កំពង់ឆ្នាំងៈ អាជ្ញាធរខេត្តកំពង់ឆ្នាំង និងអង្គការហេហ្វឺអន្តរជាតិកម្ពុជា គ្រោងបង្កើតរោងចក្រកែច្នៃមាន់នៅខេត្តកំពង់ឆ្នាំង ដែលរំពឹងផ្តល់ផលដល់ប្រជាសហគមន៍ជាង ៥ ០០០ គ្រួសារ ខណៈគម្រោងនេះនឹងជ្រើសរើសយកស្រុករលាប្អៀរ ធ្វើជាទីតាំងកែច្នៃមាន់ សម្រាប់សហគមន៍ ដោយគ្រោងចំណាយថវិកាជិត ១,៥ លានដុល្លារ។
ការសាងសង់រោងចក្រច្នៃមាន់នេះ គឺជាផ្នែកមួយនៃគម្រោង «សហគ្រាសកែច្នៃមាន់ស្រែខ្មែរសម្រាប់មោទនភាពជាតិកម្ពុជា» ក្នុងគោលបំណងជួយលើកកម្ពស់ និងជំរុញទីផ្សារកសិផលខ្មែរ។ កាលពីថ្ងៃទី ២៦ ខែកក្កដា លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានជួបពិភាក្សាការងារជាមួយលោក ញ៉ែម សារ៉េត នាយកអង្គការហេហ្វឺប្រចាំនៅកម្ពុជា ដើម្បីអនុវត្តគម្រោងនេះ។
លោក ស៊ុន សុវណ្ណារិទ្ធិ បានប្រាប់ភ្នំពេញប៉ុស្តិ៍នៅថ្ងៃទី ២៧ កក្កដាថា គម្រោងនេះ នឹងអាចរួមចំណែកលើកកម្ពស់ជីវភាពរបស់ប្រជាពលរដ្ឋយ៉ាងហោចណាស់ជាង ៥ ០០០ គ្រួសារឱ្យពួកគាត់មានជីវភាពល្អប្រសើរឡើងមួយកម្រិតថែមទៀត តាមរយៈការបង្កើតមុខរបរនាំមកនូវប្រាក់ចំណូលបន្ថែម ក៏ដូចជាធានាបាននូវសន្តិសុខស្បៀង និងទ្រទ្រង់សុខុមាលភាពរបស់ប្រជាពលរដ្ឋ។
លោកបន្តថា ប្រជាពលរដ្ឋក្នុងសហគមន៍ចំនួន ៥ ក្នុងខេត្តកំពង់ឆ្នាំងនឹងទទួលបានការបណ្តុះបណ្តាលពីការចិញ្ចឹមមាន់ រួមទាំងការជួយពីគម្រោងនេះជាច្រើនទៀត ដូចជា ការរៀបចំសាងសង់ផ្សារសហគមន៍កសិកម្ម ដែលជាបណ្តុំនៃកសិអាជីវកម្មជាមជ្ឈមណ្ឌលប្រមូលផ្តុំផលិតផលកសិកម្ម និងជាទីតាំងទិញ-លក់ផលិតផលកសិកម្មខ្មែរគ្រប់ប្រភេទនៅក្នុងតំបន់ និងផ្តល់ជូនរថយន្ត និងរ៉ឺម៉កដែលបំពាក់ដោយប្រព័ន្ធបច្ចេកទេស សម្រាប់ដឹកជញ្ជូនកសិផលកសិកម្ម។
លោកបានបញ្ជាក់ថា៖ «គម្រោងនេះល្អ សម្រាប់ប្រជាពលរដ្ឋយើង ដែលធានាដល់ការចិញ្ចឹមមាន់ប្រកបដោយបច្ចេកទេសរបស់ប្រជាកសិករយើង។ គម្រោងនេះ ថែមទាំងជួយដល់ទីផ្សារនឹងការកែច្នៃមាន់ ចូលរួមលើកតម្កើងការចិញ្ចឹមមាន់សាច់របស់រដ្ឋាភិបាលយើង»។
