ភ្នំពេញៈ រដ្ឋបាលរាជធានីភ្នំពេញ បានចេញនូវតារាងប្រាប់ទីតាំងសម្រាប់ចាក់វ៉ាក់សាំងដល់ក្រុមមនុស្សអាយុចាប់ពី ១២ ដល់ ១៧ ឆ្នាំ ក្នុងខណ្ឌទាំង ១៤ ខណៈ ដែលអភិបាលរាជធានី លោក ឃួង ស្រេង បានព្រមានចាត់វិធានការអ្នកដែលចែកបណ្ណចាក់វ៉ាក់សាំង ជាថ្នូរនៃការយកលុយ។
លោក ឃួង ស្រេង ធ្វើការ ព្រមានដូចនេះនៅក្នុងកិច្ចប្រជុំតាមរយៈ video conference ជាមួយអាជ្ញាធរខណ្ឌទាំង ១៤ នៅសាលារាជធានីនាព្រឹកថ្ងៃទី ២៨ ខែកក្កដា ពិភាក្សាលើការត្រៀមបើកយុទ្ធនាការចាក់វាក់សាំងកូវីដ ១៩ ដល់ក្រុមមនុស្សអាយុចាប់ពី ១២ ដល់ ១៧ ឆ្នាំ។
លោក ឃួង ស្រេង បានលើកឡើងទៀតថា ការចាក់វ៉ាក់សាំងនេះ អាជ្ញាធរដែនដីត្រូវតែរៀបចំ និងធ្វើឡើងឱ្យបានម៉ត់ចត់បំផុត ដើម្បីឱ្យដំណើរការនៃការចាក់វ៉ាក់សាំងនេះទទួលបានជោគជ័យ និងទទួលបានការគាំទ្រយ៉ាងពេញទំហឹងពីប្រជាពលរដ្ឋ។
លោកបញ្ជាក់ថា ៖ «អ្វីដែលសំខាន់ គឺដាច់ខាតមិនឱ្យមាននរណាម្នាក់យកលុយជាថ្នូរនៃការចេញបណ្ណចាក់សាំងនោះទេ។ បើមានសកម្មភាពបែបនេះ យើងនឹងមិនយោគយល់ជាដាច់ខាត។ ខ្ញុំក៏សុំឱ្យអាជ្ញាធរខណ្ឌ-សង្កាត់ត្រូវតែយកចិត្តទុកដាក់ ឱ្យបានហ្មត់ចត់បំផុតចំពោះការ-ងារនេះ គឺមិនអនុញ្ញាតជា-ដាច់ខាតចំពោះការចេញបណ្ណជាថ្នូរនៃការយកប្រាក់ដាច់ខាត។ អាជ្ញាធរខណ្ឌ-សង្កាត់ត្រូវតែទទួលខុសត្រូវដោយខ្លួនឯង»។
ទន្ទឹមនឹងនេះដែរ រដ្ឋបាលរាជធានីភ្នំពេញក៏បានបង្ហាញនូវតារាងពីទីតាំងនៃការចាក់វ៉ាក់សាំងសម្រាប់អ្នកអាយុពី ១២ ដល់ក្រោម ១៨ ឆ្នាំ ដែលសម្រាប់ដូសទី ១នឹ ងចាប់ផ្តើមពីថ្ងៃទី ១ ដល់ទី ១៤ ខែសីហា និងដូសទី ២ ចាប់ពីថ្ងៃទី ២២ ខែសីហា ដល់ថ្ងៃទី ៥ ខែកញ្ញា ឆ្នាំ ២០២១។
រដ្ឋបាលរាជធានីភ្នំពេញបានឱ្យដឹងថា ប្រជាពលរដ្ឋដែលរស់នៅក្នុងខណ្ឌ ៧ មករា ត្រូវចាក់នៅមន្ទីរពេទ្យបង្អែករាជធានីភ្នំពេញ, ខណ្ឌដូនពេញត្រូវចាក់នៅមន្ទីរពេទ្យបង្អែកចតុមុខ, ខណ្ឌទួលគោក ចាក់នៅមណ្ឌលសុខភាពទួលគោក, ខណ្ឌបឹងកេងកង ចាក់នៅមណ្ឌលសុខភាពទួលស្វាយព្រៃ, ខណ្ឌចំការមន ចាក់នៅមណ្ឌលសុខភាពផ្សារដើមថ្កូវ, ខណ្ឌឫស្សីកែវ ចាក់នៅមន្ទីរពេទ្យបង្អែកសម្តេច-ឪ-សម្តេចម៉ែ និងមណ្ឌលសុខភាពគីឡូម៉ែត្រលេខ ៦។
