កំពង់ស្ពឺៈ មន្ត្រីបរិស្ថានខេត្តកំពង់ស្ពឺឃាត់មនុស្ស ៦ នាក់ ឱ្យធ្វើកិច្ចសន្យាបញ្ឈប់ការហ៊ុមព័ទ្ធយកដីរបស់រដ្ឋ ក្នុងភូមិចំការតែ ឃុំចំបក់ ស្រុកភ្នំស្រួច ខណៈពេលចុះទៅបង្ក្រាបដកបង្គោលរបង និងរុះរើផ្ទះ រោង និងខ្ទមអនាធិបតេយ្យ ដែលបានសាងសង់នៅទីនោះកាលពីថ្ងៃទី ២៨ ខែកក្កដា។
លោក ឱម ម៉ាក់ធារី ប្រធានមន្ទីរបរិស្ថានខេត្តកំពង់ស្ពឺថ្លែងពីម្សិលមិញថា មន្ត្រីបរិស្ថានដឹកនាំដោយ លោក សួស សុផល អនុប្រធានមន្ទីរទទួលបន្ទុកមន្ត្រីឧទ្យានុរក្ស ការិយាល័យឧទ្យានជាតិគិរីរម្យបានចុះបង្ក្រាបការហ៊ុមព័ទ្ធដីព្រៃរបស់រដ្ឋក្នុងគោលបំណងយកធ្វើជាកម្មសិទ្ធិ និងការសាងសង់រោងខ្ទមអនាធិបតេយ្យដោយគ្មានច្បាប់អនុញ្ញាតនៅទីតាំង ៤ កន្លែងដោយឃាត់មនុស្ស ៦ នាក់ឲ្យធ្វើកិច្ចសន្យាបញ្ឈប់ការប្រព្រឹត្តបទល្មើសធនធានធម្មជាតិបន្តទៀត។
លោកបន្តថា ក្នុងចំណោមទីតាំង ៤ កន្លែងនោះនៅទីតាំងទី ១ មន្ត្រីបរិស្ថាន បានកំណត់ដឹងអត្តសញ្ញាណម្ចាស់ទីតាំង ដោយការសួរនាំទៅកាន់ស្ត្រីម្នាក់ជាអ្នកយាមដីឲ្យគេនៅទីនោះ។
លោកថ្លែងថា៖ «មន្ត្រីយើងបានធ្វើកិច្ចសន្យាដើម្បីបញ្ឈប់ការសាងសង់បណ្ដោះអាសន្នស្ថិតក្នុងភូមិសាស្ត្រភូមិចំការតែ ឃុំចំបក់ ស្រុកភ្នំស្រួច ក្នុងឧទ្យានជាតិព្រះសុរាម្រិតកុសមៈគិរីរម្យ។ បើតាមការបញ្ជាក់ពីឈ្មោះ ឈុំ ស្រីលាភ ភេទស្រីបានឱ្យដឹងថា ទីតាំងខាងលើម្ចាស់មានឈ្មោះ ចាន់ ថុល រស់នៅភ្នំពេញ» ។
ដោយឡែក ចំពោះទីតាំង ៣ កន្លែងទៀតដែលស្ថិតក្នុងភូមិចំការតែ ឃុំចំបក់ ស្រុកភ្នំស្រួច លោក ឱម ម៉ាក់ធារី បញ្ជាក់ថា មិនស្គាល់អត្តសញ្ញាណនៅឡើយ។ បន្ទាប់ពីបានពិនិត្យបរិវេណកន្លែងកើតហេតុទាំង ៣ ទីតាំងនោះ ឃើញមានដាំបង្គោលរបងហ៊ុមព័ទ្ធចំនួន ២ ០០០ ដើម និងលួសបន្លាចំនួន ៣ ខ្សែប្រវែង ១ ៥០០ ម៉ែត្រ។ មន្ត្រីបរិស្ថានបានដក និងកម្ទេចចោល នៅនឹងកន្លែង និងបន្តស្រាវជ្រាវរកជនសង្ស័យ ដើម្បីចាប់យកមកផ្តន្ទាទោសតាមច្បាប់ស្ដីពីតំបន់ការពារធម្មជាតិ។
