.jpg)
មន្ត្រី CPU ចុះពិនិត្យក្មេងស្រីរងគ្រោះពីការរំលោភនៅខេត្តកំពង់ស្ពឺ នាខែនេះ។ រូប CPU
កំពង់ស្ពឺៈ នគរបាលព្រហ្មទណ្ឌខេត្តកំពង់ស្ពឺនៅថ្ងៃទី ២៧ កក្កដា បន្តស្វែងរកចាប់ខ្លួនជនសង្ស័យម្នាក់ករណីរំលោភហើយវាយក្បាលក្មេងស្រីរងគ្រោះអាយុ ១៥ ឆ្នាំរបួសធ្ងន់ប្រព្រឹត្តនៅឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺកាលពីថ្ងៃទី ២៥ កក្កដា ខណៈក្មេងរងគ្រោះកំពុងសង្គ្រោះនៅមន្ទីរពេទ្យគន្ធបុប្ផា។
លោក សាយ ប៊ុនថន អធិការនគរបាលស្រុកភ្នំស្រួចឱ្យដឹងនៅព្រឹកថ្ងៃទី ២៧ កក្កដាថា ដោយអនុវត្តតាមតួនាទី និងទទួលបញ្ជាពីលោក សម សាមួន ស្នងការនគរបាលខេត្តកំពង់ស្ពឺ គឺកម្លាំងសមត្ថកិច្ចរបស់លោក និងនគរបាលព្រហ្មទណ្ឌខេត្តកំពង់ស្ពឺកំពុងស្រាវជ្រាវស្វែងរកជនសង្ស័យ ម្នាក់ពាក់ព័ន្ធរំលោភសេពសន្ថវៈ និងប៉ងសម្លាប់ក្មេងស្រីរងគ្រោះបំបិទមាត់។
លោកប្រាប់តាមសម្តីសាក្សីនៅកន្លែងកើតហេតុថា ជនសង្ស័យមិនមែនជាមនុស្សរស់នៅ ក្នុងភូមិ-ឃុំនោះទេ ប៉ុន្តែមានឪពុក ម្តាយរស់នៅក្នុងភូមិកើតហេតុនោះ។ មុនកើតហេតុប្រមាណជា ១ ខែ ជនសង្ស័យមកពីរាជធានីភ្នំពេញ ដើម្បីមកលេងឪពុកម្តាយរបស់គេ ដែលមានផ្ទះនៅក្បែរផ្ទះក្មេងស្រីរងគ្រោះ។
លោកថ្លែងថា៖ «ករណីនេះយើងមិនទាន់អាចបង្ហាញឈ្មោះជនសង្ស័យបានទេ ព្រោះស្ថិតក្នុងប្រតិបត្តិការតាមចាប់»។
លោករៀបរាប់ថា ហេតុការណ៍ដែលកើតឡើងនេះអាចនៅចន្លោះពីម៉ោង ១២ ថ្ងៃត្រង់ ថ្ងៃទី ២៥ កក្កដា ប៉ុន្តែមានការឆោឡោពីអ្នកភូមិ នៅម៉ោងជាង ៣ រសៀលថ្ងៃទី ២៥ កក្កដា ដោយសារនៅពេលនោះក្មេងស្រីរងគ្រោះបានស្រែកហៅឱ្យគេជួយ ក្រោយពីនាងដឹងខ្លួនពីសន្លប់។
លោកបន្តថា៖ «ម្តាយក្មេងស្រីរងគ្រោះគាត់យកកូនទៅសង្គ្រោះនៅមន្ទីរពេទ្យបង្អែកខេត្តកំពង់ស្ពឺ ក្រោយមកទើបយើងដឹងដំណឹងនេះ»។
ចំណែកលោកស្រី កែវ សុផាត មេឃុំត្រែងត្រយឹងឱ្យដឹងនៅព្រឹកថ្ងៃទី ២៧ កក្កដា ដែរថា ក្មេងស្រីរងគ្រោះត្រូវបានជនសង្ស័យវាយក្បាលនឹងវត្ថុរឹងបែកក្បាលហូរឈាមរបួសយ៉ាងទម្ងន់។
លោកស្រីបញ្ជាក់ថា៖ «ប៉ុន្តែដោយសាររបួសធ្ងន់ពេកគ្រូពេទ្យបង្អែកខេត្តកំពង់ស្ពឺបន្តយកទៅមន្ទីរពេទ្យគន្ធបុប្ផាទៀត»។
លោកស្រី សុផា បន្តថា ក្នុងហេតុការណ៍នេះក៏មានខាងអង្គភាពសង្គ្រោះកុមារ (CPU) របស់ប្រទេសអូស្ត្រាលីប្រចាំនៅប្រទេសកម្ពុជាក៏ចុះមកសហការស៊ើបអង្កេតរឿងនេះដែរ។ បើតាមរបាយការណ៍របស់នគរបាលស្រុកភ្នំស្រួច ក្រុមការងារចម្រុះនគរបាលបាលកម្ពុជា និងអង្គភាព CPU កំពុងបន្តធ្វើការ បន្ទាប់ពីមានករណីរំលោភ និងប៉ុនប៉ងសម្លាប់ក្មេងរងគ្រោះ។
របាយការណ៍បង្ហាញថា មានបុរសជាអ្នកជិតខាងម្នាក់បានហៅជនរងគ្រោះទៅជួយធ្វើការក្នុងផ្ទះមានទីតាំងនៅក្នុងភូមិកើតហេតុ។ បន្ទាប់ពីក្មេងរងគ្រោះចូលដល់ក្នុងផ្ទះរបស់ជនសង្ស័យក៏ត្រូវបានជនសង្ស័យ រំលោភសេពសន្ថវៈហើយប៉ងវាយសម្លាប់ក្មេងរងគ្រោះ។ ជនល្មើសបានយកញញួរវាយក្បាលជនរងគ្រោះរហូតសន្លប់។
របាយការណ៍បន្តថា ជនល្មើសបានខ្ទាស់សោផ្ទះទុកជនរងគ្រោះនៅខាងក្នុងផ្ទះ ហើយបានរត់គេចខ្លួន។ នៅវេលារសៀលម៉ោងជាង ៣ អ្នកជិតខាងបានឮសំឡេង ស្រែកមកពីក្នុងផ្ទះជនសង្ស័យហើយអ្នកភូមិបានគាស់បើកទ្វារ។ ពេលនោះបានឃើញជនរងគ្រោះក្នុងស្ថានភាពធីងធោង និងមានរបួសធ្ងន់ជាច្រើនកន្លែងនៅលើផ្នែកក្បាល និងដងខ្លួន៕
វីដេអូ៖
