.jpg)
អតីតបុគ្គលិកព្រលានសៀមរាបពេលតវ៉ាពីថ្ងៃ ២៣ កក្កដា។ រូបថត ហ្វេសប៊ុក
សៀមរាបៈ អតីតបុគ្គលិកព្រលានយន្តហោះខេត្តសៀមរាបចំនួន ៣០ នាក់ តំណាងឱ្យអតីតបុគ្គលិក ១៣១ នាក់ ដែលត្រូវបានក្រុមហ៊ុនបញ្ចប់កិច្ចសន្យា បានផ្តើមតវ៉ាជាថ្មី ដើម្បីទាមទារឱ្យបន្តកិច្ចចរចារកដំណោះស្រាយបញ្ហាដែលនៅសេសសល់ ខណៈប្រធានមន្ទីរការងារខេត្តអះអាងថា ការទាមទារនេះគឺលើសពីច្បាប់កំណត់ដែលពិបាកនឹងផ្តល់ជូនបាន។
លោក មុំ សឹមសិលា បុគ្គលិកដែលត្រូវបានក្រុមហ៊ុនបញ្ឈប់ពីការងារ និងមានអតីតភាពការងារ ១៩ ឆ្នាំ បានប្រាប់ ភ្នំពេញ ប៉ុស្តិ៍ ពីម្សិលមិញថា ការតវ៉ាជាថ្មីនេះ ក្រោយពីការចរចារកដំណោះស្រាយដែលនៅសេសសល់ត្រូវបានផ្អាកជាច្រើនខែចាប់តាំងពីខែកុម្ភៈមក ដោយសារវិបត្តិកូវីដ ១៩។
លោកបានបន្តថា ដោយសារបច្ចុប្បន្នពួកលោកកំពុងស្ថិតក្នុងស្ថានភាពលំបាកមិនអាចបន្តរង់ចាំដំណោះស្រាយដែលនៅសេសសល់បាន ទើបសម្រេចប្រមូលផ្តុំគ្នាក្នុងទ្រង់ទ្រាយតូចពីថ្ងៃទី ២៣ កក្កដា ដើម្បីស្នើឱ្យមន្ទីរការងារបន្តកិច្ចចរចានេះឡើងវិញ។
លោកបានបញ្ជាក់ថា៖ «បច្ចុប្បន្ន ខ្ញុំមិនមានចំណូលអ្វីទាំងអស់ ខ្ញុំមានកូន ៣ នាក់ក្នុងបន្ទុក ហើយប្រពន្ធខ្ញុំត្រូវចប់ការងារនៅខែនេះទៀត ហើយអ្នកដទៃទៀត គឺជួបបញ្ហាជីវភាពនេះដូចគ្នា។ ដូច្នេះពួកយើងនឹងតវ៉ារហូតទៅស្ថាប័នពាក់ព័ន្ធ ដើម្បីជួយពួកយើង បើនៅតែគ្មានដំណោះស្រាយ»។
កាលពីខែវិច្ឆិកា ឆ្នាំមុន បុគ្គលិកព្រលានយន្តហោះខេត្តសៀមរាបចំនួន ១៦១ នាក់ ត្រូវបានក្រុមហ៊ុនវីស៊ី ឬខេម (VICI/CAMS) ដែលជាក្រុមហ៊ុនមួយទទួលបានសិទ្ធិវិនិយោគព្រលានយន្តហោះបញ្ឈប់ពីការងារដោយសំអាងថា មកពីវិបត្តិជំងឺកូវីដ ១៩។ ដោយមានការទាមទារជាបន្តបន្ទាប់ ក្រុមហ៊ុនក៏យល់ព្រមទទួលបុគ្គលិកចំនួន ៣០ នាក់ ឱ្យចូលធ្វើការវិញដោយសន្យាទូទាត់សំណងតាមច្បាប់។
លោក រ៉ន រ៉ាវ៉ាន់ ប្រធានសហជីពព្រលានយន្តហោះខេត្តសៀមរាប និងជាប្រធានសហព័ន្ធសហជីពវិស័យដឹកជញ្ជូនកម្ពុជាបានឱ្យដឹងថា ការចរចាចុងក្រោយគឺធ្វើឡើងកាលពីខែកុម្ភៈ ដោយភាគីពាក់ព័ន្ធបានឯកភាពលើសំណើមួយចំនួនក្នុងចំណោមការទាមទារចំនួន ៤ ចំណុច។
