ស្វាយរៀង/ព្រៃវែងៈ ប្រជាកសិករនៅតាមបណ្ដាខេត្តជាប់ព្រំដែនប្រទេសវៀតណាម បានត្អូញត្អែរអំពីការធ្លាក់ចុះតម្លៃស្រូវ នៅក្នុងទីផ្សារក្នុងស្រុក ខណៈពួកគាត់មិនអាចដឹកស្រូវយកទៅលក់នៅក្នុងប្រទេសវៀតណាម បានដូចកាលពីមុន ព្រោះច្រកព្រំដែនរវាងប្រទេសទាំង ២ ត្រូវបានបិទជាបណ្ដោះអាសន្ន ដើម្បីបង្ការទប់ស្កាត់ការឆ្លងរាលដាលជំងឺកូវីដ ១៩។
ប្រជាកសិករនៅឃុំបន្ទាយក្រាំងនៃស្រុកកំពង់រោទិ៍ ខេត្តស្វាយរៀង លោក អាត់ សុផល បានប្រាប់ ភ្នំពេញ ប៉ុស្តិ៍ថា នៅពេលនេះក្រុមឈ្មួញកណ្ដាលនៅក្នុងស្រុកបានទម្លាក់តម្លៃស្រូវពី ៩០០ រៀលមកនៅត្រឹម ៦៥០ រៀលប៉ុណ្ណោះក្នុង ១ គីឡូក្រាម។ តម្លៃនេះបានធ្វើឱ្យគ្រួសាររបស់លោកមានការខាតបង់ប្រាក់ចំណូលរាប់លានរៀល បើធៀបទៅនឹងតម្លៃទីផ្សារស្រូវនៅក្នុងប្រទេសវៀតណាម ដែលលោកធ្លាប់បានដឹកទៅលក់នាពេលកន្លងមក។
លោក សុផល បានថ្លែងថា៖ «យើងគ្មានជម្រើសនោះទេ ព្រោះយើងមិនអាចដឹកស្រូវយកទៅលក់នៅក្នុងប្រទេសវៀតណាមដូចកាលពីមុនទៀតបាន ហើយយើងក៏ត្រូវការលុយមកទូទាត់ថ្លៃដើម ដែលយើងបានបុលគេយកមកធ្វើស្រូវ និងដោះស្រាយជីវភាពប្រចាំថ្ងៃផងដែរ»។
បើតាមលោក សុផល ប្រជាកសិករនៅក្នុងស្រុកកំពង់រោទិ៍ ភាគច្រើនបាននាំគ្នាដឹកជញ្ជូនស្រូវ ដែលពួកគេផលិតបានយកទៅលក់នៅក្នុងទីផ្សារប្រទេសវៀតណាម តាមច្រកអន្តរជាតិព្រៃវល្លិ៍ ដែលអាចបានតម្លៃពី ៩០០ រៀលទៅ ១ ០៥០ រៀលក្នុង ១ គីឡូក្រាម។
ប៉ុន្តែដោយសារថ្មីៗនេះ នៅប្រទេសវៀតណាមមានបញ្ហាផ្ទុះឆ្លងជំងឺកូវីដ ១៩ ច្រើនខ្លាំងពេក អាជ្ញាធរកម្ពុជា ក៏ដូចជាអាជ្ញាធរប្រទេសវៀតណាមបានឯកភាព បិទច្រកព្រំដែននៃប្រទេសទាំង ២ ជាបណ្ដោះអាសន្ន ដើម្បីទប់ស្កាត់ការឆ្លងរាលដាលកាន់តែខ្លាំងឡើងនៃជំងឺដ៏កាចសាហាវនេះ។
ចំណែក លោក ថន មឿន ដែលជាមន្ត្រីនគរបាលនៅឃុំជ្រៃ ស្រុកស្វាយអន្ទរ ខេត្តព្រៃវែង ក៏បានលើកឡើងអំពីករណីស្រដៀងគ្នានេះផងដែរថា ក្រុមឈ្មួញកណ្ដាលបានឆក់យកឱកាសនេះ មកទម្លាក់ថ្លៃស្រូវរបស់កសិករនៅតាមបណ្ដោយព្រំដែនកម្ពុជា-វៀតណាម ដោយយកលេសថា ពួកគេមានការចំណាយច្រើនទៅលើថ្លៃកម្មករ ថ្លៃសម្ងួតស្រូវ និងថ្លៃដឹកជញ្ជូន និងថ្លៃចំណាយទៅលើសេវាផ្សេងៗទៀត។
