បន្ទាយមានជ័យៈ លោកស្រី ឌី សុជាតិ ស្នងការរងទទួលផែនការងារនគរបាលប្រឆាំងការជួញដូរមនុស្ស និងការពារអនីតិជនខេត្តបន្ទាយមានជ័យឱ្យដឹងនៅថ្ងៃទី ២៩ កក្កដាថាសមត្ថកិច្ចរបស់លោកស្រីគ្រោងបញ្ជូនជនសង្ស័យប្រុសស្រី ៦ នាក់ ទៅសាលាដំបូងខេត្តបន្ទាយមានជ័យនៅថ្ងៃទី ៣០ កក្កដា។ ពួកគេសង្ស័យថា មានជាប់ពាក់ព័ន្ធនឹងលួចនាំមនុស្សឆ្លងដែនចេញ-ចូលប្រទេសថៃ ខុសច្បាប់។
លោកស្រីថ្លែងថា៖ «អ្នកទាំង ៦ នាក់នោះ ខាងនគរបាលជំនាញយើងបានរៀបចំឯកសារហើយបញ្ជូនទៅថ្ងៃទី ២៩ កក្កដា តែបើមិនទាន់គឺបញ្ជូនទៅថ្ងៃទី ៣០ កក្កដា»។
បើតាមលោកស្រីថា ជនសង្ស័យទី១- ឈ្មោះ ចេង មួយហួង ភេទស្រី អាយុ ២៥ ឆ្នាំ, ទី២- ឈ្មោះ ចេង គឹមសែ ភេទប្រុស អាយុ ២៥ ឆ្នាំ, ទី៣- ឈ្មោះ ហៃ សុភ័ក្ត្រ ភេទប្រុស អាយុ ៣៥ ឆ្នាំ, ទី៤- ឈ្មោះ ហួត ដេវីត ភេទប្រុស អាយុ ១៩ ឆ្នាំ, ទី៥- ឈ្មោះ ហួត ហួរ ភេទស្រី អាយុ ៦០ ឆ្នាំ និងឈ្មោះ ភុក បញ្ញា ភេទប្រុស អាយុ ៤៣ ឆ្នាំ។ ពួកគេរស់នៅក្នុងក្រុងប៉ោយប៉ែតខេត្តបន្ទាយមានជ័យ។
ពាក់ព័ន្ធការឃាត់ខ្លួននេះដែរបើតាមរបាយការណ៍របស់សមត្ថកិច្ចបានបង្ហាញថា កាលពីថ្ងៃទី ២៨ កក្កដា ឆ្នាំ ២០២១ បានឱ្យដឹងថា ក្រុមជនរងគ្រោះត្រូវបានក្រុមមេខ្យល់ដឹកតាមរថយន្ត ១ គ្រឿងម៉ាកកាមរី ស្លាកលេខប្រទេសថៃ ចេញពីផ្សាររុងក្លឿចំនួន ១៣ នាក់ ក្នុងនោះមានអ្នកនាំផ្លូវ ២ នាក់ ជាជនជាតិថៃ។ មនុស្សដែលនៅក្នុងរថយន្ត ១១ នាក់ ត្រូវបានក្រុមមេខ្យល់យកលុយម្នាក់ៗចំនួន ៦ ពាន់បាត។
ចំពោះវត្ថុតាងដែលសមត្ថកិច្ចដកហូតបានពីមនុស្ស ៣ នាក់ ដែលចាំទទួលនៅព្រំដែនក្នុងទឹកដីក្រុងប៉ោយប៉ែតមានទូរស័ព្ទដៃ ២ គ្រឿង ក្នុងនោះមានសំឡេងឆ្លើយឆ្លងគ្នាតាមឡាញពាក់ព័ន្ធតម្លៃឈ្នួលនាំមនុស្សឆ្លងដែនផង៕