.jpg)
លោក អ៊ិត សំហេង និងក្រុមមន្ត្រីក្នុងកិច្ចប្រជុំពីថ្ងៃ ២៧ កក្កដា។ រូប ក្រសួងការងារ
ភ្នំពេញៈ គណៈកម្មការជំនាញរដ្ឋសភាបានឯកភាពសម្រេចបញ្ជូនសេចក្តីព្រាងច្បាប់ ស្តីពីវិសោធនកម្មលើមាត្រាចំនួន ៨ នៃច្បាប់ស្តីពីការងារទៅគណៈកម្មាធិការអចិន្រៃ្តយ៍រដ្ឋសភា ដើម្បីពិនិត្យដាក់បញ្ចូលក្នុងរបៀបវារៈសម័យប្រជុំរដ្ឋសភានាពេលខាងមុខ បន្ទាប់ពីបានស្តាប់ការបកស្រាយច្បាប់ពីរដ្ឋមន្ត្រីក្រសួងការងារ។
កាលពីថ្ងៃទី ២៧ ខែកក្កដា លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានដឹកនាំសហការីចូលរួមកិច្ចប្រជុំតាមប្រព័ន្ធអនឡាញ (ZOOM) ជាមួយគណៈកម្មការសុខាភិបាល សង្គមកិច្ចអតីតយុទ្ធជនយុវនីតិសម្បទា ការងារ និងបណ្តុះបណ្តាលវិជ្ជាជីវៈ និងកិច្ចការនារីនៃរដ្ឋសភា ដើម្បីការពារសេចក្តីព្រាងច្បាប់ នេះ។
តាមទំព័រហ្វេសប៊ុករបស់ក្រសួងការងារ ការធ្វើវិសោធនកម្មច្បាប់នេះ គឺធ្វើលើមាត្រា ១២៣ មាត្រា ១៣៨ មាត្រា ១៦២ មាត្រា ៣០០ មាត្រា ៣៤៣ មាត្រា ៣៥០ មាត្រា ៣៦៣ និងមាត្រា ៣៦៧ បន្ទាប់ពីច្បាប់ស្តីពីការងារត្រូវបានធ្វើវិសោធនកម្មចំនួន ២ លើករួចមកហើយ ដែលក្នុងនោះនៅឆ្នាំ ២០០៧ វិសោធនកម្មពាក់ព័ន្ធនឹងអត្រាប្រាក់ឈ្នួលបន្ថែមម៉ោង និងការងារពេលយប់ និងឆ្នាំ ២០១៨ វិសោធនកម្មពាក់ព័ន្ធនឹងប្រាក់បំណាច់អតីតភាពការងារ។
លោក អ៊ិត សំហេង រដ្ឋមន្ត្រីក្រសួងការងារបានលើកឡើថា ការធ្វើវិសោធនកម្មលើសេចក្តីព្រាងច្បាប់ស្ដីពីការងារនាពេលនេះ គឺផ្ដើចេញពីកំណែទម្រង់ស៊ីជម្រៅរបស់រាជរដ្ឋាភិបាលក្នុងការកែទម្រង់សេដ្ឋកិច្ច សង្គមក្នុងបរិបទថ្មីនៃសកលភាវូបនីយកម្ម គឺបដិវត្តន៍បច្ចេកវិទ្យាមានការរីកចម្រើនយ៉ាងឆាប់រហ័ស ដែលឈានដល់ចំណុច ៤។
លោកបន្តថា ការរីកចម្រើននេះ គឺតម្រូវឱ្យមានធនធានមនុស្ស និងលក្ខខណ្ឌការងារដែលអាចមានការប្រកួតប្រជែងមួយ ដើម្បីទាក់ទាញការវិនិយោគពីខាងក្រៅ។
លោកបន្ថែមថា៖ «ម្យ៉ាងទៀតផ្អែកទៅលើបរិបទនៃសេដ្ឋកិច្ចសង្គមដែលមានភាពប្រកួតប្រជែងក្នុងការទាក់ទាញវិនិយោគកំពុងមានភាពស្រួចស្រាល់នេះ គឺយើងត្រូវពិនិត្យមើលពីលក្ខខណ្ឌការងាររបស់ប្រទេសយើង ដែលខ្ពស់ជាងគេ ការឈប់ប្រចាំឆ្នាំច្រើន និងប្រាក់ឈ្នួលយើងខ្ពស់ជាងប្រទេសមួយចំនួននៅក្នុងតំបន់អាស៊ាន មិនត្រឹមតែប៉ុណ្ណោះ ប្រទេសជិតខាងខ្លះមានកម្លាំងពលកម្មច្រើនជាងប្រទេសយើងទៀតផង»។
តាមគេហទំព័ររបស់រដ្ឋសភាបានឱ្យដឹងថា បន្ទាប់ពីស្តាប់ ការថ្លែងការពារសេចក្តីព្រាងច្បាប់នូវចំណុចដែលធ្វើវិសោធនកម្មនេះ គណៈកម្មាធិការជំនាញរដ្ឋសភាបានឯកភាពសម្រេចបញ្ជូនសេចក្តីព្រាងច្បាប់ ស្តីពីវិសោធនកម្មនៃច្បាប់ស្តីពីការងារនេះទៅគណៈកម្មាធិការអចិន្រៃ្តយ៍រដ្ឋសភាវិញ ដើម្បីពិនិត្យដាក់បញ្ចូលក្នុងរបៀបវារៈសម័យប្រជុំរដ្ឋសភានាពេលខាងមុខ។
លោកស្រី ឡោក ខេង ប្រធានគណៈកម្មការដែលបានដឹកនាំពិនិត្យលើខ្លឹមសារវិសោធនកម្មសេចក្តីព្រាងច្បាប់នេះថ្លែងថា បន្ទាប់ពីគណៈកម្មាធិការអចិន្រៃ្តយ៍នៃរដ្ឋសភាប្រគល់ភារកិច្ចជូនគណៈកម្មការក្នុងការពិនិត្យលើសេចក្តីព្រាងវិសោធនកម្ម មាត្រាមួយចំនួននៃច្បាប់ស្ដីពីការងារ គណៈកម្មការបានធ្វើការប្រជុំផ្ទៃក្នុងដើម្បីពិនិត្យលើសេចក្តីព្រាងច្បាប់ដែលត្រូវធ្វើវិសោធនកម្មទាំង ៨ មាត្រា និងពិនិត្យលើសេចក្តីថ្លែងហេតុផងដែរ។
លោកស្រី បញ្ជាក់ថា៖ «ច្បាប់ស្តីពីការងារនេះ គឺជាក្របខ័ណ្ឌគតិយុត្តមួយដ៏សំខាន់ក្នុងការលើកកម្ពស់សិទ្ធិការងារ និងភាពសុខដុមរមនាក្នុងទំនាក់ទំនងវិជ្ជាជីវៈ ស្របពេលដែលព្រះរាជាណាចក្រកម្ពុជា បាននិងកំពុងខិតខំអភិវឌ្ឍវិស័យការងារ ដោយផ្សារភ្ជាប់ជាមួយពាណិជ្ជកម្មជាតិ អន្តរជាតិ តាមរយៈភាពរីកចម្រើននៃការវិនិយោគលើវិស័យឯកជន ជាពិសេសវិស័យឧស្សាហកម្ម កាត់ដេរសម្លៀកបំពាក់ និងការផលិតស្បែកជើង»៕