លោក មឿន ដែលមានផ្ទៃដីរហូតដល់ ៧ ហិកតា សម្រាប់ធ្វើស្រូវនោះបានប្រាប់ភ្នំពេញប៉ុស្តិ៍ទៀតថា លោកបានចំណាយថ្លៃដើមទៅលើការផលិតស្រូវផ្ការំដួលក្នុង ១ ហិកតា អស់ចន្លោះពី ១,៥ លាន ទៅ ២ លានរៀល សម្រាប់តែការទិញជី និងថ្នាំកសិកម្ម ព្រមទាំងថ្លៃភ្ជួររាស់ដី សាំងបូមទឹកបញ្ចូលស្រែ ច្រូតកាត់ និងថ្លៃដឹកជញ្ជូន។ តែផលស្រូវដែលប្រមូលបាន ពី ៤-៥ តោន ក្នុង ១ ហិកតា។
លោកបញ្ជាក់ថា៖ «ឥឡូវនេះក្រុមឈ្មួញកណ្ដាលនៅក្នុងស្រុកហ៊ានឱ្យតម្លៃត្រឹមតែ ៨០០ រៀលប៉ុណ្ណោះសម្រាប់ប្រភេទស្រូវផ្ការំដួល ដែលពីមុនច្រកព្រំដែនមិនទាន់បិទឈ្មួញពីប្រទេសវៀតណាមចូលមកប្រមូលទិញដល់ក្នុងភូមិ គេហ៊ានឱ្យថ្លៃដល់ ១ ១៥០ រៀលក្នុង ១ គីឡូក្រាម។ ដូច្នេះយើងខាតបង់ផលចំណេញរហូតដល់ ១,៤ លានរៀលក្នុង ១ ហិកតា»។
ច្រកទ្វារព្រំដែនទាំងអស់រវាងកម្ពុជា-វៀតណាម ត្រូវបានប្រកាសបិទជាបណ្ដោះអាសន្នក្នុងរយៈពេល ១ ខែ ដោយចាប់ផ្ដើមអនុវត្តន៍ពីថ្ងៃទី ១៥ ខែកក្កដា ដល់ថ្ងៃទី ១៥ ខែសីហា ឆ្នាំ ២០២១ ដើម្បីទប់ស្កាត់ការឆ្លងរាលដាលនៃជំងឺកូវីដ១។ សម្រាប់ខេត្តព្រៃវែង ច្រកព្រំដែនអន្តរជាតិបន្ទាយចក្រី និងច្រកអន្តរជាតិកោះរការ ព្រមទាំងច្រកតំបន់មួយចំនួនទៀត ដែលរួមមានច្រកកោះសំពៅ ច្រកពាមអន្ទា និងច្រកបាទីត្រូវបានបិទ។
ជុំវិញករណីនេះ លោក អ៊ុក សំណាង ប្រធានមន្ទីរកសិកម្មខេត្តព្រៃវែងបានប្រាប់ ភ្នំពេញ ប៉ុស្តិ៍ថា លោកគ្មានរំពឹងថា ច្រកព្រំដែនរវាងកម្ពុជា និងវៀតណាមអាចនឹងចាប់ផ្ដើមបើកឡើងវិញ តាមកាលកំណត់នាពេលឆាប់ៗនោះទេ ខណៈស្ថានភាពជំងឺកូវីដ ១៩ និង ជំងឺកូវីដបំប្លែងខ្លួនប្រភេទថ្មី Delta កំពុងបន្តការឆ្លងរាលដាលកាន់តែធ្ងន់ធ្ងរឡើង។
លោកបន្តថា៖ «នៅពេលនេះ យើងកំពុងរង់ចាំតាមដាននូវស្ថានភាពនៃជំងឺកូវីដ ១៩ បើខាងវៀតណាមមានការថយចុះនៃចំនួនអ្នកឆ្លងថ្មីនោះ ច្រកទ្វារព្រំដែនអាចនឹងបើកដំណើរការឡើងវិញ ប៉ុន្តែបើនៅតែបន្តកើនឡើង វាអាចនឹងពន្យារពេលយូរជាងនេះ។ ទោះយ៉ាងណាខាងមន្ទីរកសិកម្មយើងកំពុងរិះរកមធ្យោបាយ ដើម្បីរក្សាតម្លៃស្រូវកុំឱ្យធ្លាក់ថ្លៃជាងនេះ គឺរក្សាឱ្យនៅត្រឹម ៧៥០ រៀលក្នុង ១ គីឡូក្រាម»។
បើតាមលោក សំណាង តម្លៃស្រូវនាពេលបច្ចុប្បន្ន សម្រាប់ខេត្តព្រៃវែង ជាមធ្យមបានធ្លាក់មកនៅក្នុងតម្លៃពី ៦៥០ រៀល ទៅ ៧៥០ រៀលក្នុង ១ គីឡូក្រាម ដែលជាតម្លៃនៃការប្រមូលទិញរបស់ឈ្មួញកណ្ដាល។ ប៉ុន្តែនៅតំបន់ខ្លះ មានការប្រមូលទិញក្នុងតម្លៃខ្ពស់ជាងនេះ៕
វីដេអូ៖