.jpg)
ទិដ្ឋភាពបិទខ្ទប់នៅតំបន់រោងចក្រជិតផ្លូវវេងស្រេងកាលពីខែឧសភា។ ហុង មិនា
ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈបានប្រកាសបន្តបើកប្រាក់ឧបត្ថម្ភជូនកម្មករនិយោជិតសរុបចំនួន ៥៩ ០១២ នាក់ នៅរោងចក្រសហគ្រាសចំនួន ១៧៥ ក្នុងវិស័យកាត់ដេរសម្លៀកបំពាក់ស្បែកជើង និងកាបូប ដែលស្ថិតនៅក្នុងតំបន់បិទខ្ទប់ជាលក្ខណៈទ្រង់ទ្រាយធំនៃរាជធានីភ្នំពេញ ក្រុងតាខ្មៅនៃខេត្តកណ្តាល និងក្រុងព្រះសីហនុនៃខេត្តព្រះសីហនុ (ក្នុងជំហានទី ២ ទី ៣ និងទី ៤)។
តាមសេចក្តីប្រកាសព័ត៌មានរបស់ក្រសួងការងារ និងបណ្តុះបណ្តាលវិជ្ជាជីវៈចុះថ្ងៃទី ២៨ ខែកក្កដា ម្សិលមិញបានឱ្យដឹងថា ធនាគារឯកទេសវីងនឹងផ្ញើសារអំពីការបើកប្រាក់ឧបត្ថម្ភចំនួន ១៦០ ០០០ រៀលតែ ១ លើកគត់ស្របតាមកម្មវិធីជំនួយសង្គមជាសាច់ប្រាក់ ក្រោយពេលបិទខ្ទប់របស់រាជរដ្ឋាភិបាលទៅលេខទូរស័ព្ទ ដែលកម្មករនិយោជិតបានផ្តល់មកឱ្យក្រសួងតាមរយៈរដ្ឋបាលរោងចក្រនាពេលកន្លងមកជាមួយនេះ ក្រសួងបានរំព្ញកថា ធនាគារឯកទេសវីងនឹងបង្វិលប្រាក់ឧបត្ថម្ភនេះ ជូនរាជរដ្ឋាភិបាលវិញ ប្រសិនបើបងប្អូនខកខានមិនបានទៅបើកប្រាក់ឧបត្ថម្ភក្នុងរយៈពេល ២១ ថ្ងៃ បន្ទាប់ពីទទួលបានសារតាមទូរស័ព្ទពីធនាគារឯកទេសវីង។ ដើម្បីបើកប្រាក់ឧបត្ថម្ភនេះកម្មករនិយោជិតត្រូវយកអត្តសញ្ញាណប័ណ្ណសញ្ជាតិខ្មែរ និងទូរស័ព្ទដែលទទួលបានសារនោះទៅកាន់ភ្នាក់ងារវីងដែលនៅជិតបំផុត។
ក្រសួងការងារបានបញ្ជាក់ថា កម្មករនិយោជិត មិនតម្រូវឱ្យបង់ថ្លៃសេវាទៅភ្នាក់ងារវីងឡើយ ពេលបើកប្រាក់ឧបត្ថម្ភនេះ។ ក្នុងករណីបងប្អូនកម្មករ និយោជិត ដែលបម្រើការងារនៅរោងចក្រចំនួន ១៧៥ នេះមិនបានទទួលសារទូរស័ព្ទពីធនាគារវីង ឬមានចម្ងល់ផ្សេងៗនោះសូមទាក់ទងតាមតេឡេក្រាម ឬទូរស័ព្ទ ១២៩៧ នោះក្រសួងនឹងបន្តជូនដំណឹងអំពីការបើកផ្តល់ប្រាក់ឧបត្ថម្ភនេះ។
ជុំវិញការបន្តបើកប្រាក់ឧបត្ថម្ភជូនកម្មករនេះលោក ហេង សួរ អ្នកនាំពាក្យក្រសួងការងារ និងបណ្តុះបណ្តាលមិនអាចទាក់ទង ដើម្បីសុំការបញ្ជាក់បន្ថែមបានទេ កាលពីម្សិលម្សិល។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាបានស្វាគមន៍ចំពោះរដ្ឋាភិបាលដែលបន្តឧបត្ថម្ភសាច់ប្រាក់ជូនកម្មករនិយោជិតនៅក្នុងតំបន់បិទខ្ទប់នេះ ដោយលោកថ្លែងថា នេះជាការជួយសម្រួលការលំបាកដល់ពួកគេបានមួយកម្រិត។
ទោះជាយ៉ាងណាលោក អាត់ ធន់ បានលើកឡើងថា ប្រសិនបើរដ្ឋាភិបាល បានឧបត្ថម្ភដល់កម្មករនិយោជិតរៀងរាល់ខែក៏រឹតតែល្អមួយកម្រិតទៀត ព្រោះការបិទខ្ទប់ក៏មានរយៈពេលយូរផងដែរ។ បើមិនដូច្នោះទេ រដ្ឋាភិបាលគួរតែបង្កើនសាច់ប្រាក់ឱ្យបានច្រើនជាងនេះ ដោយយ៉ាងហោចណាស់បាន ១០០ ដុល្លារអាមេរិក ទើបការចំណាយរបស់កម្មករ និងយោជិតគ្រប់គ្រាន់បាន។
លោកបានបញ្ជាក់ថា៖ «តាមពិតចំនួននេះវាតិចពេក យើងគិតមើលតម្លៃផ្ទះវាអស់ ២០ ទៅ ៣០ ដុល្លារហើយ និងអាហារហូបចុកអីផ្សេងទៀត វាអស់ជិត ១០០ ដុល្លារ ហើយនិងការចំណាយផ្សេងៗទៀត។ អ៊ីចឹង ខ្ញុំគិតថា យ៉ាងហោចណាស់ក៏ជិត ១៥០ ដុល្លារដែរ»។
លោក អាត់ ធន់ បានបញ្ជាក់ទៀតថា ប្រសិនបើនិយោជកបើកប្រាក់បៀវត្សរ៍ជូនកម្មករនិយោជិតនៅក្នុងអំឡុងពេលបិទខ្ទប់ក៏ពួកគាត់មិនមានការលំបាកដែរ ប៉ុន្តែរដ្ឋាភិបាលបានប្រកាសថានៅពេលព្យួររោងចក្រក្នុងអំឡុងពេលបិទខ្ទប់នេះកម្មករមិនទទួលបានអត្ថប្រយោជន៍ពីនិយោជកទេ ហើយរដ្ឋាភិបាលផ្តល់សាច់ប្រាក់ ៤០ ដុល្លារនេះមិនគ្រប់គ្រាន់ទេ។
មួយវិញទៀតលោក អាត់ ធន់ ក៏បានស្នើទៅរដ្ឋាភិបាលឱ្យឧបត្ថម្ភសាច់ប្រាក់ជូនដល់កម្មករផ្នែកសេវាកម្ម ឬបុគ្គលិកសណ្ឋាគារផ្សេងទៀតផងដែរ ដើម្បីឱ្យពួកគាត់មានលទ្ធភាពក្នុងការចំណាយ ពីព្រោះពួកគាត់ក៏ទទួលរងផលប៉ះពាល់ក្នុងអំឡុងពេលបិទខ្ទប់នេះដែរ៕
