.jpg)
ជនសង្ស័យដែលចាប់រំលោភស្ត្រីមានប្តី ខណៈប្តីស្ត្រីនោះមិននៅផ្ទះ។ រូបថត នគរបាល
ភ្នំពេញៈ នគរបាលខណ្ឌដង្កោ នឹងបញ្ជូនបុរសម្នាក់ទៅសាលាដំបូងរាជធានីភ្នំពេញនៅថ្ងៃទី ២៩ ខែកក្កដា បន្ទាប់ពីឃាត់ខ្លួនបាន ៣ ថ្ងៃ ពាក់ព័ន្ធចាប់ស្ត្រីមានប្តីម្នាក់រំលោភសេពសន្ថវៈ ប្រព្រឹត្តនៅ សង្កាត់សាក់សំពៅ ខណ្ឌដង្កោ។
លោក ជឹម ស៊ីថា អធិការនគរបាលខណ្ឌដង្កោ ឱ្យដឹងនៅរសៀលថ្ងៃទី ២៨ ខែកក្កដាថា ជនសង្ស័យឈ្មោះ ផាន់ ដារ៉ា អាយុ ២៩ ឆ្នាំ នឹងត្រូវកម្លាំងនគរបាលរបស់លោកបញ្ជូនទៅសាលាដំបូងរាជធានីភ្នំពេញ នៅព្រឹកថ្ងៃទី ២៩ កក្កដា។
ប៉ុន្តែឯកសារសំណុំរឿងរបស់ជនសង្ស័យ គឺលោកបញ្ជូនទៅតំណាងអយ្យការមុនរួចហើយ។
លោកថ្លែងថា៖ «រឿងនេះ សមត្ថកិច្ចខ្ញុំចាប់តាមបណ្តឹងរបស់ជនរងគ្រោះ»។
លោក រស់ សុខា នាយនគរបាលប៉ុស្តិ៍រដ្ឋបាលសង្កាត់សាក់សំពៅ បានប្រាប់នៅរសៀលថ្ងៃទី ២៨ កក្កដាថា ស្ត្រីរងគ្រោះឈ្មោះ រ.ថ អាយុ ២១ ឆ្នាំ មានប្តីប្រកបរបរទិញលក់អេតចាយ ក្នុងទឹកដីសង្កាត់សាក់សំពៅ ក្នុងខណ្ឌដង្កោ។
លោកប្រាប់តាមសម្តីស្ត្រីរងគ្រោះថា តាមប្រភពព័ត៌មានបានឲ្យដឹងថា កាលពីយប់ថ្ងៃទី ២៣ កក្កដា នាងបានស្នាក់នៅក្នុងរោងអេតចាយម្នាក់ឯង ព្រោះប្តីរបស់នាង ទៅខេត្ត។
ពេលនោះជនសង្ស័យឃើញនាង ស្លៀករ៉ូបកំពុងអង្គុយក្នុងបន្ទប់ម្នាក់ឯង ក៏ដើរចូលមកក្នុងបន្ទប់តែដោយសារសំអាងថា ជាមនុស្សស្គាល់គ្នា ទើបនាងមិនគិតថា មានអ្វីកើតឡើងលើរូបនាងនោះទេ។
លោកបន្តថា ពេលនោះ ជនសង្ស័យបានបើកទូទឹកកកយកទឹកមួយដបផឹកហើយចាប់នាងឱបតែម្តង។
នៅពេលនោះនាងខំរើបំរាស់ដែរ ប៉ុន្តែខ្លាចជនសង្ស័យសម្លាប់។
បើតាមលោក សុខា បានស្រងសម្តីស្ត្រីរងគ្រោះថា៖ «ជនសង្ស័យ ចាប់បឺតមាត់នាង តែត្រូវនាងខាំ អណ្ដាតប៉ុន្តែមិនបានបណ្ដាលឱ្យជនល្មើសរបួសធ្ងន់ទេ។ គេគំរាមឱ្យនាងនៅឱ្យស្ងៀម កុំស្រែកប្រយ័ត្ន ខ្មាសគេ»។
លោកបន្តថា ពេលនោះ ស្ត្រីរងគ្រោះមិនហ៊ានស្រែកហើយខំប្រឹងរើតែរើមិនរួច។
លោកបន្តទៀតថា ក្រោយពីជនសង្ស័យធ្វើសកម្មភាពរំលោភជនរងគ្រោះបានសម្រេចរួចហើយក៏គេចខ្លួនតែម្តង។
ពេលភ្លាមៗនោះ ស្ត្រីរងគ្រោះមិនហ៊ានទូរស័ព្ទប្រាប់ប្តីរបស់នាងទេ។ លុះដល់ថ្ងៃទី ២៧ ខែកក្កដា នៅវេលាម៉ោងប្រហែល ៩ ព្រឹក ទើបនាងប្រាប់ប្តី និងបានរាយការណ៍ប្រាប់លោក ជឹម ស៊ីថា ហើយលោកអធិការ ក៏បាននាំកម្លាំងចុះឃាត់ខ្លួនជនសង្ស័យតែម្តង៕