លោកថ្លែងថា៖ «ចំពោះករណីបញ្ជូនទៅតុលាការមិនទាន់មានទេ ដោយសារតែធ្វើកិច្ចសន្យា ហើយអ្នកពាក់ព័ន្ធទាំងនោះមិនបានប្រព្រឹត្តល្មើសបន្តទៀត ប៉ុន្តែបើមានការប្រព្រឹត្តខុសតទៀត អាហ្នឹងយើងចាត់ការតាមការអនុវត្តជាក់ស្តែងនៅលើទីវាល» ។
បើតាមលោក ឱម ម៉ាក់ធារី ចំពោះអ្នកពាក់ព័ន្ធដែលមន្ត្រីជំនាញបានស្គាល់អត្តសញ្ញាណថា ជាម្ចាស់ទីតាំងនឹងកសាងសំណុំរឿងបញ្ជូនទៅតុលាការ ដើម្បីចាត់ការទៅតាមផ្លូវច្បាប់។
លោកថ្លែងថា៖ «ចង់ជម្រាបជូនថា កាលណាគេហៅមកសួរចម្លើយ គេឆ្លើយហើយ ត្រូវសរសេរក្នុងកំណត់ហេតុ អ៊ីចឹងទេ អ្វីដែលជាសំណុំរឿងនឹងបញ្ជូនទៅតុលាការ តុលាការនឹងមើលទៅតាមសំណុំរឿងហ្នឹង ហើយក្នុងសំណុំរឿងហ្នឹង ជនដែលប្រព្រឹត្តហ្នឹងឆ្លើយដាក់អ្នកណាខ្លះ គេចេញដីកាកោះហៅអ្នកហ្នឹងទៅ អាហ្នឹងនីតិវិធីរបស់តុលាការ» ។
លោក ប៉ែន ប៊ុណ្ណារ៍ មន្ត្រីជាន់ខ្ពស់នៃសមាគមអាដហុកថ្លែងថា រឿងរ៉ាវពាក់ព័ន្ធក្នុងបញ្ហាកាប់រានទន្ទ្រានដីព្រៃរដ្ឋកើតឡើងដដែលៗ ស្ទើរតែគ្រប់ខេត្តក្រោមរូបភាព ប្រជាពលរដ្ឋចូលទៅកាប់រានទន្ទ្រានអាស្រ័យផល ហើយលក់ទៅឲ្យអ្នកមានលុយមានអំណាច ដែលមានការឃុបឃិតគ្នាពីអាជ្ញាធរមួយចំនួនបានចេញលិខិតទិញ-លក់។
លោកថ្លែងថា៖ «ប្រជាពលរដ្ឋនៅតែទៅកាប់រានទន្ទ្រានដីព្រៃអស់ពីកន្លែងមួយទៅកន្លែងមួយទៀតគ្រប់ខេត្តទាំងអស់។ អ៊ីចឹងយើងឃើញថា វិធានការរបស់អាជ្ញាធរអត់មានពិតប្រាកដ ហើយដោយសារអំពើពុករលួយជាប្រព័ន្ធផង ធ្វើឲ្យអ្នកមានលុយមានអំណាច ប្រើប្រាស់រូបភាពដដែលៗបានជោគជ័យ» ។
ឆ្លើយតបចំពោះបញ្ហានេះ លោកប្រធានមន្ទីរបរិស្ថានខេត្តកំពង់ស្ពឺថ្លែងថា មន្ត្រីជំនាញធ្វើការទៅតាមច្បាប់ មិនមានការបន្ធូរបន្ថយឡើយ ប៉ុន្តែការអនុវត្តច្បាប់ត្រូវស្វែងរកមេខ្លោងនៅក្រោយខ្នងឱ្យឃើញច្បាស់ដើម្បីដាក់ទៅតុលាការដោះស្រាយ។
លោកថ្លែងថា៖ «ពលរដ្ឋមួយចំនួនគាត់ទៅស៊ីឈ្នួលគេ ដោយមិនបានដឹងថា បញ្ហាផ្លូវច្បាប់យ៉ាងណាទេ ហេតុនេះយើងត្រូវឱ្យគាត់ធ្វើកិច្ចសន្យាដឹងពីកំហុស មិនមែនឲ្យតែឃើញចាប់ ឃើញចាប់នោះទេ យើងពិនិត្យមើលជាក់ស្តែង និងទុកឱកាសឱ្យគាត់បានកែខ្លួនផង»៕
វីដេអូ៖