.jpg)
រថយន្តកំពុងបើកបរលើផ្លូវជាតិលេខ ៤ ដែលគ្រោងនឹងពង្រីកសងខាងផ្លូវ។ ហុង មិនា
ភ្នំពេញៈ ក្រសួងសាធារណការ និងដឹកជញ្ចូនកំពុងសិក្សាពីការពង្រីកកំណាត់ផ្លូវជាតិលេខ ៤ ពីទទឹង ៧ ម៉ែត្រ ទៅ ១០ ម៉ែត្រទៅតាមទីតាំងភូមិសាស្ត្រជាក់ស្តែង ដែលគម្រោងនេះគ្រោងនឹងអនុវត្តរយៈពេល ២៤ ខែ គឺចាប់ពីឆ្នាំ ២០២២ ដល់ឆ្នាំ ២០២៣ ខាងមុខ។
ជាមួយនឹងទទឹងផ្លូវឱ្យធំទូលាយជាងមុន ក្រសួងក៏គ្រោងនឹងជួសជុល និងលើកកម្ពស់ផ្លូវនៅតាមតំបន់មួយចំនួនដែលធ្លាប់លិចដោយទឹកភ្លៀង ដើម្បីពង្រឹងគុណភាពផ្លូវ និងសម្រួលដល់ការធ្វើដំណើររបស់ប្រជាពលរដ្ឋក្នុងតំបន់នេះផងដែរ។
លោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូនបានប្រាប់ភ្នំពេញ-ប៉ុស្តិ៍នៅថ្ងៃទី ២៩ ខែកក្កដាថា ក្រសួងមិនទាន់ធ្វើការលម្អិតយ៉ាងណាចំពោះគម្រោងពង្រីកផ្លូវជាតិលេខ ៤ នេះនៅឡើយទេ ព្រោះបញ្ហាចំពោះមុខ ក្រសួងកំពុងសិក្សាឱ្យបានស៊ីជម្រៅជាមុនសិន ដើម្បីឈានទៅរកការអនុម័តថវិកាសម្រាប់គម្រោងពង្រីកផ្លូវ ១ ខ្សែនេះ។
លោកបញ្ជាក់ថា៖ «នៅក្នុងដំណាក់កាលនេះ យើងបានគិតគូរទៅលើការរៀបចំនូវផ្លូវល្បឿនលឿន ដើម្បីដោះស្រាយយ៉ាងណា កុំឱ្យមានការកកស្ទះ និងកាត់បន្ថយពេលវេលា និងកាត់បន្ថយតម្លៃដឹកជញ្ជូន។ ប៉ុន្តែយើងក៏មិនបោះបង់ផ្លូវចាស់ដែរ យើងនៅតែដំណើរការសម្រាប់ការធ្វើដំណើរជាលក្ខណៈគ្រួសារ និងការធ្វើដំណើរជិតៗរបស់ប្រជាពលរដ្ឋយើង»។
បើតាមលោក ហ៊ាង សុទ្ធាយុត្តិ គម្រោងស្តារ និងស្ថាបនាផ្លូវជាតិលេខ ៤ ឡើងវិញនឹងត្រូវប្រើពេលប្រមាណ ២ ឆ្នាំក្នុងការពង្រីកផ្លូវកៅស៊ូមួយនេះឱ្យក្លាយជាផ្លូវ ដែលមានភាពងាយស្រួលទាំងការដឹកជញ្ជូន និងការធ្វើដំណើររបស់សាធារណជន។ គម្រោងនេះនឹងពង្រីកទទឹងផ្លូវទំហំពី ៧ ទៅ ១០ ម៉ែត្របន្ថែម ទៅតាមទីតាំងភូមិសាស្ត្រជាក់ស្តែង លើកលែងតែកន្លែងខ្លះដែលបានពង្រីករួចហើយ ដូចជានៅម្តុំខេត្តកំពង់ស្ពឺ និងចោមចៅ រាជធានីភ្នំពេញ។
លោកថ្លែងថា៖ «ដោយសារតែផ្លូវជាតិលេខ ៤ នេះមានកន្លែងខ្លះ គឺមានទំហំតូច ដូច្នេះបើយើងគិតពីទំហំចរាចរណ៍ និងទំហំយានយន្តបច្ចុប្បន្នឃើញថា រថយន្តពិបាកក្នុងការចៀសគ្នា ដែលធ្វើឱ្យមានគ្រោះថ្នាក់ចរាចរណ៍កើតមាន។ ផ្លូវនេះ គឺត្រូវមានទំហំមួយ ដែលសមស្របទៅនឹងតម្រូវការបច្ចុប្បន្ន ដោយត្រូវពង្រីកជា ២ គន្លងដោយម្ខាងៗ យើងត្រូវពង្រីកចន្លោះពី ៣ ទៅ ៣ ម៉ែត្រកន្លះបន្ថែមទៀត ដើម្បីឱ្យផ្លូវមួយនេះចូលជាស្តង់ដាផ្លូវមួយ ដែលងាយស្រួលក្នុងការធ្វើដំណើរ»។
ផ្លូវជាតិលេខ ៤ តភ្ជាប់ពីភ្នំពេញ ទៅក្រុងព្រះសីហនុ គឺមានប្រវែងសរុបជាង ២៣០ គីឡូម៉ែត្រ ហើយកាលពីឆ្នាំ ២០២០ ធនាគារពិភពលោក បានអនុម័តហិរញ្ញប្បទានចំនួន ១១០ លានដុល្លារអាមេរិក សម្រាប់ប្រើប្រាស់លើការបង្កើនគុណភាព និងការរៀបចំកែលម្អផ្លូវនេះឡើងវិញ។
លោក គង់ សុវណ្ណ អ្នកជំនាញសុខភាពសាធារណៈ និងជានាយកកម្មវិធីមូលនិធិសុវត្ថិភាពអន្តរជាតិជឿថា ក្រសួងនឹងសិក្សាឱ្យបានស៊ីជម្រៅជាពិសេសផ្តោតសំខាន់ជុំវិញស្ថានភាពផ្លូវមួយចំនួនដែលជាកន្លែងគ្រោះថ្នាក់បំផុតនោះ ដោយធ្វើយ៉ាងណាស្ថាបនាផ្លូវទាំងនេះឱ្យបានត្រឹមត្រូវ និងប្រកបដោយបរិក្ខារបច្ចេកទេសទន្ទឹមគ្នានេះដែរការអប់រំបណ្តុះបណ្តាលឥរិយាបថរបស់មនុស្សដែលជាអ្នកប្រើប្រាស់ផ្លូវក៏ជារឿងមួយចាំបាច់ផងដែរ ដើម្បីរួមផ្សំធ្វើឱ្យការប្រើប្រាស់ផ្លូវនៅក្នុងប្រទេសកម្ពុជាប្រកបដោយសុវត្ថិភាព។
លោកថា៖ «នៅពេលមានផ្លូវល្អស្អាតមានការបំពាក់បរិក្ខារសុវត្ថិភាពហើយ ចំណែកអ្នកបើកបរមិនទាន់ទទួលបានការអប់រំត្រឹមត្រូវហើយការអនុវត្តការត្រួតពិនិត្យច្បាប់មិនបានជាប់លាប់នោះ បញ្ហាគ្រោះថ្នាក់ចរាចរណ៍គឺនៅតែកើតមានដដែលទេ»៕
