ភ្នំពេញៈ នគរបាលព្រហ្មទណ្ឌកម្រិតស្រាលរាជធានីភ្នំពេញបានឃាត់ខ្លួនមន្ត្រីយោធាម្នាក់នៅរសៀលថ្ងៃទី ២៦ កក្កដា ពាក់ព័ន្ធឆបោកក្នុងទំហំទឹកប្រាក់ប្រមាណ ៩២ ម៉ឺនដុល្លារអាមេរិក។
លោក ប៊ុន សត្យា នាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញបានឱ្យដឹងនៅថ្ងៃទី ២៦ កក្កដាថា លោកកំពុងប្រតិបត្តិការការងារនេះហើយក៏បានផ្តាច់ខ្សែទូរស័ព្ទទៅវិញ។ ប៉ុន្តែទោះយ៉ាងណាបើតាមដីកាដែលចេញដោយលោកព្រះរាជអាជ្ញារង ស៊ិត វណ្ណៈ ដែលចុះថ្ងៃទី ១៥ កក្កដាហើយ ភ្នំពេញ ប៉ុស្តិ៍ ទើបទទួលបាននៅថ្ងៃទី ២៦ កក្កដា បានបង្ហាញថា បញ្ជាឱ្យឈ្មោះ អេង អូន ភេទប្រុស អាយុ ៤២ ឆ្នាំ ជនជាតិខ្មែរមានទីលំនៅបច្ចុប្បន្នស្នាក់នៅភូមិ ២ សង្កាត់លេខ ៣ ក្រុងព្រះសីហនុ ខេត្តព្រះសីហនុ ចូលខ្លួនមកកាន់សាលាដំបូងរាជធានីភ្នំពេញ។
នៅក្នុងដីកាបញ្ជាក់ថា៖ «ឱ្យចូលបង្ហាញខ្លួននៅអយ្យការអមសាលាដំបូងរាជធានីភ្នំពេញឱ្យបានមុនថ្ងៃទី ៩ សីហាឆ្នាំ ២០២១។ ក្នុងបទរំលោភលើទំនុកចិត្តតាមបណ្តឹងរបស់ឈ្មោះ ប្រាក់ ប្រាកដ»។
ចំពោះប្រតិបត្តិការឃាត់ខ្លួនបុរសឈ្មោះ អេង អូន ម្នាក់នេះត្រូវបានមន្ត្រីនគរបាលនៃស្នងការដ្ឋាននគរបាលរាជធានីភ្នំពេញ ១ រូប ស្នើមិនឱ្យបញ្ចេញឈ្មោះប្រាប់ថា ប្រតិបត្តិការនេះបានធ្វើឡើងនៅវេលាថ្ងៃត្រង់ ថ្ងៃទី ២៦ ខែ កក្កដា ឆ្នាំ ២០២១ ទល់មុខផ្សារស៊ីធីម៉លក្នុងភូមិសាស្ត្រទឹកដីខណ្ឌ៧មករា រាជធានីភ្នំពេញ។
ឈ្មោះ អេង អូន គឺជាមន្ត្រីយោធាបម្រើការនៅ អង្គភាពកងទ័ពអាកាសកងកេង ខេត្តព្រះសីហនុ និងជាប្រធានក្រុមហ៊ុនអភិវឌ្ឍន៍ ភ្នំថ្កូវផងដែរ។ បុរសម្នាក់នេះត្រូវសមត្ថកិច្ចឃាត់ខ្លួនក្នុងបទឆបោក និងរំលោភលើទំនុកចិត្តក្នុងទឹកប្រាក់ប្រមាណជា ៩២ ម៉ឺនដុល្លារអាមេរិក។
លោកថា៖ «បុរសរូបនេះក៏មានជំពាក់លុយពិន័យជាមួយស្ថាប័នរដ្ឋមួយដែរ»៕