បើតាមលោក ស៊ុន សុវណ្ណារិទ្ធិ គម្រោងបង្កើតរោងចក្រកែច្នៃមាន់នេះ គឺចំណាយថវិកាពីអង្គការហេហ្វឺអន្តរជាតិកម្ពុជា ចំណែករដ្ឋបាលខេត្តនឹងផ្តល់ដីជាង ៣ ហិកតា ១ កន្លែង ក្នុងស្រុករលាប្អៀរសម្រាប់សាងសង់រោងចក្រនេះ។ ប៉ុន្តែយ៉ាងណា លោកបញ្ជាក់ថា គម្រោងសាងសង់នេះគឺស្ថិតក្នុងការពិចារណា ដែលអាចនឹងលេចជារូបរាង នៅសប្តាហ៍ក្រោយ បន្ទាប់ពីរដ្ឋបាលខេត្តធ្វើការសម្រេចលើសំណើនេះ។
លោក ញ៉ែម សារ៉េត នាយកអង្គការហេហ្វឺប្រចាំនៅកម្ពុជាបានប្រាប់ ភ្នំពេញ ប៉ុស្តិ៍ នៅថ្ងៃទី ២៧ កក្កដាថា អង្គការរបស់លោកបានបង្កើតសហគ្រាសកែច្នៃមាន់ស្រែខ្មែរ សម្រាប់មោទនភាពជាតិកម្ពុជានេះគឺមានរយៈពេល ៥ ឆ្នាំគឺចាប់ពីឆ្នាំ ២០២១ រហូតដល់ឆ្នាំ ២០២៦។
លោកបន្តថា ការសាងសង់រោងចក្រកែច្នៃមាន់នេះ គឺជាផ្នែកមួយរបស់គម្រោង ដែលចង់ឃើញប្រជាពលរដ្ឋខ្មែរ មានភាពរីកចម្រើនក្នុងផលិតកម្មមាន់ស្រែខ្មែរ និងអាចផ្គត់ផ្គង់មាន់ស្រែខ្មែរ ទៅកាន់ទីផ្សារក្នុងស្រុក។
លោកបានបញ្ជាក់ថា៖ «គម្រោងនេះ គឺមានវិសាលភាពធំធេងណាស់ សម្រាប់ប្រជាកសិករខ្មែរ ហើយចំនួនថវិកា ១,៣ លានដុល្លារនេះ គឺជាការចំណាយតូចមួយនៅក្នុងគម្រោងរបស់យើងទាំងមូលដែលវាសម្រាប់តែចំណាយទៅលើការសាងសង់អគារ និងឧបករណ៍បច្ចេកទេសសម្រាប់កែច្នៃមាន់ស្រែខ្មែរនៅក្នុងរោងចក្រនេះទេ។
លោក ញ៉ែម សារ៉េត បានអះអាងថា តាមរយៈគម្រោងនេះ អង្គការហេហ្វឺអន្តរជាតិកម្ពុជា បានសហការជាមួយអង្គការដៃគូ សហគមន៍កសិកម្ម ចំនួន ៧៥ ដៃគូអភិវឌ្ឍន៍ វិស័យឯកជន និងក្រសួងស្ថាប័នពាក់ព័ន្ធបានគាំទ្រ និងពង្រីកវិសាលភាពសមត្ថភាពផលិតរបស់គ្រួសារកសិករ ចិញ្ចឹមមេមាន់សរុបចំនួន ២៨៥ គ្រួសារ និងគ្រួសារកសិករផលិតមាន់យកសាច់ស្រស់ខ្មែរចំនួន ៤ ៩០០នាក់។ ដោយក្នុងនោះ អង្គការបានគាំទ្រជំរុញកសាងហេដ្ឋារចនាសម្ព័ន្ធទីផ្សារ ឃ្លាំងត្រជាក់ យានយន្តដឹកផលកសិកម្ម និងការចែកចាយផលិតផលមាន់ស្រែខ្មែរទៅកាន់ទីផ្សារ៕