.jpg)
សំណាកស្រាដែលសមត្ថកិច្ចប្រមូលកាលពីថ្ងៃ ២៧ កក្កដា។ រូបថត (ក.ប.ប)
កំពតៈ យ៉ាងហោចណាស់មានបុរស ៥ នាក់បានស្លាប់ និង ៣ នាក់ទៀតកំពុងបន្តសម្រាកព្យាបាលនៅមន្ទីរពេទ្យនៅឡើយ ដោយសង្ស័យករណីពុលស្រាសនិងស្រាថ្នាំពីថ្ងៃទី ២៦ កក្កដា នៅឃុំដូនយ៉យ ក្នុងស្រុកឈូក ខេត្តកំពត។ នេះបើតាមការអះអាងពីអាជ្ញាធរមូលដ្ឋានកាលពីព្រឹកថ្ងៃទី ២៨ ខែកក្កដា ឆ្នាំ ២០២១។
លោក ស៊ិន កើន នាយនគរបាលប៉ុស្តិ៍ ឃុំដូនយ៉យ បានប្រាប់ភ្នំពេញប៉ុស្តិ៍ថា ជនរងគ្រោះដែលស្លាប់ដោយសង្ស័យពុលស្រាស និងស្រាថ្នាំនោះរួមមាន ឈ្មោះ ពេជ្រ រឿន អាយុ ៥៤ ឆ្នាំ, ហូង ប៉ឹម អាយុ អាយុ ៣៧ ឆ្នាំ,វង្ស សារិន អាយុ ៥៤ ឆ្នាំ ដែលអ្នកទាំង ៣ មានលំនៅក្នុងភូមិ-ឃុំដូនយ៉យ។ ចំណែកជនរងគ្រោះឈ្មោះ ម៉ម វ៉ាន់ អាយុ ៥៣ ឆ្នាំ និងឈ្មោះ អ៊ីង ក្រូច អាយុ ៥៧ ឆ្នាំ មានលំនៅក្នុងភូមិក្រសាំងមានជ័យ ឃុំដូនយ៉យ ស្រុកឈូក។
លោកបញ្ជាក់ថា៖ «ករណីនេះ បានកើតឡើងបន្ទាប់ពីជនរងគ្រោះទាំង ៥ នាក់ រួមទាំងអ្នកភូមិមួយចំនួនបានទៅចូលរួមពិធីបុណ្យសពអ្នកភូមិម្នាក់កាលពីល្ងាចថ្ងៃទី ២៥ ខែកក្កដា ឆ្នាំ ២០២១ ហើយនាំគ្នាផឹកស្រាស និងស្រាថ្នាំ។ បន្ទាប់មកពួកគេក៏មានអាការ ឈឺក្បាល ក្អួតចង្អោរ និងថប់ដង្ហើមហើយបានស្លាប់ជាបន្តបន្ទាប់ ក្រោយបញ្ជូនទៅព្យាបាលនៅមន្ទីរពេទ្យបង្អែកស្រុកឈូក»។
សពជនរងគ្រោះទាំង ៥ ត្រូវបានក្រុមគ្រូពេទ្យធ្វើតេស្តរកមេរោគកូវីដ ១៩ តែលទ្ធផលអវិជ្ជមាន។ ប៉ុន្តែដោយផ្អែកលើអាការរបស់អ្នកជំងឺ និងការអះអាងពីសាច់ញាតិជនរងគ្រោះ និងអ្នកភូមិដែលបានធ្លាក់ខ្លួនឈឺផ្សេង ក្រុមគ្រូពេទ្យជំនាញក៏បានដាក់ការសង្ស័យចំពោះការស្លាប់នេះថា «បណ្ដាលមកពីករណីពុលស្រា»។ នេះបើតាមលោក ខៀវ រិទ្ធិភ័ណ្ឌ អភិបាលស្រុកឈូក។
លោកបានថ្លែងថា៖ «ពេលនេះ សមត្ថកិច្ចជំនាញបានចុះប្រមូលសំណាកស្រាស និងស្រាថ្នាំពីក្នុងភូមិកើតហេតុចំនួន ១១ សំណាកទៅពិសោធ ដើម្បីស្វែងរកការពិត។ ជាមួយគ្នានេះ អ្នកភូមិ ១១ នាក់ដែលជាអ្នកលក់ស្រាស និងស្រាថ្នាំត្រូវបានសមត្ថកិច្ចនគរបាលហៅទៅសួរនាំនៅស្នងការដ្ឋាននគរបាលខេត្តកំពត»។
ជុំវិញករណីនេះ លោក លក ញ៉ាវ ស្នងការរងទទួលបន្ទុកផ្នែកព្រហ្មទណ្ឌខេត្តកំពតបានប្រាប់ ភ្នំពេញ ប៉ុស្តិ៍ ពីម្សិលមិញថា ក្នុងចំណោមអ្នកលក់ស្រា ១១ នាក់នោះ គឺមាន ២ នាក់ត្រូវបានមន្ត្រីនគរបាលកសាងសំណុំរឿងបញ្ជូនទៅតុលាការ បន្ទាប់ពីពួកគាត់សារភាពថាបានស្រាខ្លាំងគ្មានប្រភពច្បាស់លាស់មកផលិតជាស្រាថ្នាំ។ ចំណែក ៩ នាក់ទៀតត្រូវបានអនុញ្ញាតឱ្យត្រឡប់ទៅផ្ទះវិញ បន្ទាប់ពីអប់រំ និងឱ្យធ្វើកិច្ចសន្យាបញ្ឈប់ការទិញ លក់ ស្រាស និងស្រាថ្នាំ តទៅទៀត។
