.jpg)
គ្រឿងញៀនជាង ១៣៤ គីឡូក្រាម ត្រូវបានដុតបំផ្លាញចោលនៅខេត្តត្បូងឃ្មុំ កាលពីម្សិលមិញ។ រូបថត NACD
ត្បូងឃ្មុំៈ រដ្ឋបាលខេត្តត្បូងឃ្មុំ និងគណៈកម្មការដុតបំផ្លាញគ្រឿងញៀនខេត្តត្បូងឃ្មុំពីម្សិលមិញ បានដុតកម្ទេចចោលនូវគ្រឿងញៀនជាង ១៣៤ គីឡូក្រាម ដែលប្រមូលបានពីការបង្ក្រាបបទល្មើសជាង ៨០០ សំណុំរឿងក្នុងខេត្តចំនួន ៨។ នេះបើយោងតាមការផ្សព្វផ្សាយរបស់អគ្គស្នងការដ្ឋាននគរបាលជាតិ។
អគ្គស្នងការដ្ឋាននគរបាលជាតិបានឱ្យដឹងនាថ្ងៃទី ២៧ កក្កដាថា គ្រឿងញៀនដែលដុតកម្ទេចចោលនាពេលនេះទទួលបានពីសាលាដំបូង និងអយ្យការអមសាលាដំបូងខេត្តចំនួន ៨ រួមមាន ខេត្តត្បូងឃ្មុំ ខេត្តកំពង់ចាម ខេត្តកំពង់ធំ ខេត្តក្រចេះ ខេត្តស្ទឹងត្រែង ខេត្តរតនគិរី ខេត្តមណ្ឌលគិរី និងខេត្តព្រះវិហារ ដែលមានទម្ងន់ជា ១៣៤ គីឡូក្រាម និងគ្រឿងញៀនប្រភេទគ្រាប់ WY ចំនួន ៥៨ គ្រាប់។
លោក ឡុង ហុកម៉េង ព្រះរាជអាជ្ញាអមសាលាដំបូងខេត្តត្បូងឃ្មុំ និងជាប្រធានគណៈកម្មការដុតបំផ្លាញគ្រឿងញៀន ខេត្តត្បូងឃ្មុំ បានថ្លែងក្នុងពិធីដុតបំផ្លាញនោះថា បរិមាណគ្រឿងញៀនជាច្រើនសន្ធឹកសន្ធាប់ខាងលើនេះ គឺពួកឧក្រិដ្ឋជនបានយកគ្រឿងញៀន ធ្វើជាមុខរបរជំនួញ។
លោកបញ្ជាក់ថា គ្រឿងញៀននេះបានពង្វក់ស្មារតីអូសទាញដល់ជនស្លូតត្រង់ភាគច្រើនជាយុវវ័យឱ្យប្រើប្រាស់គ្រឿងញៀនដោយខុសច្បាប់បណ្តាលឱ្យខូចសុខភាព និងឈានរហូតដល់ប្រព្រឹត្តបទល្មើសជាអាទិ៍ អំពើឃាតកម្ម ចាប់ជំរិត រំលោភសេពសន្ថវៈ លួច ឆក់ ប្លន់ទ្រព្យសម្បត្តិ។ បង្កើតជាក្រុមបងតូចបងធំ ប្រព្រឹត្តអំពើហិង្សាក្នុងគ្រួសារ បង្ក ភាពអសន្តិសុខ ធ្វើឱ្យប៉ះពាល់ដល់សណ្តាប់ធ្នាប់ និងរបៀបរៀបរយសាធារណៈក្នុងសង្គមជាតិផងដែរ។
លោក ឡុង ហុកម៉េង បានថ្លែងថា៖ «ចំណែកសមត្ថកិច្ចទាំងអស់ ទាំងមន្ត្រីនគរបាលយុត្តិធម៌ អាជ្ញាធរមូលដ្ឋាន ព្រមទាំងសា្ថប័ន តុលាការ បានខិតខំយកចិត្តទុកដាក់អនុវត្តវិធានការច្បាប់ដោយមិនយោគយល់ ឬអត់ឱនដល់ជនទាំងឡាយណា ដែលបានប្រព្រឹត្តបទល្មើសទាំងអស់នេះជាដាច់ខាត។ បរិមាណគ្រឿងញៀនដ៏ច្រើននេះ ប្រសិនបើសមត្ថកិច្ចបង្ក្រាបមិនទាន់ពេលវេលាទេនោះ វានឹងបង្កផលប៉ះពាល់ធ្ងន់ធ្ងរដល់សុខភាពប្រជាពលរដ្ឋ ជាពិសេសអនាគតយុវវ័យដែលជាទំពាំងស្នងឫស្សី រាប់ពាន់ម៉ឺននាក់ជាក់ជាមិនខានឡើយ»៕
