.jpg)
ផ្លូវរងការខូចខាតដោយជំនន់ទឹកភ្លៀងនៅស្រុកភ្នំព្រឹក កាលពីថ្ងៃ ១៤ កក្កដា។ រូបថត NCDM
ភ្នំពេញៈ ក្រសួងសាធារណការ និងដឹកជញ្ជូនណែនាំដល់ក្រុមការងារគ្រោះមហន្តរាយរបស់ខ្លួន ត្រូវសហការជាមួយអាជ្ញាធរមូលដ្ឋានគ្រប់លំដាប់ថ្នាក់ ដើម្បីត្រៀមទប់ទល់គ្រោះទឹកជំនន់ និងទប់ស្កាត់មធ្យោបាយដឹកជញ្ជូនធុនធ្ងន់ ដែលឆ្លងកាត់ទីតាំងកំពុងរងគ្រោះ ដែលអាចបង្កឱ្យមានគ្រោះថ្នាក់ និងបង្កផលប៉ះពាល់ដល់ហេដ្ឋារចនាសម្ព័ន្ធ។
សេចក្តីណែនាំស្តីពីការចូលរួមសហការគ្រប់គ្រងមហន្តរាយ សម្រាប់វិស័យសាធារណការ និងដឹកជញ្ជូនចុះថ្ងៃទី ២៨ ខែកក្កដា បានឱ្យដឹងថា ក្នុងរយៈកាលកន្លងទៅថ្មីៗនេះ ស្ថានភាពទឹកភ្លៀងបានចាប់ផ្ដើមធ្លាក់ក្នុងកម្រិតពីមធ្យមទៅច្រើន ដែលតម្រូវឱ្យយើងត្រូវមានការប្រុងប្រយ័ត្នខ្ពស់អំពីបរិមាណទឹកភ្លៀងនៅតាមតំបន់ជុំវិញទន្លេមេគង្គ និងទន្លេសាប ដែលកម្ពស់ទឹកទន្លេ អាចនឹងហក់ឡើងខ្ពស់ និងអាចបង្កឱ្យមានផលប៉ះពាល់ដល់ហេដ្ឋារចនាសម្ព័ន្ធផ្លូវ-ស្ពាន។
សេចក្តីណែនាំបន្តថា ក្នុងករណីនេះទាមទារឱ្យយើងត្រូវមានការត្រៀមខ្លួនឱ្យបានហ្មត់ចត់ ដោយផ្អែកលើបទពិសោធកាលពីឆ្នាំ ២០២០ ដើម្បីទប់ទល់ និងគ្រប់គ្រងហានិភ័យផ្សេងៗដែលអាចនឹងកើតមានឡើងជាយថាហេតុ។
ដើម្បីឆ្លើយតបនឹងបញ្ហានៃការកើនឡើងជំនន់ទឹកភ្លៀង ដែលអាចបង្កជាគ្រោះមហន្តរាយ ដល់ហេដ្ឋារចនាសម្ព័ន្ធផ្លូវ-ស្ពាន ក្រសួងសាធារណការ និងដឹកជញ្ជូន បានណែនាំដល់ក្រុមការងារ លេខាធិការដ្ឋាន គ្រប់គ្រងគ្រោះមហន្តរាយរបស់ក្រសួង អគ្គនាយកដ្ឋានសាធារណការ អគ្គនាយកដ្ឋានបច្ចេកទេស អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ កំពង់ផែស្វយ័តក្រុងព្រះសីហនុ កំពង់ផែស្វយ័តភ្នំពេញ មន្ទីរសាធារណការ និងដឹកជញ្ជូនរាជធានី-ខេត្ត និងអង្គភាពពាក់ព័ន្ធត្រូវត្រៀមខ្លួនឱ្យបានរួចរាល់ និងចូលរួមអនុវត្តនូវយន្តការដែលចាំបាច់មួយចំនួន។
យន្តការទាំងនោះរួមមាន៖ «ត្រូវចាត់កម្លាំងជាបន្ទាន់ចុះជួសជុល និងតភ្ជាប់ផ្លូវស្ពានក្នុងករណីមានការកាត់ផ្តាច់ផ្លូវស្ពាន (ការផ្តាច់ចរាចរណ៍) ដើម្បីធានាឱ្យមាននិរន្តរភាពចរាចរណ៍ និងលើកសំណើសុំគោលការណ៍ ធានាចំណាយមកក្រសួងឱ្យបានឆាប់រហ័សបំផុត»។
