ភ្នំពេញ៖ ដើម្បីធានាបានប្រសិទ្ធភាពនៃការអនុវត្តវិធានការប្រយុទ្ធ និង ទប់ស្កាត់ការឆ្លងរាលដាលនៃជំងឺកូវីដ១៩ ជាពិសេស ក្នុងបរិបទដែលកម្ពុជាកំពុងប្រឈមនឹងការឆ្លងរីករាលដាលនៃជំងឺកូវីដ១៩ បណ្តាលមកពីមេរោគបំប្លែងខ្លួនថ្មីប្រភេទដែលតា រាជរដ្ឋាភិបាលកម្ពុជាបានសម្រេចចេញនូវការពង្រឹងវិធានការប្រយុទ្ធនឹងទប់ស្កាត់ការរាលដាលនេះនៅទូទាំងប្រទេសសម្រាប់រយៈពេល ១៤ថ្ងៃ ចាប់ពីម៉ោង ២៣និង ៥៩ នាទីយប់ថ្ងៃទី ២៩ ខែកក្កដានេះដល់ថ្ងៃទី១២ ខែសីហា។
ជាមួយគ្នានេះ រាជរដ្ឋាភិបាលដែលមានលោកនាយករដ្ឋមន្រ្តី ហ៊ុន សែន ជាប្រមុខដឹកនាំ ក៏បានដាក់ចេញនូវវិធានការចាំបាច់ចំនួន ១១ ដែលត្រូវអនុវត្តជាបន្ទាន់ផងដែរក្នុងយុទ្ធនាការនេះ។ នេះបើយោងតាមសារាចរ ស្តីពីការដាក់ចេញយុទ្ធនាការពង្រឹងវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ១៩ ចេញផ្សាយនាយប់ថ្ងៃទី២៨ ខែកក្កដានេះ។
លោកនាយករដ្ឋមន្រ្តីបានស្នើឱ្យអភិបាលរាជធានី-ខេត្តទាំងអស់ត្រូវដាក់ចេញនូវវិធានការរដ្ឋបាលនិងវិធានការសុវត្ថិភាពផ្នែកសុខាភិបាល ព្រមទាំងពង្រឹងការអនុវត្តវិធានការច្បាប់ នៅក្នុងភូមិសាស្រ្តរបស់ខ្លួនឱ្យបានព្រមៗពេលជាមួយគ្នា និងត្រូវអនុវត្តឱ្យបានម៉ឺងម៉ាត់ និងតឹងរ៉ឹង នៅក្នុងពេលអនុវត្តយុទ្ធនាការនេះ។
លោកបានបញ្ជាក់ថា៖ «ត្រូវដាក់ចេញនូវបម្រាមគោចរពីចន្លោះម៉ោង ២១យប់ ដល់ម៉ោង ៣ព្រឹក សម្រាប់ភូមិសាស្រ្តទាំងមូលឬផ្នែកណាមួយដែលស្ថិតក្រោមសមត្ថកិច្ចរបស់ខ្លួន ជាពិសេសសម្រាប់រាជធានីភ្នំពេញ ទីរួមខេត្ត និងទីប្រជុំជននានា»។
ជាមួយគ្នានេះដែរ លោកក៏បានឱ្យអភិបាលរាជធានី-ខេត្ត ត្រូវរៀបចំបន្ថែមនូវគោលដៅសាធារណៈសម្រាប់ការធ្វើតេស្តរហ័សរកមេរោគកូវីដ១៩ក្នុងភូមិសាស្រ្តរបស់ខ្លួន ដើម្បីបម្រើឱ្យសាធារណជនដោយឥតគិតថ្លៃផងដែរ៕