សម្រាប់ខណ្ឌជ្រោយចង្វារចាក់នៅមណ្ឌលសុខភាពជ្រោយចង្វារ និងមណ្ឌលសុខភាពកោះដាច់, ខណ្ឌពោធិ៍សែនជ័យ ចាក់នៅមណ្ឌលសុខភាពសំរោងក្រោម មណ្ឌលសុខភាពសាមគ្គី និងមន្ទីរពេទ្យបង្អែកពោធិ៍ចិន-តុង, ខណ្ឌកំបូល ចាក់នៅមណ្ឌលសុខភាពស្នោ មណ្ឌលសុខភាពឪឡោក មណ្ឌលសុខភាពប្រទះឡាង មណ្ឌលសុខភាពបឹងធំ និងមណ្ឌលសុខភាពកំបូល។ ចំណែកខណ្ឌច្បារអំពៅ ចាក់នៅមន្ទីរពេទ្យបង្អែកច្បារអំពៅ មណ្ឌលសុខភាពនិរោធ មណ្ឌលសុខភាពព្រែកឯង មណ្ឌលសុខភាពក្បាលកោះ និងមណ្ឌលសុខភាពព្រែកថ្មី។
សម្រាប់ខណ្ឌមានជ័យ ចាក់នៅមណ្ឌលសុខភាពស្ទឹងមានជ័យ, ខណ្ឌសែនសុខ ចាក់នៅមន្ទីរពេទ្យបង្អែកមិត្តភាពកម្ពុជា-ចិនសែនសុខ មណ្ឌលសុខភាពឃ្មួញ មណ្ឌលសុខភាពក្រាំងធ្នង់ មណ្ឌលសុខភាពភ្នំពេញថ្មី និងមណ្ឌលសុខភាពទឹកថ្លា។
រីឯនៅខណ្ឌដង្កោវិញចាក់នៅមន្ទីរពេទ្យបង្អែកដង្កោ មណ្ឌលសុខភាពជើងឯក មណ្ឌលសុខភាពសាក់សំពៅ មណ្ឌលសុខភាពព្រែកកំពឹស មណ្ឌលសុខភាពរលួស មណ្ឌលសុខភាពពងទឹក មណ្ឌលសុខភាពព្រៃស មណ្ឌលសុខភាពព្រៃវែង។ ខណ្ឌព្រែកព្នៅ ត្រូវចាក់នៅមន្ទីរពេទ្យបង្អែកព្រែកព្នៅ មណ្ឌលសុខភាពសំរោង មណ្ឌលសុខភាពពញាពន់ មណ្ឌលសុខភាពពន្សាំង និងមណ្ឌលសុខភាពគោករកា។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសបានថ្លែងកាលពីថ្ងៃទី ២៨ ខែកក្កដាថា ការសម្រេចឱ្យមានការចាក់វ៉ាក់សាំងដល់ក្រុមមនុស្សអាយុពី ១២ ដល់ ១៧ ឆ្នាំ ពីសំណាក់លោកនាយករដ្ឋមន្ត្រី ហ៊ុន សែន នេះ មិនមែនជាការសម្រេចដោយមិនមានការគិតពិចារណានោះឡើយ។
លោកស្រីថ្លែងថា៖ «ការប្រើប្រាស់វ៉ាក់សាំងស៊ីណូវ៉ាក់ សម្រាប់ចាក់ដល់ក្រុមអាយុពី ១២ ដល់ ១៧ ឆ្នាំនេះគឺជាប្រភេទវ៉ាក់សាំងដែលបានប្រើប្រាស់រួចហើយ នៅសាធារណរដ្ឋប្រជាមានិតចិន ហើយដែលយើងសង្កេតឃើញថា វាមិនមានបង្កជាបញ្ហាអ្វីដល់ក្រុមដែលបានចាក់វ៉ាក់សាំងនេះរួចហើយនោះទេ»។
លោកស្រី ឱ វណ្ណឌីន បន្ថែមថា តាមការសិក្សា និងសង្កេតរបស់ក្រសួងសុខាភិបាល វ៉ាក់សាំងស៊ីណូវ៉ាក់នេះជាប្រភេទវ៉ាក់សាំង ដែលមានការចាត់ចែងរៀបចំឡើងដោយការផលិតតាមបែបបុរាណដែលមានការផលិតដូចទៅនឹងការផលិតវ៉ាក់សាំងដទៃទៀតដូចជា វ៉ាក់សាំងស្អូច កញ្ជ្រិល តេតាណូស ជាដើម ដែលក្រសួងកំពុងប្រើប្រាស់សម្រាប់កុមារអាយុ ៥ ឆ្នាំចុះ។
គិតត្រឹមយប់ថ្ងៃទី ២៧ ខែកក្កដា កម្ពុជាបានចាក់វ៉ាក់សាំងទៅដល់ប្រជាពលរដ្ឋអាយុចាប់ពី ១៨ ឆ្នាំឡើងបានចំនួនជាង ៦,៩ លាននាក់ហើយ ឬស្មើនឹង ៦៩,៤១ %ធៀបនឹងប្រជាពលរដ្ឋដែលត្រូវចាក់ ១០ លាននាក់៕