អគ្គមេបញ្ជាការរងកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងប្រធានគណៈកម្មាធិការជាតិបង្ក្រាបបទល្មើសធនធានធម្មជាតិ និងគណៈបញ្ជាការឯកភាពខេត្ដស្ទឹងត្រែងដឹកនាំប្រតិបត្តិការដោយលោក អៀង វ៉ាន់ឌី មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពីលោក ជា សុភ័ក្ដ្រ ព្រះរាជអាជ្ញារងនៃអយ្យការអមសាលាដំបូងខេត្តស្ទឹងត្រែង។
របាយការណ៍បានឱ្យដឹងថាប្រតិបត្តិការបង្ក្រាបការរុករករ៉ែខុសច្បាប់នេះធ្វើឡើងរយៈពេល ២ ថ្ងៃ គឺនៅថ្ងៃទី ២៤ ខែកក្កដា នៅភូមិ អន្លង់ស្វាយ ឃុំអូររៃ ស្រុកថាឡាបរិវ៉ាត់ ដោយឃាត់ខ្លួនមនុស្សបានចំនួន ៧ នាក់ក្នុងពេលដែលជនល្មើសកំពុងធ្វើសកម្មភាព បើកការដ្ឋានខួងរុករករ៉ែ ចំនួន ៣ កន្លែង។
ចំណែកនៅថ្ងៃទី ២៥ ខែកក្កដា សមត្ថកិច្ចបានបន្តបង្ក្រាបនៅទីតាំងដដែលក៏បានឃាត់ខ្លួនជនសង្ស័យចំនួន ៨ នាក់ទៀត។
លោក ម៉ែន គុង អ្នកនាំពាក្យសាលាខេត្តស្ទឹងត្រែងបានប្រាប់ ភ្នំពេញ ប៉ុស្តិ៍ កាលពីម្សិលមិញថា សមត្ថកិច្ចបានឃាត់មនុស្សទាំង ១៥ នាក់នេះ ដោយសារពួកគេបានធ្វើអាជីវកម្ម និងសកម្មភាពរុករករ៉ែ និងដាក់ម៉ាស៊ីនខួងយករ៉ែ (រ៉ែថ្មធម្មជាតិ ឬថ្មម៉ាប) ដោយគ្មានច្បាប់អនុញ្ញាត។
លោកបានថ្លែងថា៖ «ឥឡូវបញ្ចប់នីតិវិធីនៅកងរាជអាវុធហត្ថហើយ គឺបានបញ្ជូនមនុស្សទាំង ១៥ នាក់ ទៅបន្តនីតិវិធីនៅអយ្យការអមសាលាដំបូងខេត្ដហើយ»។
លោក ជា សុភ័ក្ត្រ ព្រះរាជអយ្យការរងអមសាលាដំបូងខេត្តស្ទឹងត្រែងបានឱ្យដឹងកាលពីម្សិលមិញថា ពេលនេះអយ្យការអមសាលាដំបូងកំពុងបន្តសាកសួរជនសង្ស័យទាំង ១៥ នាក់នៅឡើយ៕