ភ្នំពេញៈ លោក វ្ល៉ាឌីមៀរ ពូទីន ប្រធានាធិបតីនៃសហព័ន្ធរុស្ស៊ីបានផ្តល់គ្រឿងឥស្សរិយយសមិត្តភាពដល់ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្រាប់ការចូលរួមចំណែកដ៏សំខាន់ក្នុងការពង្រឹងមិត្តភាពរវាងប្រជាជនរុស្ស៊ី និងកម្ពុជា។ យោងតាមការចុះផ្សាយកាលពីថ្ងៃទី ២៦ កក្កដារបស់ស្ថានទូតសហព័ន្ធរុស្ស៊ីប្រចាំនៅកម្ពុជា។
លោក Anatoly Borovik ឯកអគ្គរដ្ឋទូតសហព័ន្ធរុស្ស៊ីប្រចាំកម្ពុជាសរសេរលើបណ្ដាញ Twitter កាលពីថ្ងៃទី ២៦ ខែកក្កដានេះថា៖ «សម្ដេច ហ៊ុន សែន នាយករដ្ឋមន្ត្រីកម្ពុជា ត្រូវបានបំពាក់គឿងឥស្សរិយយសថ្នាក់មិត្តភាពសម្រាប់ការចូលរួមចំណែកដ៏សំខាន់ក្នុងការពង្រឹងមិត្តភាពរវាងប្រជាជនរុស្ស៊ី និងកម្ពុជា។ គំនិតផ្តួចផ្តើមរួមគ្នាជាច្រើនទៀតកាន់តែល្អប្រសើរ សម្រាប់ប្រជាជាតិយើងទាំង ២»។
លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជាបានថ្លែងឱ្យដឹងថា លោកនាយករដ្ឋមន្ដ្រី ហ៊ុន សែន បានអនុវត្ដនូវគោលនយោបាយមួយ គឺកំណែទម្រង់ខាងក្នុងពង្រីកមិត្ដនៅខាងក្រៅ។
លោកថ្លែងថា៖ «នេះគឺជាជោគជ័យដ៏ត្រចះត្រចង់របស់សម្ដេច ដែលបានដឹកនាំកម្ពុជាឱ្យកា្លយជាមិត្ដជាមួយប្រទេសធំៗដូចជាប្រទេសរុស្ស៊ី ចិន និងប្រទេសជុំវិញខ្លួនយើងផ្សេងទៀត ដោយមិនយកអ្នកណាជាសត្រូវឡើយនៅលើពិភពលោកនេះ វាមិនមែនគ្រាន់តែជាកិត្ដិយសទេ វាក្លាយទៅជាការអនុវត្ដនូវគោលនយោបាយការបរទេសរបស់កម្ពុជាជាមួយប្រទេសរុស្ស៊ី ក៏ដូចជាប្រទេសដទៃទៀត»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានថ្លែងថា ចាប់តាំងពីឆ្នាំ ១៩៧៩រហូតដល់បច្ចុប្បន្នទំនាក់ទំនងរវាងប្រទេសកម្ពុជា និងសហព័ន្ធរុស្ស៊ីគឺមានលក្ខណៈលេចធ្លោ ប៉ុន្ដែទំនាក់ទំនងនេះបានចុះខ្សោយបន្តិចដោយសារអន្តរកាលនយោបាយក្នុងឆ្នាំ ១៩៩០-១៩៩៣ ហើយចាប់ពីឆ្នាំ ១៩៩៣ រហូតដល់បច្ចុប្បន្នទំនាក់ទំនងប្រទេសទាំង ២ គឺមានលក្ខណៈល្អជាលំដាប់ពី ១ ថ្ងៃទៅ ១ ថ្ងៃ។
លោកបានថ្លែងថា៖ «ការរីកចម្រើនឥតឈប់ឈររវាងប្រទេសទាំង ២ នេះ គឺមិនអាចកាត់ផ្ដាច់បានទេ ចំពោះតួនាទីដែលមិនអាចខ្វះបានរបស់សម្ដេចតេជោ ហ៊ុន សែនតាំងពី ១៩៧៩ ដល់ ១៩៩០ ក្នុងឋានៈជារដ្ឋមន្ដ្រីការបរទេសផងជានាយករដ្ឋមន្ដ្រីផងដែលក្នុងដំណាក់កាលនោះបានធ្វើឱ្យមានទំនាក់ទំនងល្អរវាងប្រទេសទាំង ២»។
លោក គិន ភា បានឱ្យដឹងថា តាមរយៈទំនាក់ទំនងល្អនេះនិស្សិតខ្មែរជាច្រើននាក់ត្រូវបានបញ្ជូនទៅបណ្ដុះបណ្ដាលនៅរុស្ស៊ី ហើយនិស្សិតទាំងនោះបានវិលត្រឡប់មកប្រទេសកម្ពុជាវិញ ប្រកបដោយសមត្ថភាព និងកាន់តួនាទី មុខតំណែងធំៗនៅក្នុងជួររាជរដ្ឋាភិបាលរហូតដល់បច្ចុប្បន្ន។
លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិបានថ្លែងថា ការផ្តល់គ្រឿងឥស្សរិយយសនេះធ្វើឱ្យទំនាក់ទំនងរវាងប្រទេសទាំង ២ រឹតតែមានភាពទូលំទូលាយ និងរឹងមាំថែមទៀត។
លោកបានថ្លែងថា៖ «ប្រទេសកម្ពុជា និងសហព័ន្ធរុស្ស៊ីមានទំនាក់ទំនងល្អតាំងពីក្រោយពេលផ្ដួលរំលំរបបប្រល័យពូជសាសន៍ប៉ុលពត។ តាំងពីពេលនោះរហូតមកដល់បច្ចុប្បន្ន ទំនាក់ទំនងរបស់ពួកយើងនៅតែរឹងមាំល្អ។ ហើយការផ្ដល់គ្រឿងឥស្សរិយយសថ្នាក់មិត្តភាពគឺបានបង្ហាញការរឹតចំណងនៃកិច្ចសហប្រតិបត្ដិការប្រទេសទាំង ២ កាន់តែរឹងមាំបន្ថែមទៀត»។
ក្នុងកាលៈទេសៈនេះដែរ រដ្ឋមន្ដ្រី និងមន្ដ្រីជាន់ខ្ពស់ក្នុងជួររាជរដ្ឋាភិបាលបានផ្ញើសារអបអរសាទរជាបន្តបន្ទាប់គ្នាផងដែរ ដូចជា លោក អ៊ិត សំហេង រដ្ឋមន្ដ្រីក្រសួងការងារ និងបណ្តុះបណ្តាលវិជ្ជាជីវៈ និងលោក ស៊ុយ សែម រដ្ឋមន្ដ្រីក្រសួងរ៉ែ និងថាមពល។
សារនោះបញ្ជាក់ផងដែរថាគ្រឿងឥស្សរិយយសនេះ គឺជាគ្រឿងឥស្សរិយយសរបស់រដ្ឋនៃសហព័ន្ធរុស្ស៊ី ដែលត្រូវបានបង្កើតឡើងដោយ លោក Boris Yeltsin អតីតប្រធានាធិបតីរុស្ស៊ីក្នុងឆ្នាំ ១៩៩៤ ដើម្បីផ្តល់ឱ្យជនជាតិរុស្ស៊ី ឬជនជាតិដទៃទៀត ដែលខិតខំលើកស្ទួយចំណងមិត្តភាព៕