លោក ញ៉ាវ បានបញ្ជាក់ថា៖ «នៅពេលនេះ ក្រុមការងារយើងកំពុងរៀបចំនីតិវិធីដើម្បីកោះអញ្ជើញម្ចាស់ទីតាំងផលិតស្រាស នៅក្នុងភូមិដូនយ៉យ ២ នាក់ទៀតឱ្យចូលបំភ្លឺជុំវិញការលួចបិតស្រា»។
ទោះយ៉ាងណាលោក ញ៉ាវ មិនបានបញ្ជាក់ពីអត្តសញ្ញាណម្ចាស់ទីតាំងផលិតស្រាខុសច្បាប់ទាំង ២ នាក់នោះទេ ដោយគ្រាន់តែថា ក្រុមមន្ត្រីជំនាញនៃសាខា ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប) ខេត្តកំពត កំពុងប្រមូលភ័ស្ដុតាងបន្ថែម ដើម្បីដាក់បន្ទុកពួកគេហើយ។
ក៏ប៉ុន្តែ លោក សុទ្ធ ណារឿន ប្រធានសាខា (កបប) ខេត្តកំពតបានប្រាប់ភ្នំពេញប៉ុស្តិ៍ថា ម្ចាស់ទីតាំងផលិតស្រាសនោះរួមមានឈ្មោះ ស៊ាង ថី អាយុ ៣០ ឆ្នាំ និងម្នាក់ទៀត ឈ្មោះ ណាក់ វិចិត្រ អាយុ ២៧ ឆ្នាំ។
លោកថា៖ «នៅពេលនេះពួកគេទាំង ២ នាក់ បានរត់គេចខ្លួនអស់ទៅហើយ។ ប៉ុន្តែទីតាំងដែលពួកគេផលិតនោះ មានលក្ខណៈមិនត្រឹមត្រូវតាមស្តង់ដាបច្ចេកទេស និងខ្វះអនាម័យ ហើយគ្មានការអនុញ្ញាត»។
លោក ណារឿន បានបន្តថា៖ «យើងបានរកឃើញល្បាយស្រាជាច្រើននៅក្នុងទីតាំងរបស់ពួកគេ ហើយបានរឹបអូសជាបណ្ដោះអាសន្ន ដើម្បីនាំយកសំណាកទៅកាន់មន្ទីរពិសោធន៍ក្នុងរាជធានីភ្នំពេញ»។
បើតាមលោក ណារឿន ក្រោយមានករណីសង្ស័យពុលស្រាតាំងពីថ្ងៃទី ២៦ ខែកក្កដាមក ក្រុមការងារលោកបានចុះស្រាវជ្រាវ និងប្រមូលសំណាកស្រាស និងស្រាថ្នាំ បញ្ជូនទៅមន្ទីរពិសោធន៍របស់អគ្គនាយកដ្ឋាន ក.ប.ប នៅភ្នំពេញ កាលពីយប់ថ្ងៃទី ២៧ ខែកក្កដា។
លោកបានបន្ថែមថា៖ «មកទល់ពេលនេះ យើងនៅមិនទាន់ទទួលបានលទ្ធផលនៃការធ្វើតេស្តលើសំណាក និងល្បាយស្រាទាំងនោះពីមន្ទីរពិសោធន៍វិញទេ ខណៈអ្នកភូមិ ៣ នាក់ទៀតក្នុងចំណោមអ្នកភូមិ ១៤ នាក់ ដែលសង្ស័យពុលស្រា ដោយសារបានចូលរួមផឹកស្រាក្នុងពិធីបុណ្យសពកាលពីថ្ងៃទី ២៥ ខែកក្កដានោះកំពុងសម្រាកព្យាបាលនៅមន្ទីរពេទ្យបង្អែកស្រុកឈូកនៅឡើយ »។
នេះមិនមែនជាករណីសង្ស័យពុលស្រាលើកទី ១ នៅខេត្តកំពតនោះទេ។ ក៏ប៉ុន្តែកាលពីខែឧសភាក៏មានករណីពុលស្រានៅស្រុកកំពង់ត្រាច ស្លាប់មនុស្ស ៩ នាក់ និងជាង ៤០ នាក់ទៀតធ្លាក់ខ្លួនឈឺផងដែរ។ កាលនោះមានអ្នកផលិតស្រា ២ នាក់ត្រូវបានចាប់ខ្លួន ហើយម្នាក់ក្នុងចំណោមនោះត្រូវបានតុលាការសម្រេចឃុំខ្លួនជាបណ្ដោះអាសន្ន។ រីឯនៅថ្ងៃ ៤ កក្កដា ថ្មីៗនេះមានមនុស្ស ៤ នាក់ទៀតស្លាប់ ៣០ នាក់ធ្លាក់ខ្លួនឈឺ ប៉ុន្តែអ្នកផលិតបានរត់គេចខ្លួន ដោយសមត្ថកិច្ចកំពុងតាមចាប់។
ទន្ទឹមនឹងនេះ រដ្ឋបាលខេត្តកំពតបានចេញបម្រាមហាមទិញលក់ និងផលិតស្រាស និងស្រាថ្នាំ ដែលពុំមានការអនុញ្ញាតនៅទូទាំងខេត្ត ដើម្បីកុំឱ្យបន្តគ្រោះថ្នាក់ដល់អ្នកទិញផឹក៕
វីដេអូ៖