លោកបានបន្តថា សំណើទាំង ៤ នោះគឺចំណុចទី១ ត្រូវបានឯកភាពគ្នាទាំងស្រុងចំពោះការទូទាត់ប្រាក់អតីតភាពការងារ ដែលត្រូវផ្តល់ជូនបុគ្គលិកដោយយកប្រាក់ខែដែលបុគ្គលិកទទួលបានពេញក្នុងរយៈពេល ៣ ខែឆ្នាំ ២០២០ មកទូទាត់។
លោកបានបន្ថែមថា ចំពោះចំណុចទី២ គឺការទាមទារប្រាក់សំណងជំងឺចិត្តរយៈពេល ៦ ខែខណៈចំណុចនេះត្រូវបានក្រុមហ៊ុនផ្តល់ជូនត្រឹម ៣ ខែប៉ុណ្ណោះ និងចំណុចទី៣ គឺការសន្យារបស់ក្រុមហ៊ុនក្នុងការទទួលយកបុគ្គលិកដែលបានបញ្ឈប់ឱ្យចូលធ្វើការវិញក្នុងពេលដែលស្ថានភាពវិលមករកប្រក្រតីភាព ដោយបុគ្គលិកទាមទារឱ្យមានសុពលភាព ៥ ឆ្នាំ ចំណែកក្រុមហ៊ុនផ្តល់ជូនត្រឹម ៣ ឆ្នាំ និងចុងក្រោយគឺបុគ្គលិកទាមទារឱ្យមានការលើកលែងការកាត់ពន្ធចំពោះសំណងដែលទទួលបានសរុប។
លោក រ៉ន រ៉ាវ៉ាន់ បានអះអាងថា៖ «ដោយសារតែការបិទក្រុង បិទអី ដោយសាររឿងកូវីដ បានធ្វើឱ្យការចរចាស្វែងរកដំណោះស្រាយ ដែលសេសសល់ត្រូវបានពន្យារពេល...»។
លោក ច័ន្ទ សុខុមចិន្ដា ប្រធានមន្ទីរការងារខេត្តសៀមរាបប្រាប់ភ្នំពេញប៉ុស្តិ៍ថា មន្ទីរមិនអាចរៀបចំកិច្ចចរចាដែលស្នើឡើងនេះបានទេ ដោយសារការរីករាលដាលជំងឺកូវីដ ១៩។ ចំពោះបញ្ហាសេសសល់ដែលបុគ្គលិកព្រលានយន្តហោះ ទាមទារគឺវាមានវិសាលភាពលើសច្បាប់ដែលមិនអាចអនុវត្តបានទេ។
លោកថា៖ «អ្វីដែលមាននៅក្នុងច្បាប់ មន្ត្រីបានលាតត្រដាង និងបានផ្តល់ជូនដោយក្រសួងការងារធ្វើការគណនាជូនពួកគាត់។ ក្នុងនោះក៏បានបកស្រាយ ចំពោះអត្ថប្រយោជន៍អ្វីដែលត្រូវទទួលបាន និងសំណងអ្វីដែលមិនត្រូវទទួលបានតាមច្បាប់។
ប៉ុន្តែការទាមទាររបស់គាត់ដែលសេសសល់ហ្នឹង គឺមិនត្រឹមត្រូវតាមលក្ខខណ្ឌច្បាប់»។
ជាមួយនឹងសំណើសុំបន្តកិច្ចចរចា លោកបានអះអាងថា៖ «ការដោះស្រាយនេះគឺមានមេកើយ និងបុគ្គលិក គឺកន្លងទៅមានការសម្របសម្រួលរួចអស់ហើយ ហើយបញ្ហាដែលពួកគាត់ស្នើសុំនេះ គឺមិនអាចធ្វើតាមការទាមទាររបស់គាត់បានទេ ព្រោះការប្រមូលផ្តុំក្នុងពេលនេះ គឺមិនមានអំណោយផលក្នុងការជួបប្រមូលផ្តុំបាននោះទេ»។
បើតាមលោក ច័ន្ទ សុខុមចិន្តា កន្លងមកគឺខាងក្រុមហ៊ុនព្រលានយន្តហោះបានទូទាត់ថវិកា និងសំណង ដែលមួយចំនួនធ្វើឡើងតាមរយៈការឯកភាពរវាងអតីតបុគ្គលិក និងក្រុមហ៊ុនដោយមានការដឹងឮពីអាជ្ញាធរសម្របសម្រួល។ ប៉ុន្តែលោកថា អតីតបុគ្គលិកទាំងនោះនៅតែបន្តចង់បានសំណងជំងឺចិត្តបន្ថែម ដែលវាលើសទៅនឹងនីតិវិធីច្បាប់៕
វីដេអូ៖
