.jpg)
ទិដ្ឋភាពរលំផ្ទះដោយសារខ្យល់កន្ត្រាក់នៅកែបកាលពីថ្ងៃ ២៨ កក្កដា។ រូបថត ហ្វេសប៊ុក
កែបៈ ផ្ទះពលរដ្ឋនៅក្នុងសង្កាត់អូរក្រសារ ក្រុង-ខេត្តកែប សរុប ៨៦ ខ្នងបានរងផលប៉ះពាល់ និងខូចខាតយ៉ាងដំណំ ដោយសារខ្យល់កន្ត្រាក់បក់បោកក្នុងពេល ២ ថ្ងៃជាប់គ្នា។ នេះបើតាមមន្ត្រីនគរបាលមូលដ្ឋាននៅព្រឹកថ្ងៃទី ២៩ ខែកក្កដា ឆ្នាំ ២០២១។
លោក ឆាយ សុខា នាយនគរបាលប៉ុស្តិ៍សង្កាត់អូរក្រសារបានប្រាប់ ភ្នំពេញ ប៉ុស្តិ៍ថា ភ្លៀងលាយឡំខ្យល់កន្ត្រាក់ ២ ថ្ងៃកន្លងមកនេះបានបង្កការខូចខាតលំនៅឋានរបស់ប្រជាពលរដ្ឋចំនួន ៨៦ ខ្នងនៅក្នុងភូមិចំនួន ២ នៃសង្កាត់អូរក្រសារក្នុងនោះផ្ទះ ១៨ ខ្នងបានបាក់រលំខូចខាតទាំងស្រុង និង ៦៨ ទៀត ខូចខាតមធ្យមដោយប៉ើងរបើកដំបូល ប៉ុន្តែមិនបង្កគ្រោះថ្នាក់ដល់ពលរដ្ឋណាម្នាក់នោះទេ។
លោក សុខា បានបញ្ជាក់ថា៖ «កាលពីថ្ងៃទី ២៧ ខែកក្កដា មានករណីភ្លៀងលាយឡំខ្យល់កន្ត្រាក់បក់បោកប៉ះពាល់ផ្ទះពលរដ្ឋនៅភូមិអូរក្រសារ ១៦ ខ្នង។ នៅរសៀលថ្ងៃទី ២៨ ខែកក្កដា ក៏មានភ្លៀងខ្យល់បក់បោកបង្កការខូចខាតផ្ទះប្រជាពលរដ្ឋសរុប ៧០ ខ្នងថែមទៀតក្នុងនោះនៅភូមិដំណាក់ចំបក់ ១៨ ខ្នង និង ៥២ ខ្នងទៀតនៅភូមិអូរក្រសារ។ ប៉ុន្តែគ្មានពលរដ្ឋណាម្នាក់រងគ្រោះថ្នាក់នោះទេ»។
បើតាមលោក សុខា ករណីនេះលោក សោម ពិសិដ្ឋ អភិបាលខេត្តកែបបានដឹកនាំកម្លាំងចុះជួយអន្តរាគមន៍ជួសជុលផ្ទះជូនគ្រួសារពលរដ្ឋរងគ្រោះឡើងវិញ និងចែកអំណោយសង្គ្រោះបឋមក្នុង ១ គ្រួសារទទួលបានអង្ករ ២៥ គីឡូក្រាម ទឹកត្រី ១ យួរ ទឹកស៊ីអ៊ីវ ១ យួរ និងថវិកា ២ ម៉ឺនរៀល ដើម្បីដោះស្រាយជីវភាពប្រចាំថ្ងៃ ក្នុងគ្រាដ៏លំបាកនេះ។ ខ្យល់កន្ត្រាក់នេះបានបង្កផលប៉ះពាល់ទ្រព្យសម្បត្តិ ពិសេសផ្ទះសំបែងរបស់ប្រជាពលរដ្ឋក្នុងកម្រិតធ្ងន់ មធ្យម និងស្រាលចំនួន ៥២ គ្រួសារ នៅភូមិអូរក្រសារ សង្កាត់អូរក្រសារ ក្រុងកែប។
ដោយឡែកនៅឯខេត្តកោះកុងកាលពីព្រឹកម្សិលមិញមានសេចក្ដីរាយការណ៍ពីមន្ត្រីខេត្តនេះមកថា ភ្លៀងលាយឡំខ្យល់កន្ត្រាក់កំពុងបក់បោកក្នុងក្រុងខេមរភូមិន្ទ,ស្រុកមណ្ឌលសីមា,ស្រុកថ្មបាំង,ស្រុកបទុមសាគរ និងស្រុកស្រែអំបិលក្នុងកម្រិតពីតិចទៅខ្លាំង ប៉ុន្តែមិនទាន់ប៉ះពាល់លំនៅឋានពលរដ្ឋនៅឡើយទេ។
លោក សុខ សុទ្ធី អ្នកនាំពាក្យរដ្ឋបាលខេត្តកោះកុងបានប្រាប់ ភ្នំពេញ ប៉ុស្តិ៍ថា៖ «នៅពេលនេះ ខេត្តកោះកុងទាំងមូលកំពុងគ្របដណ្ដប់ដោយភ្លៀងលាយឡំខ្យល់បក់បោកខ្លាំង។ ទោះបីនៅពេលនេះមិនទាន់មានរបាយការណ៍ពីអាជ្ញាធរក្រុង-ស្រុក ស្ដីពីផលប៉ះពាល់លំនៅឋានពលរដ្ឋក៏ដោយ ក៏រដ្ឋបាលខេត្តយើងនៅតែបន្តអំពាវនាវដល់ប្រជាពលរដ្ឋបង្កើនការប្រុងប្រយ័ត្នអំពីបាតុភូតគ្រោះធម្មជាតិនេះ ពិសេសប្រជានេសាទគប្បីផ្អាកសកម្មភាពចេញទូកនេសាទជាបណ្ដោះអាសន្ន»។
យោងតាមការព្យាករអាកាសធាតុរបស់ក្រសួងធនធានទឹក និងឧតុនិយម ដែលបានចេញផ្សាយពីថ្ងៃទី ២៧ ខែ កក្កដា ឆ្នាំ ២០២១ បានឱ្យដឹងថាភ្លៀងលាយឡំខ្យល់កន្ត្រាក់បក់បោកខ្លាំងនឹងបន្តកើតមានរហូតដល់ថ្ងៃទី ៣ ខែសីហា ខាងមុខនេះ ជាពិសេសខេត្តនៅតាមតំបន់ឆ្នេរសមុទ្រ។
ជាមួយគ្នានេះ ក្រសួងក៏បានអំពាវនាវឱ្យពលរដ្ឋក្នុងតំបន់ឆ្នេរទាំងអស់ក៏ដូចអ្នកដើរកម្សាន្តតាមសមុទ្របង្កើនការប្រុងប្រយ័ត្នចំពោះអាកាសធាតុ និងរលកសមុទ្រដែលអាចកើតមានឡើងជាយថាហេតុ និងអាចបង្កគ្រោះថ្នាក់ដល់អាយុជីវិត៕
វីដេអូ៖
