ខេត្តកំពតៈ ទីលានចាក់សំរាមសម្រាប់ក្រុងកំពតកំពុងដំណើរការស្ថាបនានៅក្នុងឃុំថ្មី ស្រុកទឹកឈូ លើផ្ទៃដីជាង ១០ ហិកតា ដែលការសាងសង់ធ្វើឡើងដោយក្រុមហ៊ុន ហេង សម្បត្តិ អាហរ័ណនីហរ័ណ ដឹកជញ្ជូន និងសំណង់ ដោយត្រូវប្រើពេល ១ ឆ្នាំ គិតចាប់ពីថ្ងៃទី ៩ កក្កដា ឆ្នាំនេះតទៅ។
លោក ឈុន ប៊ុណ្ណារិន អនុប្រធានគម្រោងសាងសង់ទីលានចាក់សំរាមក្រុងកំពតថ្លែងកាលពីម្សិលមិញថា ទីលានចាក់សំរាមនេះត្រូវបានរាជរដ្ឋាភិបាលអនុញ្ញាតឱ្យសាងសង់តាមរយៈក្រសួងសាធារណការ និងដឹកជញ្ជូនក្រោមកម្ចីថវិការបស់ធនាគារអភិវឌ្ឍន៍អាស៊ី (ADB) ប្រមាណ ២ លានដុល្លារ ដែលទទួលការសាងសង់ដោយក្រុមហ៊ុន ហេង សម្បត្តិ អាហរ័ណនីហរ័ណ ដឹកជញ្ជូន និងសំណង់ រយៈពេល ១ ឆ្នាំលើផ្ទៃដីជាង ១០ ហិកតា។
លោក ប៊ុណ្ណារិន បន្តថា គម្រោងនេះបានចាប់អនុវត្តតាំងពីថ្ងៃទី ៩ ខែកក្កដា ឆ្នាំ ២០២១ ដោយផ្ដោតលើហេដ្ឋារចនាសម្ព័ន្ធរួមមាន៖ ទីលានចាក់សំរាម ២ ថតចំនួន ២ ស្រះទឹកសម្អាតទឹកកខ្វក់ចេញពីសំរាមចំនួន ២ ទីលានត្រងទឹកកខ្វក់ និងរំហួត អគាររដ្ឋបាល ប៉ុស្តិ៍យាម អណ្ដូងទឹក សម្រាប់ត្រួតពិនិត្យគុណភាពទឹក និងជួសជុលផ្លូវចូលទីលានកប់សំរាម។
លោកថ្លែងថា៖ «ក្នុងហ្នឹងយើងក៏មានកន្លែងថ្លឹងរថយន្ត កន្លែងស្តុក និងញែកសំរាមធ្វើរបងព័ទ្ធជុំវិញទីលានចាក់សំរាម ដែលបច្ចុប្បន្ននេះការអនុវត្តគម្រោងសាងសង់នេះបានប្រមាណជាង ១៦ ភាគរយហើយ»។
បើតាម លោក ប៊ុណ្ណារិន ទីលានចាក់សំរាមនេះថ្មីនេះធ្វើឡើងសម្រាប់ចាក់សំរាមឱ្យពេញក្នុងរយៈពេល ២០ ឆ្នាំ ប្រកបដោយស្តង់ដាមិនមានផលប៉ះពាល់ដល់បរិស្ថាន ហើយទៅថ្ងៃអនាគតអាចនឹងរៀបចំជាទីរមនាមួយផងដែរ។
លោកថ្លែងថា «ខេត្តកំពតអត់ធ្លាប់មានទីលានចាក់សំរាមស្តង់ដាទេ មានទីតាំងចាស់សម្រាប់ចាក់ ប៉ុន្តែចាក់ហើយចោលស្អុយពេញហ្នឹងឯង។ ឥឡូវយើងត្រូវធ្វើលក្ខណៈបច្ចេកទេសថ្មី គឺយើងធ្វើលុប ធ្វើលុបដើម្បីពូនវាជាភ្នំមួយយើងបង្ហាប់វាឱ្យណែន ហើយត្រងទឹកត្រងអីវាយកមកសម្លាប់មេរោគ ដល់ចុងក្រោយយើងដាំស្មៅពីលើមើលទៅដូចជាកន្លែងលេងកូនហ្គោលអ៊ីចឹង»។
លោក រិត វឌ្ឍនា នាយករដ្ឋបាលខេត្តកំពតថ្លែងពីម្សិលមិញថា អភិបាលខេត្តកំពតទើបតែបានចុះពិនិត្យដល់ទីតាំងនៃការដ្ឋានសាងសង់ទីលានចាក់សំរាមកាលពីថ្ងៃទី ២៧ កក្កដា។ លោកថា អភិបាលខេត្តបានណែនាំឱ្យជំនាញអាជ្ញាធរមូលដ្ឋានសហការជាមួយក្រុមហ៊ុនម៉ៅការឱ្យបានល្អ ដើម្បីឱ្យដំណើរការកសាងទីលានចាក់សំរាមនេះ បានលឿនឆាប់រហ័សទៅតាមគម្រោង សម្រាប់ឆ្លើយតបទៅនឹងតម្រូវការចាំបាច់របស់រដ្ឋបាលខេត្ត ក្នុងការលើកកម្ពស់អនាម័យបរិស្ថានក្នុងក្រុងកំពតឱ្យបានកាន់តែល្អប្រសើរឡើងថែមទៀត។
លោកថ្លែងថា៖ «ខេត្តយើង យើងយកតែសមិទ្ធផលទេ ហើយអ្វីដែលសំខាន់យើងចង់បានគឺភាពស្អាត ភាពល្អ គ្មានសំរាម ក្នុងក្រុងកំពត។ យើងខិតខំសម្របសម្រួលគ្រប់យ៉ាងទាំងអស់ ដើម្បីឱ្យដំណើរការគម្រោងហ្នឹងបានទទួលជោគជ័យ»៕