ក្រសួងបញ្ជាក់ថា៖ «ត្រូវសហការជាមួយអាជ្ញាធរមូលដ្ឋានគ្រប់លំដាប់ថ្នាក់ និងមន្ទីរជំនាញពាក់ព័ន្ធ ដើម្បីទប់ទល់គ្រោះទឹកជំនន់ និងទប់ស្កាត់មធ្យោបាយដឹកជញ្ជូនធុនធ្ងន់ ដែលឆ្លងកាត់ទីតាំង កំពុងរងគ្រោះដោយទឹកជំនន់ និងត្រូវផ្សព្វផ្សាយផ្ដល់ព័ត៌មានជូនប្រជាជន អ្នកធ្វើដំណើរ និងក្រុមហ៊ុនដឹកជញ្ជូនផ្សេងៗ»។
ប្រធានមន្ទីរសាធារណការ និងដឹកជញ្ជូនខេត្តកណ្តាល លោក ម៉ឹង យូឡេង ប្រាប់ភ្នំពេញប៉ុស្តិ៍ថា ខេត្តកណ្តាលបានត្រៀមខ្លួនរួចជាស្រេចជារៀងរាល់ឆ្នាំ ដើម្បីទប់ទល់គ្រោះទឹកជំនន់ដែលអាចកើតមានជាយថាហេតុ។
លោកថា៖ «ព្រោះអីខេត្តកណ្តាលរបស់យើងព័ទ្ធជុំវិញដោយទឹក យើងត្រៀមទាំងម៉ាស៊ីនបូមទឹក គ្រឿងចក្រ បើសិនជាអាសន្នអន់ក្រអី គឺយើងម្ចាស់ការខ្លួនឯងបាន»។
យ៉ាងណាក៏ដោយលោកថា គិតត្រឹមម្សិលមិញពុំទាន់មានកន្លែងណាមួយដែលប្រឈមហានិភ័យខ្ពស់នៅឡើយទេ ខណៈមន្ត្រីនឹងបន្តបង្កើនការប្រុងប្រយ័ត្នខ្ពស់ជានិច្ច។ លោកបញ្ជាក់ថា៖ « ពីព្រោះទឹកជំនន់ជន់ខ្លាំងរវាងខែកញ្ញា និងខែតុលា ពីព្រោះខេត្តកណ្តាលខុសពីខេត្តដទៃ ខេត្តយើងទទួលទឹក ២ ប្រភពមួយផ្នែកមកពីខេត្តកំពង់ស្ពឺ មួយផ្នែកទៀតមកពីទន្លេមេគង្គ តែបើរដូវភ្លៀងខ្លាំងទឹកនោះធ្លាក់មកពីខេត្តកំពង់ស្ពឺមកវិញក្នុងខែកក្កដា សីហាតែចាប់ពីខែកញ្ញា ដល់វិច្ឆិកា ទឹកទន្លេមេគង្គឡើងវិញម្តង»។
លោក ម៉ឹង យូឡេង បានគូសបញ្ជាក់ថា៖ «យើងយល់អំពីបញ្ហាស្ថានភាពភូមិសាស្ត្រនេះបានយើងត្រៀមលក្ខណៈទប់ទល់ទឹកជំនន់តាំងពីឆ្នាំ ២០១៣ មកដល់ឥឡូវនេះយើងអាចគ្រប់គ្រងបាន»។
ទាក់ទងស្ពាន-ថ្នល់វិញលោកថា៖ «ពីដើមឡើយយើងមានការបារម្ភខ្លាំងចំពោះផ្លូវជាតិលេខ ២ និងផ្លូវលេខ ២១ គឺស្ពានបេឡត៍ តែឥឡូវនេះ យើងដូរពីស្ពានបេឡេត៍ ទៅស្ពានបេតុងអស់ហើយអ៊ីចឹងហានិភ័យដែលអាចបាក់ស្ពានអីនោះ មិនជាអាទិភាពទេ»។
ក្រសួងសាធារណការបានណែនាំឱ្យក្រុមការងារ ត្រូវចូលរួមផ្សព្វផ្សាយសភាពការណ៍គ្រោះអាសន្ននានា និងប្រមូលព័ត៌មានឱ្យបានគ្រប់ជ្រុងជ្រោយ ពីខ្សែបណ្ដោយគណៈកម្មាធិការជាតិគ្រប់គ្រងគ្រោះមហន្តរាយ និងត្រូវចាត់កម្លាំងដំឡើងស្លាកសញ្ញាចរាចរណ៍ និងស្លាកសញ្ញាសុវត្ថិភាពនៅតាមទីតាំងដែលកំពុង និងងាយរងគ្រោះដោយទឹកជំនន់ ដើម្បីចៀសវាងគ្រោះថ្នាក់ជាយថាហេតុដល់អ្នកប្រើប្រាស់ផ្លូវថ្នល់ និងអ្នកដំណើរ៕
វីដេអូ៖
