.jpg)
មណ្ឌលផ្តល់បណ្ណបើកបរនៅផ្សារទំនើបអ៊ីអន ២។ រូបថត ក្រសួងសាធារណការ
ភ្នំពេញៈ ក្រសួងសាធារណការ និងដឹកជញ្ចូន បានផ្លាស់ប្តូរម៉ោងធ្វើការ នៅតាមមណ្ឌលផ្តល់សេវាសាធារណៈចំនួន ៣ កន្លែងដើម្បីចូលរួមទប់ស្កាត់ការឆ្លងរាលដាលនៃជំងឺកូវីដ១៩ ខណៈស្ថាប័ននេះ អំពាវនាវឱ្យមន្ត្រីរបស់ខ្លួន នាំសាច់ញាតិ ដែលមានអាយុក្រោម ១៨ ឆ្នាំ មកចាក់វ៉ាក់សាំង។
ទំព័រហ្វេសប៊ុករបស់ក្រសួងសាធារណការ និង ដឹកជញ្ចូន បានឱ្យដឹងនៅថ្ងៃទី ២៩ កក្កដាថា មណ្ឌលផ្តល់សេវាសាធារណៈចំនួន ៣ កន្លែង ដែលត្រូវផ្លាស់ប្តូរម៉ោងធ្វើការបណ្តោះអាសន្ននេះ គឺមានមណ្ឌលផ្តល់សេវាសាធារណៈ អ៊ីអន១ អ៊ីអន២ និងមណ្ឌលផ្តល់សេវាសាធារណៈជីបម៉ុង ណូរ៉ូមល។
ម៉ោងធ្វើការធម្មតា នៅតាមមណ្ឌលផ្តល់សេវាសាធារណៈ ចំនួន ៣ កន្លែងនេះ គឺចាប់ពីម៉ោង ៩ ព្រឹក ដល់ម៉ោង ១០ យប់។
ក្រសួងបានបញ្ជាក់ថា៖ «បានផ្លាស់ប្តូរម៉ោងធ្វើការជាបណ្តោះអាសន្ន ទៅម៉ោង ៩:០០ ព្រឹកដល់ ម៉ោង ៨:០០ យប់ រយៈពេល ១៤ថ្ងៃ ចាប់ពីថ្ងៃទី៣០ កក្កដា ២០២១ នេះតទៅ ដើម្បីចូលរួមទប់ស្កាត់ការរីករាលដាលនៃជំងឺកូវីដ១៩»។
ជាមួយគ្នានេះ ក្រសួងក៏បានណែនាំឲ្យមន្រ្តីរបស់ខ្លួននាំសាច់ញាតិកូនចៅ មកទទួលវ៉ាក់សាំងការពារជំងឺកូវីដ ១៩ តាមរយៈយុទ្ធនាការចាក់វ៉ាក់សាំងកូវីដ១៩ (ស៊ីណូវ៉ាក់) ចំពោះប្រជាជន ដែលមានអាយុពី ១២ ឆ្នាំ ដល់អាយុក្រោម ១៨ ឆ្នាំចាប់ពីថ្ងៃទី ០៨ ខែសីហា ឆ្នាំ ២០២១ តទៅផងដែរ។
ក្រសួងសាធារណការបានបញ្ជាក់នៅក្នុងសេចក្តីជូនដំណឹងថា ចំពោះថ្នាក់ដឹកនាំក្រសួង ជារដ្ឋលេខាធិការ ឬទីប្រឹក្សាក្រសួង មានឋានៈស្មើរដ្ឋលេខាធិការ សូមអញ្ជើញនាំសាច់ញាតិកូនចៅ ទៅទទួលការចាក់វ៉ាកសាំងកូវីដ១៩ នៅមន្ទីរពេទ្យកាល់ម៉ែត។
ចំណែកថ្នាក់ដឹកនាំក្រសួងជាអនុរដ្ឋលេខាធិការ អគ្គនាយក អគ្គនាយករង ឬទីប្រឹក្សាក្រសួងមានឋានៈស្មើ អនុរដ្ឋលេខាធិការ សូមអញ្ញើញនាំសាច់ញាតិកូនចៅទៅទទួលចាក់វ៉ាក់សាំងកូវីដ ១៩ នៅមន្ទីរពេទ្យព្រះអង្គឌួង និងលោក-លោកស្រីជាបុគ្គលិករាជការ ដែលមានតួនាទីជាប្រធាននាយកដ្ឋាន អនុប្រធាននាយកដ្ឋានទីប្រឹក្សាក្រសួង ប្រធានការិយាល័យអនុប្រធានការិយាល័យ បុគ្គលិកក្របខ័ណ្ឌ និង បុគ្គលិកជាប់កិច្ចសន្យា សូមអញ្ជើញនាំសាច់ញាតិកូនចៅទៅទទួលការចាក់វ៉ាកសាំងកូវីដ១៩ នៅ មន្ទីរពេទ្យគន្ធបុប្ផាភ្នំពេញ (វត្តភ្នំ) ឬ មជ្ឈមណ្ឌលជាតិគាំពារមាតានិងទារក៕
